ⅩⅢ
Okworokereria korwa ase orokini rw’egatani
Ⅰ Aya nar’Omonene antebirie: “Genda ogore orokini rw’egatani orobeke kenema kiao, korende tobaisa korotobeka ase amaache.”
Ⅱ Ase ayio, nkagora orokini buna Omonene achigeete, nkeboeria kenema kiane.
Ⅲ Ring’ana ri’Omonene rigacha ase ’nde eria kabere, riganteebia,
Ⅳ “Imokia orokini orwo kwagora, obegete kenema, ogende goika orooche rw’Eufarati, orobise ase omwenya bw’egetare ime.”
Ⅴ Nkagenda nkarobisa aase agwo buna Omonene achigeete.
Ⅵ Magega y’amatuko amange gaetire Omonene aganteebia, “Imoka ogende goika Eufarati, orusie orokini roria nagochigeete ng’a orobise aroro, ororente aa.”
Ⅶ Nkagenda goika Eufarati, ngakunya aase narobisete, nkarorusia, nkanyora rwasarekire kegima na rororwo tirwagwenerete kende gionsi.
Ⅷ Erio ring’ana ri’Omonene rigacha ase ’nde naende, riganteebia,
Ⅸ “Aya nar’Omonene agoteeba: Ase enchera eyio nabo inche ndasarie oboenenu bw’Abayuda na oboenenu obonene mono bw’abaanto ba Yerusalemu.
Ⅹ Abanto aba abanyabibe bangire koigwera amang’ana aane; babwatirie ebirengererio bie chinkoro chiabo chi’oboenenu, batunyanire chinyasae ching’ao, naende nachio bagokorera na gochisasiima. Ase ayio nababe buna orokini orwo rore bosa, rotagwenereti kende gionsi.
Ⅺ Buna orokini rokweboerigwa rokwomerera omobere bw’omonto, naboigo nakorete abanto bonsi b’Abaisraeli na bonsi b’Abayuda, erinde banyomerere, babe abanto baane na korenta ogotogigwa na ogosika ase erieta riane, korende barabwo tibanyigwerete. Nabo inche Omonene ngoteeba.”
Omoreng’anio bw’ekeguru ki’edivai
Ⅻ Omonene aganteebia, “Aye, kwana nabarabwo, obateebie: Aya nar’Omonene, Nyasae bw’Abaisraeli, agoteeba: Kera ekeguru nageichorigwe nedivai. Barabwo nigo barakoiranerie ng’a mbamanyete buya kegima ng’a kera ekeguru nigo kegoichorigwa edivai.
ⅩⅢ Erio obateebie: Aya nar’Omonene agoteeba: Nintindie abanto bonsi bamenyete ase ense eye, amo nabarwoti bare ase ekerogo ki’oborwoti gia Daudi, na abakuani, na ababani, na abanto bonsi ba Yerusalemu.
ⅩⅣ Nimbatwomanie omonto ase omonto. Nintwomanie abaise na abana babo abamura, gose tinkobarorera amabeebe gose amaabera ande onsi ng’a timbaita.” Nab’Omonene atebiire.
Yeremia ogokuurera abare abaenenu
ⅩⅤ Inwe igwa, motegerere; timobaisa koenena,
ekiagera Omonene nere okwanire.
ⅩⅥ Motogie Omonene, Nyasae oino,
ritang’ani ataraarenta omosunte
nainwe mogochwe amagoro,
ekero rikogoroba ase ebitunwa.
Ase engaki eria morabe mosemeretie konyora oborabu,
naonchore oborabu obwo bobe obomwamu
na abokore bobe omosunte omonene.
ⅩⅦ Korende onye timogotegerera,
inche nindere bobisi ase engencho y’oboenenu bwaino.
Nindere nobororo obonge,
na amariga amange aiteke korwa ase amaiso aane,
ekiagera riicho ri’Omonene rioosirwe na koirwa ase obosomba.
ⅩⅧ Omonene aganteebia, “Teebia omorwoti na ng’ina bekeyie babe abaitongo ekiagera chigutwa chiabo chingiya chiarusigwe ase emetwe yabo.”
ⅩⅨ Emechie y’ensemo ya Irianyi yasiekirwe ebiita biaye, monto onde takobiigora. Abayuda bonsi boosirwe bairirwe ase obosomba, bairirwe kegima.
ⅩⅩ Imokereria amaiso aino igoro, rora abanto baria bagocha korwa sugusu. Inee! Ng’ai rire riicho riria rigiya kwaetwe?
ⅩⅪ Ninki oratebe ekero abanto abwo gwakorire koba abasani bao barabe abatang’ani igoro asore? Inee! Tokoba nobororo obonene buna obw’omokuungu okobina aibore?
ⅩⅫ Oise kweboria ase enkoro yao ime ng’a nase ki amang’ana ayio agocheire, manya ng’a nase engencho y’ebibe biao ebinene. Ebibe ebio biagerire chianga chiao chiasiorigwe na obogetirianda bwao bwarorekanire.
ⅩⅩⅢ Inee! Omoetiopia nanyare koonchora ekieni kie risankwa riaye, gose engo nenyare koonchora amatonto aye? Onye naboigo, inwe aba mwanarire gokora ebibe rirorio monyare gokora amaya.
ⅩⅩⅣ Nimbasiarere buna omoiriro ogosiarerwa nomwaga korwa ase erooro.
ⅩⅩⅤ Omonene nigo agoteeba iga: Eke nakio kerabe egetari kiaino ndabae, ekiagera mwanyebire na mwasemeirie amang’ana ’oborimo.
ⅩⅩⅥ Inche omonyene nimbasiorie chianga chiaino chiike amasio aino igoro, erinde obogetirianda bwaino bororekane.
ⅩⅩⅦ Narorire okogechia kwaino, na obonyaka bwaino obobe, na obotomani bwaino. Narorire ng’a timwarenge abegenwa ase ’nde, nigo mwasasimete chinyasae ching’ao ase ebigoro bire ase ebitii. Aye Yerusalemu, obobe nobwao! Nengaki eng’ana naki oraire otarachenwa?