Ⅶ
Yeso na bamura bamwabo
Ⅰ Magega ase aya Yeso akaba ogotaara ase Galili; naki tarigetie gotaara ase Boyahudi, ekiagera Abayahudi nigo barenge korigia komoita.
Ⅱ Naende rituko rinene ri’Ebigutu ri’Abayahudi nigo riarenge ang’e.
Ⅲ Bamura bamwabo bakamoteebia, “Imoka korwa aiga, ogende Boyahudi, erinde aborokigwa bao banyare korora emeremo yao ogokora.
Ⅳ Naki monto onde tari ogokora ring’ana bobisi onye ere omonyene origetie komanyekana. Kogokora aya eorokie ase ense.”
Ⅴ Naki nonya mbamura bamwabo tibamwegenete.
Ⅵ Yeso akabateebia, “Ekero kiane tikeraika, korende ekero kiaino botambe nkereo.
Ⅶ Ense tekonyara kobagecha inwe, korende nigo engechete inche, ekiagera inche nkoyeorokia ng’a emeremo yaye nemebe.
Ⅷ Genda inwe abanyene ase rituko rinene; tindi gotiira gochia ase Rituko Rinene, ekiagera ekero kiane tikeraika.”
Ⅸ Agachia gokoora kobateebia aya, agatigara Galili.
Ⅹ Goika ekero abamwabo bachia gotiira, nere boigo agatiira gochia ase Rituko Rinene, tari maiso marore, korende ase bobisi.
Ⅺ Nabo Abayahudi bakamorigia ase rituko erio bakobora, “Ng’ai are oyio?”
Ⅻ Okwemurungania okonene gokaba ase egati y’omoganda ase engencho yaye. Abande bakaboora, “Nigo are omonto omuya,” na abande bakaboora, “Taibo, korende nigo agotantania omoganda.”
ⅩⅢ Korende omonto tari omwatorete maiso marore ase engencho y’okoiroka Abayahudi.
Yeso okworokereria agwo Yerusalemu ng’a ere nigo arwete ase Nyasae
ⅩⅣ Goika egachia koba gati‐gati ye Rituko Rinene Yeso agatiira, agasoa Hekalu ime akorokereria.
ⅩⅤ Abayahudi bagakumia ase aya, bakaboora, “Naki amanyete chisemi, na ere tasometigwe?”
ⅩⅥ Yeso akabairaneria, “Okworokereria kwane tari okwane, korende nokwaye ere oyontomete.
ⅩⅦ Omonto karanche gokora ogwancha kwaye, namanye gose okworokereria oko nigo gokorwa ase Nyasae, gose nigo ngokwana ase okobua kwane omonyene.
ⅩⅧ Ere oyogokwana ase okobua kwaye omonyene nigo akorigia obonene bwaye omonyene; korende ere oyokorigia obonene bw’oria omotomete, nigo are oyo bw’ekeene, na asare obong’ainereria tiboiyo.
ⅩⅨ Inee! Musa tabaete amachiiko? Korende onde oino tari oyobwatete amachiiko. Nase ki mokorigia kong’ita?”
ⅩⅩ Omoganda okairaneria, “Nore nekerecha! Ning’o okorigia kogoita?”
ⅩⅪ Yeso akabairaneria, “Nakorete ogokora okomo, na inwe mwensi nigo mogokumetie.
ⅩⅫ Musa akabaa okwaroka (tari ng’a nigo korwete ase Musa, korende ase chisokoro chiaino), na inwe nigo mogosara omonto ase rituko ri’Esabato.
ⅩⅩⅢ Gaki onye omonto okwarokigwa rituko ri’Esabato, erinde amachiiko a Musa tasareka; naki mokombea ekiagera nakora omobere bwonsi bw’omonto koba omogima kegima rituko ri’Esabato?
ⅩⅩⅣ Timogamba ekiina ase engencho y’ekieni, korende nacha ekiina ase oboronge.”
ⅩⅩⅤ Abande ase abanto ba Yerusalemu bakaboora, “Oyo tari ere omonto oria bakorigia goita?
ⅩⅩⅥ Nao are aa gokwana maiso marore gose tibari komoteebia ing’ana? Aande gose abanene bamanyire bori ng’a nere Kristo?
ⅩⅩⅦ Na oyo twamomanyire aase arure, korende Kristo karache, onde tari oramanye aase akorwa.”
