ⅩⅧ
Okobwatwa kwa Yeso
(Mat 26:47-56; Mar 14:43-50; Luk 22:47-53)
Ⅰ Yeso gakwanire amang’ana aya, akaimoka amo naborokigwa baye kogenda ng’umbu y’akarooche Kedron, aase omogondo orenge. Ere na aborokigwa baye bagasoa aroro.
Ⅱ Na Yudasi, oria omoruete naamanyete aase aria, ekiagera Yeso are kogenda aroro ekero ase ekero amo naborokigwa baye.
Ⅲ Nabo Yudasi gaikire konyora omoganda bw’abarwani, na abarendi baruete ase abakuani abanene na Abafarisai, akagenda aroro ne chitaaya na ebieri, na ebinto bi’esegi.
Ⅳ Nabo Yeso, kamanyete onsi ayagochia komonyoora, akaoroka, akababoria, “Ning’o mokorigia?”
Ⅴ Bakamoiraneria, “Yeso Omonazareti.”
Yeso akabateebia, “Ninche ere.”
Yudasi nere oyomoruete nigo ateneine amo nabarabwo.
Ⅵ Nabo ekero Yeso achia kobateebia, “Ninche ere,” bakairana magega, bagaaka inse.
Ⅶ Akababoria eria kabere, “Ning’o mokorigia?”
Bakaboora, “Yeso Omonazareti.”
Ⅷ Yeso akairaneria, “Naikire kobateebia ng’a ninche ere; nabo onye mokondigia inche, batige aba bagende.”
Ⅸ Erio riikeranigwe ring’ana riria akwanete, “Aba kwang’ete tinsireti nonya noyomo obo.”
Ⅹ Nabo Simioni Petero narenge nomoyio o birende, akayong’usa, agaaka omosomba bw’Omokuani omonene, akamobutora ogoto kwaye gw’okorio. Na omosomba oria erieta riaye nigo are korokwa Maliko.
Ⅺ Erio Yeso agateebia Petero, “Irania omoyio oo ase ekeraano kiaye. Inee! Egekombe eke Tata ang’eire, tinkenywera?”
Ⅻ Abarwani b’esegi amo nomotang’ani obo, na abarendi baria b’Abayahudi bakabwata Yeso, bakamosiba.
ⅩⅢ Erio bakamoira ritang’ani ase Anasi oyorenge ise biara Kayafa, oria orenge Omokuani omonene omwaka oria.
ⅩⅣ Na Kayafa nere oete Abayahudi amang’ana ng’a negwenerete omonto oyomo akwe ase engencho y’abanto.
Petero ogokana Yeso, na Omokuani omonene okomoboria
(Mat 26:59-75; Mar 14:54-72; Luk 22:55-71)
ⅩⅤ Simioni Petero na omworokigwa onde bagatunyana Yeso. Omworokigwa oria onde nigo amanyekanete n’Omokuani omonene, agasoa amo na Yeso ase egoora y’Omokuani omonene,
ⅩⅥ korende Petero agatenena gesieri isiko. Nabo omworokigwa oria onde, oyomanyekanete n’Omokuani omonene agasoka agakwana nomoiseke orenge korenda gesieri, akarenta Petero ime.
ⅩⅦ Erio omoiseke oria orenge korenda gesieri akaboria Petero, “Aye tori oyomo bw’aborokigwa baye omonto oyo?”
Ere agakana, “Tari inche.”
ⅩⅧ Abasomba baria na abarwani nigo barenge bateneine, bautete omorero bw’amakara, ekiagera obokendu mbwarenge, bakaba ngwota bare omorero. Petero nere nigo arenge amo nabarabwo, ogwota omorero.
ⅩⅨ Erio Omokuani omonene akaboria Yeso amang’ana igoro yaborokigwa baye, na amang’ana ’okworokereria kwaye.
ⅩⅩ Yeso akamoiraneria, “Inche nakwanire nense maiso marore. Amatuko onsi nigo narenge kworokereria ase chisinagogi na ase Hekalu, aase Abayahudi bonsi baare gosangererekana, gose tintebeti ing’ana bobisi.
