Ⅻ
Yeso ogoakwa amaguta na Mariamu agwo Bethania
(Mat 26:6-13; Mar 14:3-9)
Ⅰ Nabo amatuko atano na rimo ritang’ani ri’Epasaka Yeso agaika Bethania, agwo aase Lazaro arenge, oria okwete, akabokigwa na Yeso.
Ⅱ Bakamoroiseria endagera aria. Martha ere agakora emeremo eyio, korende Lazaro nigo arenge oyomo bwa baria baikaransete ase endagera amo nere.
Ⅲ Erio Mariamu akabogoria ekerengo ki’eratili eyemo y’amanukato e rigori rinene, agaaka Yeso amagoro, akayatinyia netukia yaye; enyomba egaichora rimisu ri’amaguta aria.
Ⅳ Korende Yudasi Iskariota mosinto o Simioni, oyomo bw’aborokigwa ba Yeso oyoramorue, akabora,
Ⅴ “Nase ki amaguta aya ataoonigwa chidinari amagana atato, na echio chiegwe abataka?”
Ⅵ Aya igo akwanete, tari ng’a arorerete abataka amaabera, korende nekiagera arenge omoibi, naende abwate esanduki ye chibesa, na igo anarete korusia echiabekire aroro.
Ⅶ Erio Yeso agateeba, “Motige, agache aya goika rituko ri’ogotindekwa kwane.
Ⅷ Naki igo more nabataka amo nainwe amatuko onsi, korende timori nainche amatuko onsi.”
Ⅸ Nabo omoganda omonene bw’Abayahudi bakamanya ng’a ere nao are aria; bagacha, tari ase engencho ya Yeso yoka, korende barore Lazaro, oyio Yeso abogetie korwa ase abakuure.
Ⅹ Abakuani abanene bagakora ekiina baite Lazaro boigo,
Ⅺ ekiagera ase engencho yaye abange b’Abayahudi bakagenda bakamwegena Yeso.
Yeso ogochengerwa kagosoa Yerusalemu
(Mat 21:1-11; Mar 11:1-11; Luk 19:28-40)
Ⅻ Rituko rikobwatia abanto abange abachete ase Rituko Rinene, kobachia koigwa ng’a Yeso ngocha are Yerusalemu,
ⅩⅢ bakabogoria chinsagia chi’emekendo, bagasoka isiko kogenda komoorotota, bagaaka eriogi, bagateeba, “Hosana! Nasesenirie oyogocha ase erieta ri’Omonene, Omorwoti bw’Abaisraeli.”
ⅩⅣ Yeso akanyora emori y’etigere, akayeriina, buna yarigetwe,
ⅩⅤ “Inwe abanto ba Sayoni, timoiroka!
Rigereria, Omorwoti oino ngocha are,
igo ariinete emori y’etigere.”
ⅩⅥ Amang’ana aya aborokigwa baye tibayamanyete agwo ritang’ani, korende magega Yeso gatogigwe, erio bakainyora ng’a narikeire aya, naende ng’a mbamokorere aya.
ⅩⅦ Nabo omoganda bw’abaanto abwo barenge amo nere ekero arangeretie Lazaro korwa ase embeera ime, na komobokia, bakaba bakomoorokia.
ⅩⅧ Ekio nakio kiagerete omoganda okagenda komoorotota, ekiagera baigwete ng’a okorire egekone eke.
ⅩⅨ Erio Abafarisai bagateebania barabwo ase barabwo, “Mwarorire ng’a timokonyara gokora gento; ense yagendire komotunyana.”
Okorigia kw’Abagiriki
ⅩⅩ Naende mbarenge Abagiriki bande ase abanto abwo batiirete kogenda gosasiima ase ekero kie Rituko Rinene.
ⅩⅪ Barabwo bagachiera Filipo o Bethisaida bw’ensemo ya Galili, bakamosaba, bakobora, “Omosike, ntorigetie korora Yeso.”
ⅩⅫ Filipo akagenda, agateebia Anderea; erio Anderea na Filipo bagateebia Yeso.
ⅩⅩⅢ Yeso akabairaneria, akabora, “Ensa yaikire, Omwana‐o‐Mwanyabaanto abakwe.
ⅩⅩⅣ Ekeene, ekeene, nabateebirie; Enyeke y’engano etagweti esoe inse ase riroba ekwe, nigo ekobao yoka; korende kerakwe, nigo ekwama okwama okonge.
ⅩⅩⅤ Oyoranche obogima bwaye, nabosirie; oyorageche obogima bwaye ase ense eye, nabogache goika obogima bwa kare na kare.
