Ⅻ
Yeremia okobori’Omonene na okoiranigwa
Ⅰ Aye Omonene, ekero nkoamererania naye,
nigo okonyorekana kore omonyene oboronge.
Nonya nabo, ngokwana inde naye igoro y’amang’ana ’oboronge.
Nase ki chinchera chi’abakori amabe chikoba nogosesenigwa?
Nase ki abanto abang’ainereria bagendererete koba buya?
Ⅱ Aye kwabasimekire, nabarabwo bairire emeri inse.
Nigo bagokina, naende baama.
Barabwo nigo bakomanyete ase emenwa yabo rioka,
korende chinkoro chiabo nigo chire aare naye.
Ⅲ Korende aye Omonene nomanyete inche,
nigo ondoche, na nigo ogoteema ebirengererio biane gose mbire asore.
Barusieo abwo ababe buna ching’ondi chigochia konyenywa,
obabeeke ensemo baganye rituko bagochia konyenywa.
Ⅳ Ngoika ririri ense erabe ekorera,
na obonyansi bw’ebitii bobe bogendererete kwoma?
Ching’iti ne chinyoni chiasirigwe
ase engencho y’obobe bw’abaanto bamenyeteo,
abwo bagoteeba: “Omonene takorora amatuko aito ay’omoerio.”
Ⅴ “Onye gokorosa ase okoamererania nabaanto bakominyoka namagoro,
naki rende oranyare gochia koamererania ne chibarasi chikominyoka?
Na onye gokogwa ekero omenyete ase ense ere nomorembe,
naki orakore ase amanani amanoru a Yorodani?
Ⅵ Nonya nabamino, abanto b’eamate ya iso,
babeire abang’ainereria asore,
nigo bagokuura korwa magega yao.
Nabaisa gokwana amang’ana amaya asore,
tobaisa kobegena.”
Omonene ore nomoichano ase engencho y’abanto baye
Ⅶ “Inche natigire abanto baane,
natigire abanto bare omwando one.
Nabekire abanchwa baane ase amaboko ’ababisa babo.
Ⅷ Abanto bare omwando one babeire buna endo ere ase rinani.
Baakire amariogi abo mamincha yane.
Ase engencho eyio nabagechire.
Ⅸ Inee! Abanto bare omwando one nigo babeire buna enyoni ere enkanga
ekorigia endagera eetananire ne chinde chire ase orotwari?
Genda osangererie ching’iti chi’orosana chionsi chiche koria!
Ⅹ Abarisia abange basaririe omogondo one bw’emesabibu,
batiringeire inse omogondo one.
Bakorire omogondo one oyorenge kongokia
ogwekanire buna erooro ere bosa.
Ⅺ Bayotigire ore bosa,
na ekiagera otigirwe ore bosa, nkorera ore ase ’nde.
Ense yonsi yabeire erooro,
korende omonto tari okorengereria amang’ana ayio.
Ⅻ Abasaria batiirire gochia ase ebigoro bi’erooro.
Omoro bw’Omonene nigo ogoita na gosaria
korwa ensinyo eyemo y’ense goika ensinyo ende.
Onde tari omenyete nomorembe.
ⅩⅢ Babusuire engano, korende mbagese amagwa.
Babeire bakwerosia ase emeremo, korende tibanyoreti ebitoki.
Mwanyorire obosooku ase ogotanyora rigesa,
ekiagera Omonene abeire nendamwamu enene ase more.”
Eira y’Omonene ase abagisangio b’Abaisraeli
ⅩⅣ Aya nar’Omonene agoteeba igoro y’abagisangio baane ababe, abwo bagosaria omwando oria naeire Abaisraeli: “Nimbarusie barue ase ense yabo, naende nindusie Abayuda barue ase egati yabo.
ⅩⅤ Na magega y’ayio, ekero nabarusirie ase ense eyio, nimbarorere amaabera naende, mbairanie naende kera omonto ase omwando oye, na ase ense yaye.
ⅩⅥ Onye ekero ekio abanto abwo bakweorokereria chinchera chi’abaanto baane, na gotiana ase erieta riane, bagoteeba: Ekeene, buna Omonene are moyo, buna abwo kare borokereretie abanto baane gotiana ase erieta ri’enyasae Baali, erio nario ndabasesenie na kobairaneria amaya abo, ase egati y’abanto baane.
ⅩⅦ Korende onye egesaku kende gionsi kegochia kwanga konyigwera, rirorio ninkerusieo ngesirie kegima. Ninche Omonene nakwanire.”