Ⅰ Ekero Yeso akwanete amang’ana ayio akaimokia amaiso aye, akarigereria igoro, akabora, “Tata, ensa yaikire. Mobake Omwana oo, erinde Omwana nere akobake aye, Ⅱ buna kwamoete okobua igoro ase Mwanyabaanto bonsi, erinde bonsi aba kwamoeire, abae obogima bwa kare na kare. Ⅲ Na obogima bwa kare na kare nabwo obo: bakomanye aye Nyasae bw’ekeene bweka, naende Yeso Kristo gwatomete. Ⅳ Inche nakobakire ase ense, emeremo eria kwang’ete gokora nayekoorire. Ⅴ Na bono Tata, ombake inche amo naye, ase obonene boria narenge nabwo amo naye ritang’ani ense etaratongwa.

Ⅵ “Erieta riao nariorokeirie abanto baria kwang’ete korwa ase ense. Barabwo nigo barenge abao, okabang’a inche, ne ring’ana riao baribwatire. Ⅶ Bono bamanyire ng’a onsi aya kwang’ete nigo akorwa ase ore. Ⅷ Naki amang’ana kwang’ete nabayaeire, na barabwo bayabwatire, mbamanyete ekeene ng’a nigo narure ase ore, bakeegena ng’a naye gwantomete. Ⅸ Inche nabasabeire barabwo; tindi gosabera ense, korende barabwo aba kwang’eire ekiagera barabwo nabao. Ⅹ Na bonsi abare abaane nabao, na abare abao nabaane, na inche nabakirwe ime yabo. Ⅺ Inche tinkoba ase ense ime naende, korende aba nao bare ase ense ime, na inche ngocha nde ase ore. Tata Omochenu, obarende ase okobua kw’erieta riao baria kwang’ete, babe abamo buna intwe tore oyomo. Ⅻ +Ekero narenge amo nabarabwo ase ense, nigo nabarendete ase okobua kw’erieta riao baria kwang’ete. Igo nabaritete, gose tari nonya noyomo obo osirire, otatiga oria omwana bw’obosiru, erinde ririiko rinyare goikeranigwa. ⅩⅢ Na bono ngocha nde ase ore, na aya nkoyakwana, inde ase ense ime, erinde omogooko one obe oikeranigwe ime yabo. ⅩⅣ Inche nabaeire ring’ana riao; ense yabagechire, ekiagera barabwo tibari abanto b’ense, buna inche ntari oyo bw’ense. ⅩⅤ Tinsabeti ng’a obarusie korwa ase ense, korende obarende korwa ase oria omobe. ⅩⅥ Barabwo tibari ab’ense, buna inche ntari oyo bw’ense. ⅩⅦ Obachene ase ekeene; ring’ana riao nario ekeene. ⅩⅧ Buna gwantomete inche ime ase ense, na inche naboigo nabatomire barabwo ase ense ime. ⅩⅨ Na ase engencho yabo nechenire, erinde nabarabwo bachenwe ase ekeene.

ⅩⅩ “Gose tari barabwo boka nasabeire, korende na baria baranyegene ase engencho ye ring’ana riabo, ⅩⅪ bonsi babe abamo, buna aye Tata ore ime ase ’nde, na inche ime yao, erinde na aba babe abamo ime yaito; ense enyare kwengena ng’a naye gwantomete. ⅩⅫ Na obonene boria kwang’ete nabaeire, babe abamo, buna intwe tore oyomo; ⅩⅩⅢ inche ime yabo, na aye ime yane, banyare goikerana babe abamo. Igo ense emanye ng’a naye gwantomete, okabancha barabwo, buna kwanyanchete inche. ⅩⅩⅣ Tata, abwo kwang’ete, ninganetie babe amo nainche aase aande onsi inde, banyare korigereria obonene bwane kwang’ete, ekiagera nigo kwanyanchete ritang’ani ense etarabekwa oboroso. ⅩⅩⅤ Tata omonyene oboronge, ense tiyakomanyete, korende inche nakomanyete; na aba bamanyire ng’a naye gwantomete. ⅩⅩⅥ Nabamanyetie erieta riao, naende nimbarimanyie, erinde obwanchani boria kwanyanchete inche bobe ime yabo, na inche imbe ime yabo.”