ⅩⅤ
Omosabibu ne chinsagia
Ⅰ “Inche ninche omosabibu bw’ekeene, na Tata one nomooroiseria.
Ⅱ Kera orosagia ime ase ’nde orotameti, nigo akoronacha, na kera orokwama nigo akorososa, erinde romente kwama.
Ⅲ Inwe mwaikire koba abachenu ase engencho ye ring’ana nabateebirie.
Ⅳ Menya ime yane, na inche ime yaino. Buna orosagia rotanyare kwama rwoka oronyene, rotabeti ime ase omosabibu, naboigo nainwe motamenyeti ime yane.
Ⅴ Inche nomosabibu, na inwe nechinsagia. Oyo omenyete ime yane, na inche ime yaye, oyio name mono, ekiagera ntaiyo inche, timokonyara gokora kende gionsi.
Ⅵ Omonto otamenyeti ime yane, nigo aratugutwe isiko buna orosagia rwomete. Chinsagia chiomete nigo chigosangererigwa, na korutwa ase omorero, na koyia.
Ⅶ Komoramenye ime yane, na amang’ana aane karabe ime yaino, saba kera ekemoganetie na inwe namokorerwe.
Ⅷ Ase ayio Tata abakwe ekero mwamire mono; na inwe namobe aborokigwa baane.
Ⅸ Buna Tata anyanchete inche, na inche nabanchire inwe, menya ase obwanchani bwane.
Ⅹ Komorabwate amachiiko aane, namomenye ase obwanchani bwane, buna inche nabwatete amachiiko a Tata one na komenya ase obwanchani bwaye.
Ⅺ Aya nabateebirie, erinde omogooko one obe ime yaino, naende ng’a omogooko oino oikeranigwe.
Ⅻ “Richiko riane nario eri: Mwanchane buna nabanchete inwe.
ⅩⅢ Onde tari ore nobwanchani obonene kobua obo, obw’omonto akorua obogima bwaye ase engencho y’abasani baye.
ⅩⅣ Inwe nigo more abasani baane, komorakore aya nabachiikire.
ⅩⅤ Tinkobaroka naende abasomba, ekiagera omosomba tamanyeti eki omonene oye agokora; korende inwe nabarokire abasani, ekiagera onsi aya naigwete korwa ase Tata nabaorokeirie.
ⅩⅥ Tari inwe mwanchorire inche, korende ninche nabachorire inwe, nababekire mogende kwama, okwama kwaino goikaranse; erio rinde rionsi mogosaba Tata ase erieta riane, nigo arabae.
Ense na Omoika bw’ekeene
ⅩⅦ “Aya nabachiikire naro aya: mwanchane.
ⅩⅧ Ense kerabageche, momanyete ng’a yangechire inche etarabagecha inwe.
ⅩⅨ Onye nab’ense mware, anga ense ’yancha abare abaye, korende ekiagera inwe timori ab’ense, otatiga inche nabachorire korwa ase ense, ase ayio ense yabagechire.
ⅩⅩ Inyora ring’ana riria nabateebeetie: Omosomba tari omonene kobua omonene oye. Onye banchandete inche, nabaabachande nainwe; onye babwatete ring’ana riane nabwate neriaino.
ⅩⅪ Korende aya onsi nabaabakorere ase engencho y’erieta riane, ekiagera tibamomanyeti oyontomete.
ⅩⅫ Onye ntachete gokwana nabarabwo, anga tibarenge nebibe, korende bono tibari nogwekengera ase ebibe biabo.
ⅩⅩⅢ Oyongechete inche, nigo amogechete na Tata one.
ⅩⅩⅣ Onye ntakorete emeremo ase bare eye monto onde atakoreti, anga tibabete nebibe, korende bono barorire, naende batogechire inche na Tata.
ⅩⅩⅤ Korende igo riikerane ring’ana eriarigetwe ase amachiiko abo: Nigo bangechete bosa.
ⅩⅩⅥ Korende karache Omokonyi, oyo ndabatomere korwa ase Tata, Omoika bw’Ekeene okorwa ase Tata, ere nambere kirori.
ⅩⅩⅦ Na inwe boigo mwambereire birori, ekiagera korwa omochakano mwarenge amo nainche.