ⅩⅢ
Yeso ogosibia aborokigwa baye amagoro
Ⅰ Ekero rituko rinene ri’Epasaka ritaraba, Yeso akamanya ng’a ensa yaye yaikire akorua ase ense eye na kogenda ase Ise, akaba nanchete abanto baye abarenge ase ense, naboigo akabancha goika omoerio.
Ⅱ Ekero ki’endagera ya mogoroba, Saitani gaikire kobeeka Yudasi omwana o Simioni Iskariota enkoro y’okomorua,
Ⅲ Yeso omanyete ng’a Ise omoeire bionsi ase amaboko aye, naende ng’a nigo arwete ase Nyasae, naende nkoirana are ase Nyasae.
Ⅳ Akaimoka korwa ase endagera, akabeeka chianga chiaye ensemo, akabogoria egetambaa, akeboyia.
Ⅴ Erio akabeeka amaache ase esani, agachaaka gosibia aborokigwa baye amagoro abo, na koyatinyia negetambaa keria eboyetie.
Ⅵ Nabo agaika ase Simioni Petero, Oyo akamoteebia, “Omonene! Aye ngosibia ore amagoro aane?”
Ⅶ Yeso akairaneria, akamoteebia, “Aya ngokora inche, tokoyamanya bono, korende noyamanye magega.”
Ⅷ Petero akamokania, “Togonsibia amagoro aane nonya ng’ake.”
Yeso akamoteebia, “Ntagosibeti, tori nobomo amo nainche.”
Ⅸ Erio Simioni Petero akamoteebia, “Omonene, tari amagoro aane oka, korende nonya namaboko na omotwe one.”
Ⅹ Yeso akamoteebia, “Oyoikire gwesibia tagwenereti gwesibia naende, otatiga amagoro oka, korende obeire omochenu omobere bwonsi; na inwe mwabeire abachenu, korende tai mwensi.”
Ⅺ Naki amomanyete oyogocha komorua; ase ayio agateeba, “Timori abachenu mwensi.”
Ⅻ Nabo agachia gokoora kobasibia amagoro abo na kobogoria chianga chiaye, agaikaransa naende, akabateebia, “Mwamanyire eki nabakorera?
ⅩⅢ Inwe iga mokondoka Omworokia, naende Omonene; na igo mbuya mokobora, naki naboigo inde.
ⅩⅣ Nabo onye inche, inde Omonene naende Omworokia, nabasibirie amagoro aino, nebagwenerete gosibania amagoro inwe ase inwe.
ⅩⅤ Naki nabaeire ekiorokererio ekiya, erinde ayio nabakorera inwe, nainwe moyakore.
ⅩⅥ Ekeene, ekeene, nabateebirie: Omosomba tari omonene kobua omonene oye, gose omotomwa tari omonene kobua ere oyomotomete.
ⅩⅦ Komoramanye ayio, mosesenirie komorayakore.
ⅩⅧ Tindi gokwana ase more mwensi; nabamanyire aba nachorire, erinde amariiko anyare goikeranigwa, ayagoteeba: Oyokoria omogati amo nainche oimokereirie egetingiro kiaye igoro ase ’nde.
ⅩⅨ Nabatebirie aya korwa bono ritang’ani ataraba, erio ekero arache koba monyare kwegena ng’a ninche ere.
ⅩⅩ Ekeene, ekeene, nabateebirie: Ere oyoramwanche onde bwensi oyo ndatome, onyanchire inche; nere oyoranyanche inche omwanchire ere oyontomete.”
Yeso okoorokia oyo orache komorua
(Mat 26:20-25; Mar 14:17-21; Luk 22:21-23)
ⅩⅪ Agachia gokoora gokwana aya, Yeso agaichana ase omoika oye, akaorokia, agakwana, “Ekeene, ekeene, nabateebirie: Oyomo oino nandue.”
ⅩⅫ Aborokigwa baye bakarigererania, bagasinywa komanya gose ning’o atora.
ⅩⅩⅢ Narenge aroro oyomo bw’aborokigwa baye, oyobweegegete Yeso egekuba kiaye, oyo Yeso anchete.
ⅩⅩⅣ Nabo Simioni Petero akamoraga, akamobooria, “Moborie ning’o atora?”
ⅩⅩⅤ Ere oria akamweegeka buna arenge ase egekuba kia Yeso, akamobooria, “Omonene, ning’o?”
ⅩⅩⅥ Erio Yeso akairaneria, “Nomonto oria ngotongereria egesamunye ki’omogati na komoa.” Agatongereria Yudasi, mosinto o Simioni Iskariota, egesamunye, agakemoa.
ⅩⅩⅦ Naende magega kanyorire egesamunye keria, Saitani akamosoa. Erio Yeso akamoteebia, “Aya ogokora, yakore bwango.”
ⅩⅩⅧ Onde tarenge ase baria baikaransete ase emesa omanyete engencho yagerete amotebetie iga.
ⅩⅩⅨ Ekiagera Yudasi arenge kobogoria esanduki ye chitaabu, baria bande bagakaga ng’a Yeso nigo are komoteebia, “Gora ebitorigetie ase Rituko Rinene”, gose ng’a abae abataka egento.
ⅩⅩⅩ Nabo oyo, kanyorire egesamunye keria agasoka bwango; na igo bwarenge botuko.
Ogochika okoyia kw’obwanchani
ⅩⅩⅪ Erio oyio gasokire, Yeso akabora, “Bono Omwana‐o‐Mwanyabaanto obakirwe, na Nyasae obakirwe ime yaye.
ⅩⅩⅫ Onye Nyasae okobakwa ime yaye, Nyasae boigo namobake ime yaye omonyene, na komobaka erio kegima.
ⅩⅩⅩⅢ Abana abake, nkere ekero egeke inde amo nainwe. Namondigie; korende buna natebeetie Abayahudi, ng’a aase ngochia inche, inwe timokonyara gochao, bono nabateebirie nainwe.
ⅩⅩⅩⅣ Ogochika okoyia nabaeire nakwo oko, mwanchane. Buna nabanchete inwe, nainwe mwanchane boigo.
ⅩⅩⅩⅤ Igo abanto bonsi nabamanye ng’a naborokigwa baane more, komorabe nobwanchani inwe ase inwe.”
Ogokana gwa Petero gokobanwa
(Mat 26:31-35; Mar 14:27-31; Luk 22:31-34)
ⅩⅩⅩⅥ Simioni Petero akamobooria, “Omonene, ng’ai okogenda?”
Yeso akamoiraneria, “Aase ngochia tokonyara gontunyana bono, korende nontunyane magega.”
ⅩⅩⅩⅦ Petero akamoteebia, “Omonene, nase ki ntanyare kogotunyana bono? Nindue obogima bwane ase engencho yao.”
ⅩⅩⅩⅧ Yeso akamoiraneria, “Inee! Obogima bwao noborue ase engencho yane? Ekeene, ekeene, nagotebirie: Etuoni tekobuga goika gwankanire ara gatato.