Ⅵ
Okoragerigwa kw’abaanto chilifu isano
(Mat 14:13-21; Mar 6:30-44; Luk 9:10-17)
Ⅰ Magega ase aya Yeso akagenda ng’umbu y’enyancha ya Galili, nero enyancha ya Tiberia.
Ⅱ Omoganda omonene okamotunyana, ekiagera baroche ebikone abakorerete abarwaire.
Ⅲ Yeso agatiira gochia egetunwa, agaikaransa aroro amo naborokigwa baye.
Ⅳ Na Epasaka, rituko rinene ri’Abayahudi, nigo yarenge ang’e.
Ⅴ Nabo Yeso agachia koimokia amaiso aye, akarora omoganda omonene ogocha asare, akaboria Filipo, “Ng’ai togochia kogora emegati, aba banyare koria?”
Ⅵ Igo amoboretie aya, erinde amoteeme, ekiagera namanyete ere omonyene eki arakore.
Ⅶ Filipo akamoiraneria, “Emegati ye chidinari amagana abere tekobaisana, kera oyomo anyore moke igo.”
Ⅷ Oyomo bw’aborokigwa baye, Anderea, momura omwabo Simioni Petero, akamoteebia,
Ⅸ “Nare aa omosae, obwate emegati etano y’esairi ne chinswe ibere, korende ebi inki biraisane ase abanto abange buna aba?”
Ⅹ Yeso akabora, “Ikaransia abanto.” Mbwarenge aroro obonyansi obonge aase aria. Igo abasacha bagaikaransa, barabwo nigo barenge chilifu isaano.
Ⅺ Yeso akabogoria emegati; kayesesenirie, akagabera abaikaransete; naboigo ne chinswe chiria, koreng’ana buna barigetie.
Ⅻ Kobachia koigota, agateebia aborokigwa baye, “Sangereria ebisamunye biatigaire, gento tigesira.”
ⅩⅢ Nabo bakabisangereria, bagaichoria ebitonga ikomi na bibere ase ebisamunye bi’emegati etano y’esairi, ebiatigaretigwe na baria bariete.
ⅩⅣ Ekero abanto baria bachia korora egekone keria Yeso akorete, bakaboora, “Oyo ekeene nomobani oria orenge gocha ase ense!”
Yeso ogweatanana na gotaara ase enyancha igoro
(Mat 14:22-27; Mar 6:45-52)
ⅩⅤ Nabo Yeso namanyete ng’a mbarigetie gocha komoira, erinde bamobeeke abe omorwoti. Ase ayio akerusanania, akagenda naende egetunwa ere bweka.
ⅩⅥ Rigachia koba mogoroba, aborokigwa baye bagatirimboka gochia nyancha,
ⅩⅦ bakariina obwato ime, bagachaaka kwamboka enyancha kogenda Kapernaumu. Naende omosunte konya obeire, na Yeso konya taracha ase bare.
ⅩⅧ Enyancha egachaaka koimoka ase engencho y’omwaga omonge orenge kogusa.
ⅩⅨ Nabo kabang’usire obwato chimaeli isato gose inye bakarora Yeso ogotaara ase enyancha igoro, ogoika ang’e ase obwato. Erio bakairoka,
ⅩⅩ korende Yeso akabateebia, “Ninche. Timoiroka!”
ⅩⅪ Bagancha komosoyia obwato ime, erio kegima obwato bogaika ase barenge kogenda.
Abanto bakorigia Yeso
ⅩⅫ Ankio yaye omoganda oteneine ng’umbu y’enyancha bakarora ng’a obwato bonde tibwarenge aroro, otatiga boria obomo bwoka, naende ng’a Yeso tasoete ase obwato boria amo naborokigwa baye, korende naborokigwa baye bagendete boka.
ⅩⅩⅢ Korende amaato ande agacha korwa Tiberia ang’e nase aria bariete emegati ekero Omonene ayesesenetie.
ⅩⅩⅣ Ekero omoganda ochia korora ng’a Yeso tari aroro, nonya naborokigwa baye, barabwo abanyene bagasoa amaato ime, bakagenda Kapernaumu, bakorigia Yeso.