ⅩⅪ Nase ki okomboria? Boria baria baigwete aya nakwanete nabarabwo; barabwo mbamanyete aya nabateebeetie.”
ⅩⅫ Gachia gokwana amang’ana aya, oyomo bw’abarendi baria oteneine ang’e, agaaka Yeso oroe, akabora, “Naboigo okoiraneria Omokuani omonene?”
ⅩⅩⅢ Yeso akamoiraneria, “Onye nakwana bobe, orokia obobe boria, korende onye nakwana buya, ninki okong’akera?”
ⅩⅩⅣ Nabo Anasi akamoira osibire ase Kayafa, Omokuani omonene.
ⅩⅩⅤ Na Simioni Petero nigo arenge oteneine ogwota omorero. Bakamoteebia, “Aye boigo tori oyomo bw’aborokigwa baye?”
Ere agakana, akabora, “Tari inche.”
ⅩⅩⅥ Oyomo bw’abasomba b’Omokuani Omonene, omoamate bw’oria onachetwe ogoto na Petero, akabora, “Inche tinakorooche ime ase omogondo amo nere?”
ⅩⅩⅦ Petero agakana naende. Erio kegima etuoni ekabuga.
Yeso ase obosio bwa Pilato gabana o Rumi
(Mat 27:1-2; 11—14; Mar 15:1-5; Luk 23:1-5)
ⅩⅩⅧ Erio bakaira Yeso korwa ase Kayafa goika enyomba enene y’ekegambero. Bokaba bogokiamoka, na barabwo abanyene tibasoa ime ase ekegambero, tibaabaisa gocha kobekwa ogotacheneka korende bararia Epasaka.
ⅩⅩⅨ Erio Pilato akabachiera isiko, akababoria, “Ngosoera ki mobwate ase omonto oyo?”
ⅩⅩⅩ Bakairaneria, “Onye oyo atarenge omokori amabe, anga titwamorenta ase ore.”
ⅩⅩⅪ Erio Pilato akabateebia, “Moire inwe, momogambie ase ogochika kwaino.”
Abayahudi bakamoteebia, “Intwe titori ne ribaga goita omonto.”
ⅩⅩⅫ Erio ring’ana ria Yeso riikeranigwe, eri akwanete ase okoorokia imakweri ki aranyare gokwa.
ⅩⅩⅩⅢ Erio Pilato agasoa ekegambero naende, akarangeria Yeso, akamobooria, “Inee! Naye omorwoti bw’Abayahudi?”
ⅩⅩⅩⅣ Yeso akairaneria, “Naye gwateebire ayio aye omonyene, gose nabaanto bande bagotebirie amang’ana aya igoro yane?”
ⅩⅩⅩⅤ Pilato akairaneria, “Inee! Inche n’Omoyahudi nde? Abanto b’egesaku kiao na abakuani abanene bakorentire ase ’nde. Inki gwakorete?”
ⅩⅩⅩⅥ Yeso akairaneria, “Oborwoti bwane tibori obw’ense eye. Onye oborwoti bwane mbwarenge obw’ense eye, abasomba baane anga mbandwanerera, tinyara kobekwa ase amaboko ’Abayahudi, korende bono oborwoti bwane tibori obw’aa.”
ⅩⅩⅩⅦ Erio Pilato akamobooria, “Aye nomorwoti rende?”
Yeso akairaneria, “Aye gwateebete ng’a inche nomorwoti. Inche nigo naiboretwe ase engencho y’aya, na ase engencho y’aya, ngacha ase ense, erinde imbe kirori ase ekeene. Kera oyore oyo bw’ekeene nigo akoigwa eriogi riane.”
ⅩⅩⅩⅧ Pilato akamobooria, “Ekeene ngento ki?”
Gakwanire ring’ana eri agachiera Abayahudi isiko eria kabere, akabateebia, “Inche tindochi bobe bonde asare.
ⅩⅩⅩⅨ Korende inwe more nengencho ng’a nabasiborera omonto oyomo ase ekero ki’Epasaka; nabo morigetie mbasiborere Omorwoti bw’Abayahudi?”
ⅩⅬ Erio bagaaka eriogi naende, bakaboora, “Tari oyo, korende Baraba!” Baraba ere nigo arenge omouri.