ⅩⅥ
Ⅰ “Amang’ana aya nabateebirie timocha kogochwa.
Ⅱ Nabaabaserie korwa ase chisinagogi; nabo engaki neche ekero onde bwensi arabaite akage ng’a okoreire Nyasae emeremo.
Ⅲ Naende ayio nabaabakorere, ekiagera tibamomanyeti Tata, nonya ninche.
Ⅳ Korende nabateebirie aya, erio engaki eria egocha, moyainyore ng’a inche nabateebeetie.
“Tinabateebeetie aya korwa omochakano, ekiagera narenge amo nainwe.
Ⅴ Korende bono nkogenda nde asare ere oyontomete; gose onde tari ase more okomboria: Ing’ai ogochia?
Ⅵ Korende ekiagera nabateebirie aya, omoichano oichoire chinkoro chiaino.
Ⅶ Korende inche nabateebirie erire ri’ekeene: Nebe buya ase more inche ngende, ekiagera ntagendeti, Omokonyi oria tagocha ase more; korende kondagende, nimotome ase more.
Ⅷ Naende ekero arache ere, naenekerie ense ase amang’ana ’ebibe, naende oboronge, naende ekiina;
Ⅸ ase amang’ana ’ebibe, ekiagera tibanyegeneti inche;
Ⅹ ase amang’ana ’oboronge, ekiagera nkogenda nde ase Tata, gose timokondora naende;
Ⅺ ase amang’ana ’ekina, ekiagera omonene bw’ense eye okoorire kogambigwa.
Ⅻ “Ninde nayande amange atigarete nkobateebia, korende timokonyara koyaremereria bono.
ⅩⅢ Korende ekero arache ere, Omoika bw’Ekeene, nobaraae ase onsi ayare ay’ekeene, ere tagokwana ayare ayaye, korende onsi ayaranyare koigwa nayakwane, naende amang’ana agochi‐gocha nabateebie engencho yaye.
ⅩⅣ Ere nambake inche, ekiagera nabogorie ayare ayane, nabayaorokerie.
ⅩⅤ Onsi ayare aya Tata nayane; ase ayio ngateba ng’a nabogorie ayare ayane, nabayaorokerie.
Yeso ogoakera aborokigwa baye ng’a batigare buya
ⅩⅥ “Nkere ekero egeke, inwe motandore; naende nkere ekero egeke morandore, ekiagera nkogenda nde ase Tata.”
ⅩⅦ Nabo abande baborokigwa baye bagateebania, “Ing’ana ki eri agoteeba: Nkere ekero egeke, inwe motandore; naende nkere ekero egeke morandore; na: Nkogenda nde ase Tata?”
ⅩⅧ Nabo bagateeba, “Ing’ana ki eri agoteeba, ng’a nkere ekero egeke? Titomanyeti eri agokwana.”
ⅩⅨ Yeso akamanya ng’a mbarigetie komoboria, akabateebia, “Inee! Nigo mokoborania inwe ase inwe ase erio natebiire: Nkere ekero egeke, inwe motandore, naende nkere ekero egeke morandore?
ⅩⅩ Ekeene, ekeene, nabateebirie: Inwe namorere na kweng’ereria, korende ense negoke; inwe namoichanigwe, korende ogoichana kwaino nakoonchoke koba omogooko.
ⅩⅪ Omokungu gakobina ase okoibora, nigo are nomoichano, ekiagera ensa yaye yaikire; korende gaikire koibora omwana, tari koinyora obororo bwaye naende, ase engencho y’omogooko bw’okoiborwa kw’omonto ase ense.
ⅩⅫ Nabo nainwe bono nigo more nomoichano; korende nimbarore naende, ne chinkoro chiaino nachigoke, na omogooko oino onde tari orabaure.
ⅩⅩⅢ Ase rituko riria timokomboria ring’ana. Ekeene, ekeene, nabateebirie: Komorasabe Tata kende gionsi ase erieta riane nabae.
ⅩⅩⅣ Goika reero timorasaba gento ase erieta riane; saba, namonyore, erinde omogooko oino obe omoikeranu.
ⅩⅩⅤ “Aya nakwanire nainwe ase emereng’anio; engaki neche ntakwane naende ase emereng’anio, korende nimborokie maiso marore amang’ana a Tata.
ⅩⅩⅥ Ase rituko riria namosabe ase erieta riane; tinkobateebia ng’a nimbasabere ase Tata,
ⅩⅩⅦ ekiagera Tata omonyene nigo abanchete inwe, ekiagera inwe mwanyanchire inche, na mwegenire ng’a inche nigo narwete ase Tata.
ⅩⅩⅧ Narwete ase Tata, ngacha ase ense; naende ngotiga nde ense na nkoirana nde ase Tata.”
ⅩⅩⅨ Aborokigwa baye bakaboora, “Rora, bono ngokwana ore maiso marore, gose tori gokwana omobayeeno onde bwonsi.
ⅩⅩⅩ Bono twamanyire ng’a kwamanyire onsi, torigeti omonto akoborie. Ase ayio twegenire ng’a nigo kwarwete ase Nyasae.”
ⅩⅩⅪ Yeso akabairaneria, “Inee! Igo bono mwegenire?
ⅩⅩⅫ Rora engaki neche, ee nabo yaikire gocha, namwatananeke, kera oyomo ase mwaye, namontige inche bweka, korende tindi inche bweka, ekiagera Tata nigo are amo nainche.
ⅩⅩⅩⅢ Aya nabateebirie, erinde monyare koba nomorembe ime yane. Ase ense namonyore emechando, korende remia emioyo; inche nabuire ense.”