Yeso nomogati bw’obogima
ⅩⅩⅤ Goika bagachia komoorora ng’umbu y’enyancha bakamobooria, “Omworokia, indi gwachete aa?”
ⅩⅩⅥ Yeso akabairaneria, “Ekeene, ekeene, nabateebirie: Iga mokondigia, tari ekiagera mwaroche ebikone, korende nekiagera mwariete emegati eria, mokaigota.
ⅩⅩⅦ Timokorera endagera egosareka korende, endagera ekobao goika obogima bwa kare na kare, eye Omwana‐o‐Mwanyabaanto aranyare kobaa, ekiagera Nyasae Tata obekire ekemanyererio kiaye asare.”
ⅩⅩⅧ Nabo bakamobooria, “Ninki togokora tonyare gokora emeremo ya Nyasae?”
ⅩⅩⅨ Yeso akabairaneria, “Eye nero emeremo ya Nyasae, ng’a momwegene ere oyotomirwe nere.”
ⅩⅩⅩ Bakamoteebia, “Mbikone ki ogokora, erinde torore tokwegene? Meremo ki ogokora?
ⅩⅩⅪ Chisokoro chiaito nchiariete mana ase erooro, buna yarigetwe: Nabaete omogati korwa igoro bakaria.”
ⅩⅩⅫ Yeso akabateebia, “Ekeene, ekeene, nabateebirie: Tari Musa obaete omogati oria orwete igoro, korende n’Tata one ore kobaa omogati bw’ekeene okorwa igoro.
ⅩⅩⅩⅢ Naki omogati o Nyasae noria ogoika korwa igoro na koa ense obogima.”
ⅩⅩⅩⅣ Nabo bakamoteebia, “Omonene, amatuko onsi otoe omogati oyio.”
ⅩⅩⅩⅤ Yeso akabateebia, “Inche nomogati bw’obogima; ere oyogocha ase ’nde takoigwa enchara nonya ng’ake, na ere oyoranyegene takorang’a nonya ng’ake.
ⅩⅩⅩⅥ Korende nabateebirie ng’a mwandorire, ko timonyegeneti.
ⅩⅩⅩⅦ Bonsi aba Tata akong’a nabache ase ’nde, na ere oyogocha ase ’nde tinkomotuguta isiko nonya ng’ake.
ⅩⅩⅩⅧ Naki naikire korwa igoro, tari ase ogokora ogwancha kwane omonyene, korende ogwancha kwaye oyontomete.
ⅩⅩⅩⅨ Naende ogwancha kwaye Tata oyontomete nakwo oko, ng’a ase bonsi ang’eire tinsiria nonya noyomo, korende mbabokie ase rituko ri’omoerio.
ⅩⅬ Nogwancha kwaye oyontomete nakwo oko, ng’a kera oyokorigereria Omwana na komwegena, nabe nobogima bwa kare na kare, na inche nimobokie ase rituko ri’omoerio.”
ⅩⅬⅠ Abayahudi bakamwemurunganeria, ekiagera ateebete, “Inche nomogati oigete korwa igoro.”
ⅩⅬⅡ Bakaboora, “Oyo tari Yeso, omwana o Yusufu? Ntomanyete ise na ng’ina. Naki rende akobora: Naikire korwa igoro?”
ⅩⅬⅢ Yeso akabairaneria, “Timwemurunganerania inwe ase inwe.
ⅩⅬⅣ Omonto onde tari oranyare gocha ase ’nde, atang’usiri na Tata oyontomete, na inche nimobokie ase rituko ri’omoerio.
ⅩⅬⅤ Nerikire nababani: Bonsi naborokererigwe na Nyasae. Kera oyoigure na kworokererigwa na Tata, nigo agocha ase ’nde.
ⅩⅬⅥ Tari ng’a monto ororire Tata, otatiga ere oyorure ase Nyasae, oyio nere ororire Tata.