ⅩⅩⅥ Omonto karankorere, antunyane; na aase inde inche, nomosomba one nao arabe; naende omonto karankorere, Tata namosike.
ⅩⅩⅦ “Bono omoyo one oichanire; ninki ngokwana? Tata, ontoorie korwa ase ense eye! Yaya, korende ase engencho y’ayio naikeire ensa eye.
ⅩⅩⅧ Tata, obake erieta riao!”
Erio eriogi rigacha korwa igoro, rigateba, “Naribakire, na inche nindibake naende.”
ⅩⅩⅨ Nabo abanto abateneine ang’e bakaigwa, bakaboora ng’a kwabeire okogukura; abande bakaboora, “Nomomalaika ogokwana nere.”
ⅩⅩⅩ Yeso akairaneria, akabora, “Eriogi eri tiricheti ase engencho yane, korende nase engencho yaino.
ⅩⅩⅪ Bono ekiina gi’ense eye nkere; bono omogambi bw’ense eye natugutwe isiko.
ⅩⅩⅫ Na inche kondaimokererigwe igoro korwa ase ense, nimbang’use bonsi ase ’nde.”
ⅩⅩⅩⅢ Agakwana aya, erinde aorokie imakweri ki aranyare gokwa.
ⅩⅩⅩⅣ Erio omoganda okamoiraneria, “Nigo tokoigwa ase amachiiko ng’a Kristo nigo arabeo goika kare na kare, na aye naki okobora ng’a nemogwenerete Omwana‐o‐Mwanyabaanto aimokererigwe igoro? Oyo Omwana‐o‐Mwanyabaanto nere ng’o?”
ⅩⅩⅩⅤ Yeso akabateebia, “Omobaso nigo ore amo nainwe egeka egeke bosio. Genda ekero more nomobaso oria, omosunte tocha kobabua; ere oyokogenda ase omosunte ime tamanyeti aase akogenda.
ⅩⅩⅩⅥ Ekero more nomobaso yuegene, erinde monyare koba abana b’omobaso.”
Ekero Yeso akwanete ayio akagenda akebisa korwa ase bare.
Ogotegena kw’abaanto ba Boyahudi, korende mbareo aborokigwa ba bobisi
ⅩⅩⅩⅦ Nonya okorete ebikone ebinge ase amasio abo, tibamwegenete,
ⅩⅩⅩⅧ erinde riikeranigwe ring’ana riria omobani Isaya ateebete,
“Omonene, ning’o bwegenire amang’ana aito?
Naende ning’o okoboko kw’Omonene kwamaanoreirwe?”
ⅩⅩⅩⅨ Nakio kiagerete tibanyara kwegena. Naki Isaya nigo ateebete naende,
ⅩⅬ “Obaukoirie amaiso,
okorire chinkoro chiabo chiakong’ire,
tibacha korora namaiso abo,
na komanya ne chinkoro chiabo,
baonchoke na inche mbagwenie.”
ⅩⅬⅠ Amang’ana ayio Isaya nigo ayakwanete, ekiagera aroche obonene bwaye; agaatora amang’ana aye.
ⅩⅬⅡ Korende abange nonya nabanene bakamwegena, korende ase engencho y’Abafarisai tibamoorogetie, tibacha korusigwa ase esinagogi,
ⅩⅬⅢ ekiagera mbanchete ogotogia kw’abaanto kobua ogotogia kwa Nyasae.
Okworokereria kwa Yeso maiso marore
ⅩⅬⅣ Yeso agaaka eriogi akabora, “Oyonyegenire inche, tanyegeneti inche omonyene, korende ere oyontomete.
ⅩⅬⅤ Na ere oyondoche inche nigo aroche ere oyontomete.
ⅩⅬⅥ Inche nachire imbe omobaso ase ense, erinde kera oyonyegenire, tamenya ase omosunte ime.
ⅩⅬⅦ Naende omonto karaigwe amang’ana aane, ko tayabwata, inche tinkomogambia, ekiagera tincheti kogambia ense, korende nyetoorie.
ⅩⅬⅧ Oyo oranyange na otancheti amang’ana aane, nare noyo oramogambie. Ring’ana riria nakwanete, nario riranyare komogambia ase rituko ri’omoerio.
ⅩⅬⅨ Naki tinakwanete ase okobua kwane omonyene, korende Tata oyontomete onchikiire aya ngokwana.
Ⅼ Na inche namanyire ng’a ogochika kwaye nobogima bwa kare na kare. Ase ayio nigo ngokwana buna Tata antebetie.”