ⅩⅩⅧ Erio Yeso agaaka eriogi riaye ase Hekalu ime, okworokereria, okobora, “Inche momanyete, na aase narure mwaamanyire, naende tinyerenteti inche omonyene, korende ere oyontomete noyo bw’ekeene, oyio motamanyeti inwe.
ⅩⅩⅨ Korende inche nimomanyete, ekiagera naruete asare, nere ontomire.”
ⅩⅩⅩ Igo bakarigia komobwata, korende onde tari oramborete okoboko kwaye, erinde amobwate, ekiagera ensa yaye konya teraika.
ⅩⅩⅪ Abanto abange ase omoganda bakamwegena, bakaboora, “Inee! Kristo ekero arachiche nakore ebikone ebinge mono kobua ebi iga oyo akorire?”
ⅩⅩⅫ Abafarisai bakaigwa omoganda okwemurungania igoro yaye. Erio abakuani abanene na Abafarisai bagatoma abarendi erinde bamobwate.
ⅩⅩⅩⅢ Erio Yeso akabora, “Nkere ekero egeke inde amo nainwe, erio ningende asare ere oyontomete.
ⅩⅩⅩⅣ Namondigie, korende timokonyoora; na aase ndabe inche, timokonyara gochao.”
ⅩⅩⅩⅤ Nabo Abayahudi bagateebania barabwo ase barabwo, “Oyo ng’ai aragende goika intwe titomonyoora? Nigo aragende ase Abagiriki abwo abaatananekire na kworokereria Abagiriki abwo?
ⅩⅩⅩⅥ Ing’ana ki erio akwana: Namondigie, korende timokoonyora, na aase ndabe inche, timokonyara gochao?”
Amache are moyo
ⅩⅩⅩⅦ Nase rituko ri’omoerio, Rituko riria Rinene, Yeso agatenena, agakwana neriogi rinene akabora, “Onye omonto ore nerang’o, tiga ache ase ’nde anywe!
ⅩⅩⅩⅧ Oyonyegenire inche, buna amariiko agoteeba, chindooche chi’amaache are moyo nachirue ase enkoro yaye.”
ⅩⅩⅩⅨ Ring’ana eri nigo arikwanete igoro y’Omoika, ekiagera baria bamwegenire nabayonyore magega, ekiagera Omoika Omochenu konya toraruegwa, ekiagera Yeso konya taraegwa obonene.
ⅩⅬ Nabo abanto bande ase omoganda bagachia koigwa amang’ana ayio, bakaboora, “Oyo ase ekeene nomobani oria.”
ⅩⅬⅠ Abande bakaboora, “Oyo nere Kristo.” Korende abande bakaboora, “Inee! Kristo nigo ararwe Galili?
ⅩⅬⅡ Ririko tiriri goteeba ng’a Kristo nigo ararwe ase oroiboro rwa Daudi, naende ase Bethlehemu, agachie karia Daudi amenyete?”
ⅩⅬⅢ Erio ogwatananekana kogasoa ase omoganda ase engencho yaye.
ⅩⅬⅣ Abande ase barabwo bakarigia komobwata; korende monto onde taramborete okoboko kwaye erinde amobwate.
ⅩⅬⅤ Abarendi baria bakairana ase abakuani abanene na Abafarisai, na barabwo bakababoria, “Naki motamorenta?”
ⅩⅬⅥ Abarendi baria bakairaneria, “Tana gokwana monto onde bwensi buna oyo agokwana!”
ⅩⅬⅦ Erio Abafarisai bakabairaneria, Inee! Nainwe boigo mwatantanigwe?
ⅩⅬⅧ Ning’o ase abanene baito omwegenire, gose ase Abafarisai?
ⅩⅬⅨ Korende omoganda oyio, otamanyeti amachiiko, oragererigwe.
Ⅼ Nikodemo, oria omochierete botuko, oyorenge oyomo ase bare, akababoria,
ⅬⅠ “Inee! Ogochika gwaito nkonachera kore omonto ekiina ritang’ani totaramoigwa na komanya egiakora?”
ⅬⅡ Bakairaneria, “Inee! Naye boigo Galili kwarwa? Rigia, orore ng’a mobani takorwa Galili.”
[
ⅬⅢ Bakagenda kera omonto bwoye.