ⅩⅣ
Eguru‐gura y’ogokumia
Ⅰ Ring’ana eri ri’Omonene rikamocheera Yeremia. Omonene akamoteebia igoro y’eguru‐gura:
Ⅱ “Ense y’Abayuda nkorera ere,
na ebiita biaye biatagoirwe, biagure inse.
Abanto b’ense eyio baiyerigwe inse, nkweumia bare,
ekerero ki’abaanto ba Yerusalemu giaikire igoro.
Ⅲ Abanto abanene nigo bagotoma abasomba babo bagende korenta amaache,
bagoika ase chinsoko, banyora amaache taiyo;
bairana ne chinyongo chire bosa.
Nigo bagosookigwa na gokwa emioyo, baba batubete emetwe yabo.
Ⅳ Ekiagera embura teri gotwa ase ense,
ne riroba riomire pa,
abaremi barorire obosooku
na gotuba emetwe yabo.
Ⅴ Chingabi chire orosana
nigo chigotiga chimanwa chiabo ching’are chire chioka,
ekiagera obonyansi bwaborire.
Ⅵ Chitigere chi’orosana nigo chigotenena ase ebigoro igoro,
nigo chikoeyana bwango buna chisese chi’orosana.
Amaiso abo agoyanire ekiagera ebimeri biasirire.”
Ⅶ “Aye Omonene, nonya ebibe biaito bigotosoera,
otokonye ase engencho y’erieta riao;
twairanire magega ara aange,
twakorire ebibe asore.
Ⅷ Aye oyore ogosemeria kw’Abaisraeli,
na Omotooria obo ase engaki y’emechando,
nase ki aye okoba buna omomenyi ase ense eye,
buna omoeti okogobera arigie aase araare ase obotuko bwoka?
Ⅸ Nase ki aye okoba buna omonto otantanigwe,
buna oyore nokobua, korende otanyare gotooria?
Korende nonya naboigo, aye Omonene nigo ore ase egati yaito,
naintwe nigo tokorokwa ase erieta riao;
tobaisa gototiga.”
Ⅹ Aya nar’Omonene agoteeba igoro y’abanto aba: “Barabwo nigo banchete okona‐koombogana, tibari gotanga amagoro abo. Ase engencho eyio inche Omonene tinkobanchera, korende goika ing’inyore ebibe biabo, nimbae egesusuro ase ebibe ebio.”
Ⅺ Omonene agankania, aganteebia, “Tobaisa gonsaba ase engencho y’abanto aba ng’a mbasesenie.
Ⅻ Nabaisa kweng’ata, inche tinkoigwa okorera kwabo; gose nabaisa korua ebing’wanso bi’ogosambwa, na okoruegwa kw’endagera, tingwanchera ebinto ebio. Goika mbaite nemioro, na enchara na amarwaire agoita, erinde mbasirie kegima.”
ⅩⅢ Erio inche ngateba, “Aye Omonene, Naama, ababani nigo bagoteebia abanto ng’a tibakorora esegi ekobacheera, gose enchara, ekiagera nkwabarierete eira ng’a omorembe nobe ase ense yabo.”
ⅩⅣ Naende Omonene aganteebia, “Abaabani abwo nigo bakobana oborimo ase erieta riane. Inche tinabatomete, gose tinabachigete, gose tinakwanete nabarabwo. Barabwo nigo bakobaabaanera amaroro ’oborimo, na oboringoria bwa bosa, na obong’ainereria bw’ebirengererio biabo abanyene.
ⅩⅤ Ase ayio inche Omonene nigo ngoteeba igoro ase ababani abwo bakobana goetera ase erieta riane batatomiri nainche: Barabwo nigo bagokwana ng’a esegi na enchara tibikonyara korentwa ase ense eye. Abaabani abwo nabaitwe nemioro, na enchara, goika basirigwe kegima.
ⅩⅥ Abanto baabaaneirwe nababani abwo, mbakwe nenchara, nabaitwe nemioro, batugutwe ase chinchera chia Yerusalemu, na monto onde tari orabatindeke. Abakungu babo, na abana babo, abamura na abaiseke, nabakorwe boigo. Naboigo ndabairanerie amabe abo.”
ⅩⅦ Omonene aganteebia ng’a ntebie abanto abwo ring’ana eri:
“Amariga nigo agoiteka korwa ase amaiso aane obotuko na omobaso,
gose tagokama goiteka,
ekiagera omoiseke oria omwekungi, engencho yaye abanto baane, oakirwe,
bwatirwe chingoma chimbe chitanyare kogwenigwa.
ⅩⅧ Ekero ngosoka gochia ase ebitii,
nigo nkorora ebitondo biaitirwe nemioro,
na ekero ngosoa ase omochie,
nigo nkorora abanto bachandegete nenchara.
Abaabani amo nabakuani nigo bakona‐goetanana,
korende tibamanyeti ense eye bakogenda.”
Abanto bakorera bakomosorora Omonene
ⅩⅨ Inee! Nkwangire Abayuda kegima?
Nigo kwagechire Sayoni?
Nase ki gwatoakire,
na onde tari ogotogwenia?
Nigo twasemeretie konyora omorembe, korende titori koyonyora.
Togasemeria okogwenigwa, korende tokaba nomoondoko.
ⅩⅩ Aye Omonene, twamanyire obobe bwaito
na ebibe bie chisokoro chiaito,
twakorire ebibe asore.
ⅩⅪ Ase engencho y’erieta riao, koranche tototuguta.
Totiga ekerogo kiao ki’obonene gechaywe.
Inyora okobwatana kwao kw’ogotianania gwakorete naintwe, gose togosaria.
ⅩⅫ Inee! Emegwekano y’ogosasimwa y’abanto b’ebisaku nenyare korenta embura?
Gose igoro enyene enyare korenta embura?
Inee! Aye Omonene, Nyasae oito, tari aye tosemeretie?
Nigo togosemeretie, ekiagera naye gwakorire aya onsi.