ⅩⅤ
Abayuda bakogambigwa ekiina
Ⅰ Eri’Omonene agakwana nainche, aganteebia, “Nonya Musa na Samweli barenge gotenena ase obosio bwane gonsorora, tinarenge koonchoka indorere abanto aba amaabera. Baserie barue ase obosio bwane, bagende kegima.
Ⅱ Barabwo kobarakoborie ng’a ng’ai bakogenda, obateebie: Aya nar’Omonene agoteeba:
“Abanto baria bagochia gokwa ase oborwaire bogoita, baitwe naborobwo,
na abagochia goitwa nemioro, baitwe nero;
baria bagochia gokwa ase enchara, bakwe nenchara,
na baria bagochia gwoswa, booswe bairwe.
Ⅲ “Inche Omonene nigo nachiikire ng’a amaakwa e chingencho inye nabanyore abasirie: Emioro ebaite, ne chisese chibatandorane, ne chinyoni amo ne ching’iti chi’orosana chibarie na kobasiria.
Ⅳ Ninkore amagambi onsi are ase ense aichanigwe na koondoka ase amang’ana arabanyore ase engencho y’obobe obwo Manase, mosinto bwa Hezekia, omorwoti bw’Abayuda, akorete agwo Yerusalemu.
Ⅴ “Inwe abanto ba Yerusalemu, ning’o orabarorere amabeebe,
gose abechandere,
gose oraonchoke gocha ase more,
baborie amang’ana aino?
Ⅵ Omonene nigo agoteeba iga:
Inwe abanyene mwanyangire,
mwairanire magega, mwantigire.
Ase engencho eyio naramboire okoboko kwane kobasiria kegima,
ekiagera narosire ase okobarorera amaabera.
Ⅶ Inche nabasongire ase emechie yonsi y’ense yabo.
Naitire abana babo;
nasiririe abanto baane,
ekiagera tibang’onchokereti batige chinchera chiabo.
Ⅷ Abakungu ababoraka batigaire
abange mono kobua omokenye o nyancha;
narentire abaiti baitire abamura mobaso gati
na batigire abang’ina bare bosa;
narentire obororo na omoondoko
gocha igoro ase bare mobosokano.
Ⅸ Nonya nomokuungu oiborete abana batano na babere,
nigo akogireka ase omoichano;
erioba ri’obogima bwaye riagure kobore mobaso,
osookigwe na goichanigwa.
Nindue abatigari baitwe nemioro y’ababisa babo”.
Nab’Omonene atebiire.
Yeremia okorera ase Omonene
Ⅹ Obobe nobwane! Ninki kiagerete baba akanyibora? Nigo inde omonto okwomanigwa, nigo nkoamereranigwa ase ense eye yonsi. Tinana koa omonto onde egento singo, gose koegwa singo nonde, erinde inyore ebitoki, korende kera omonto nigo akondagereria.
Ⅺ Omonene oteebire: “Ekeene, ninkobeke chinguru, ngosesenie. Ase engaki y’emechando nimbetererie ababisa bao batung’ame ase obosio bwao.
Ⅻ Inee! Omonto nanyare kobuna ekioma, ekio gekorwa sugusu, gose etai?
ⅩⅢ “Obotenenku ne chinibo chiaino nimbirue bibe ebisakorwa, tibigoakanwa, ekiagera mwakorire ebibe ebinge ase ense yaino yonsi.
ⅩⅣ Nimbakore mobe abasomba mokorere ababisa baino ase ense inwe motamanyeti, ekiagera endamwamu yane nigo ere buna omorero outirwe, noro nosambe kogenderera botambe.”
ⅩⅤ “Ee, Omonene, nomanyete buya; ong’inyore, onkonye na konduseria egesiomba ase baria bagonchanda. Aye nomoremereria ore, tobaisa kondusiao. Nomanyete ng’a ase engencho y’erieta riao nachayirwe na gokorerwa bobe.
ⅩⅥ Ekero nanyorete amang’ana ao, ayio nigo abeete endagera yane, ee, amang’ana ao agaichoria enkoro yane nomochengo, akangokia, ekiagera inche nigo nkorokwa ase erieta riao, aye Omonene, Nyasae bw’Emeganda.
ⅩⅦ Tinaikaransete amo nekeombe ki’abaanto banchete esekererio, gose tinegogetie ase kende gionsi ekebe. Nigo nabeete ngoikaransa ao inche bweka, ekiagera okoboko kwao kwanditoerete, aye kwang’ichoirie nekeririanda.
ⅩⅧ Nase ki obororo bwane bogendererete botari koera, na amaote aane atari kogwena? Inee! Aye nigo okoba ase ’nde buna akarooche ntasemereti, akwo amaache aye agokama?”
ⅩⅨ Ase ayio, aya nar’Omonene agoteeba: “Aye korairane, ninkoe ribaga ong’iranere, naye notenene ase obosio bwane. Aye korakwane amang’ana amaronge, na tari amang’ana atari nengencho, rirorio nobe ribaga ri’omonwa one. Abanto abwo mbakoiranere aye, korende aye tokobairanera barabwo.
ⅩⅩ Inche ningokore obe orwaki orokong’u rw’etai ase abanto aba. Barabwo mbakorwanie esegi, korende tibagokobua, ekiagera inche nigo inde amo naye, noboseemia na kogotooria. Nabo inche Omonene natebiire.
ⅩⅪ Ninkorusie nkorusie ase amaboko ’abakori amabe na korwa ase abanto abatindi.”