ⅩⅬⅦ Ekeene, ekeene, nabateebirie: Ere oyonyegenete inche nare nobogima bwa kare na kare.
ⅩⅬⅧ Inche nomogati bw’obogima.
ⅩⅬⅨ Chisokoro chiaino nchiariete mana ase erooro, na barabwo bagakwa.
Ⅼ Oyo noro omogati oikire korwa igoro ng’a monto onde bwensi orayorie, tagokwa.
ⅬⅠ Inche nomogati bw’obogima oyoigete korwa igoro; omonto kararie omogati oyio, nabe moyo goika kare na kare; na omogati ndarue inche, ase engencho y’obogima bw’ense, nomobere one.”
ⅬⅡ Erio Abayahudi bakaamererania barabwo ase barabwo, bakaboora, “Naki omonto oyo aranyare gotoa omobere oye toyorie?”
ⅬⅢ Yeso akabateebia, “Ekeene, ekeene nabateebirie: Motarieti omobere oye Omwana‐o‐Mwanyabaanto na konywa amanyinga aye, timori nobogima ime yaino.
ⅬⅣ Oyokoria omobere one na konywa amanyinga aane nare nobogima bwa kare na kare, na inche nimobokie ase rituko ri’omoerio,
ⅬⅤ ekiagera omobere one nendagera y’ekeene, na amanyinga aane nekenyugwa gi’ekeene.
ⅬⅥ Oyokoria omobere one na konywa amanyinga aane nigo akomenya ime yane, na inche ime yaye.
ⅬⅦ Buna Tata are moyo antomete, na inche inde moyo ase engencho ya Tata, naboigo oyokondia, nabe moyo ase engencho yane.
ⅬⅧ Oyio nomogati oigete korwa igoro, tari buna chisokoro chiaino chiariete mana, bagakwa; oyorarie omogati oyio nabe moyo goika kare na kare.”
ⅬⅨ Amang’ana aya nigo ayakwanete ase esinagogi, kaare kworokereria aria Kapernaumu.
Abande ase aborokigwa bakaba ne chitang’u‐tang’u
ⅬⅩ Abange ase aborokigwa baye ekero bariigwa, bakaboora, “Ring’ana eri nerikong’u, ning’o oranyare koritegerera?”
ⅬⅪ Ko Yeso akamanya ase omoyo oye ng’a aborokigwa baye bemurunganeirie ring’ana eri, akababoria, “Ring’ana eri ndiabagochire?
ⅬⅫ Naki erabe rende, komorarore Omwana‐o‐Mwanyabaanto okogenda aaria aase arenge ritang’ani?
ⅬⅩⅢ Omoika noro okobeeka obogima, omobere togwenereti gento; amang’ana nabateebirie n’Omoika, naende nobogima.
ⅬⅩⅣ Korende mbare abande ase egati yaino bategeneti.” Naki Yeso amanyete korwa omochakano mbarabi abategeneti, naende ning’o orache komorua.
ⅬⅩⅤ Akabora, “Eke nakio gekogera nabateebia, ng’a omonto onde tari oranyare gocha ase ’nde, otatiga oeirwe na Tata one.”
ⅬⅩⅥ Magega y’ayio abange ase aborokigwa baye bakairana magega, tibamotunyana naende.
Okoorokia gwa Petero igoro ya Yeso
ⅬⅩⅦ Erio Yeso akaboria baria ikomi na babere, “Nainwe boigo morigetie kogenda?”
ⅬⅩⅧ Simioni Petero akamoiraneria, “Omonene! Togende ase ng’o? Aye nore namang’ana y’obogima bwa kare na kare.
ⅬⅩⅨ Na intwe twegenire na komanya ng’a aye naye Omochenu o Nyasae.”
ⅬⅩⅩ Yeso akabairaneria, “Inee! Tinabachorete inwe ikomi na babere, na oyomo oino Saitani?”
ⅬⅩⅪ Nigo akwanete igoro ya Yudasi, omwana o Simioni Iskariota, ekiagera oyo nere orache komorua; na ere noyomo bwa baria ikomi na babere.