ⅩⅦ
Ebibe na egesusuro ki’Abayuda
Ⅰ “Ebibe bi’Abayuda nigo birikire nekaramu y’ekioma, na komang’erwa ne rigena rikong’u rikorokwa alimasi, ase chinkoro chiabo ime, na ase emegwekano ye ching’unchara ere ase ebisasimero biabo.
Ⅱ Naboigo abana babo nigo bagendererete gosasiima ase ebisasimero biabo, na ase emete yabo y’Asera, enyasae yabo enkungu, na ase emete emebese, na ase ebigoro ebitambe,
Ⅲ na ase ebitunwa bire ase egetii aarabu. Nindue obotenenku bwaino ne chinibo chiaino, bisakorwe biirwe, na nigo moegwe egesusuro ki’ebibe biaino mwakorire ase ense yaino yonsi.
Ⅳ Ase ayio namotige omwando oyo nabaete, na inche mbatige mokorere ababisa baino ase ense inwe motamanyeti, ekiagera endamwamu yane nigo ere buna omorero outire, nosambe kogenderera botambe.”
Amang’ana ao ao ay’Omonene
Ⅴ Aya nar’Omonene agoteeba:
“Oragererigwe omonto oyo osemeretie Mwanyabaanto
na kwegena chinguru chia Mwanyabaanto,
oyio okoonchoka ase enkoro yaye ontiga inche Omonene.
Ⅵ Omonto oyio nigo anga buna egetutu ki’erooro kiomire,
takorora amang’ana ande onsi amaya akomocheera.
Namenye aase aomo agwo ase erooro,
ase ense ere nomonyoo etamenyiri na onde.
Ⅶ “Nasesenirie omonto oria omosemeretie Omonene,
ekiagera Omonene nere ogosemeria kwaye.
Ⅷ Omonto oyio nigo anga buna omote osimekire ase orooche mbarabare,
na emeri yaye nigo ekoranda gochia ase orooche ime.
Omote oyio tori kwoboa eguru‐gura,
ekiagera amato aye nigo akogenderera koba amabese;
tori gochandeka ase engencho y’eguru‐gura,
tori gotiga kwama okwama kwaye.
Ⅸ “Enkoro nigo ere eng’ainereria mono goetania ebinto bionsi,
na nigo ere ensareku kegima.
Ning’o orayemanye buna ere?
Ⅹ Inche Omonene nigo nkoriga‐rigia ebirengererio bia Mwanyabaanto,
na korenga chinkoro chiabo,
erinde ng’ee kera omonto koreng’ana ne chinchera chiaye,
na buna okwama kw’ogokora kwaye kore.”
Ⅺ Omonto okonyora obotenenku ase enchera y’obong’ainereria,
nigo anga buna enkware ekoraarera amagena etabiareti.
Obotenenku obwo nigo bogosira korwa asare gaikire obogima bwaye gati,
ase omoerio oye nigo agotigara ore omoriri.
Ⅻ Aase Hekalu yaito Enchenu ere,
nao agwo ekerogo ki’obonene kiabegetwe korwa omochakano.
ⅩⅢ Aye Omonene ore ogosemeria kw’Abaisraeli,
abanto abwo bagotigire nigo banyorire obosooku;
ee, abwo baonchokire na kogotiga
nigo barasire buna ririiko ririikire ase riroba,
ekiagera bagotigire aye Omonene ore ensoko y’amaache are moyo.
Yeremia okobori’Omonene ng’a akonywe
ⅩⅣ Aye Omonene, ingwenie, nainche ningwene; intoorie, nainche nintooreke, ekiagera naye ngotogia.
ⅩⅤ Rora, abanto nigo bakomboria: “Ng’ai ring’ana ri’Omonene rire? Tiga riikeranigwe.”
ⅩⅥ Omonene, tinana gotiga koba omorisia gose gotiga kogotunyana, gose tinana kogania ng’a rituko ri’ogosiria richiche. Omonene, nomanyete amang’ana ayio. Aya nakwanete nigo akwanetwe ase obosio bwao.
ⅩⅦ Tobaisa kong’ondokia, ekiagera naye ore obotamero bwane ase rituko ri’emechando.
ⅩⅧ Abanto abwo bagonchanda tiga barenterwe obosooku, korende inche timbaisa korenterwa obosooku. Barabwo tiga baichanigwe, korende inche ting’ichanigwa. Rituko ri’emechando tiga richiche igoro ase bare, basirigwe nogosirigwa ara kabere.
Okorenda Esabato
ⅩⅨ Aya nar’Omonene antebetie: “Genda otenene ase Egeita ki’Abaanto, agwo ase abarwoti b’Abayuda bagosoera na gosokera, naende ase ebiita binde bionsi bia Yerusalemu,
ⅩⅩ obateebie iga: Inwe abarwoti b’Abayuda na inwe Abayuda mwensi, na inwe mwensi aba Yerusalemu, aba mogosoera ebiita ebi, igwa ring’ana ri’Omonene.
ⅩⅪ Aya nar’Omonene agoteeba: Onye moganetie gotooria obogima bwaino, mwerende, timobaisa kobogoria egurube ende yonsi ase rituko ri’Esabato, gose koyesoyia ase ebiita bia Yerusalemu ase rituko erio.
ⅩⅫ Rituko ri’Esabato timobaisa gosokia egurube ende yonsi korwa ase chinyomba chiaino na koyebogoria, gose timobaisa gokora emeremo ende yonsi, korende morende rituko ri’Esabato ribe richenu, buna nachigete chisokoro chiaino.
ⅩⅩⅢ Korende barabwo nigo baangete tibaigwerete gose gotegerera; nigo barenge abanyabigoti bikong’u ng’a tibaabaisa koigwa na gwancha amorokererio.
ⅩⅩⅣ “Naende Omonene nigo agoteeba iga: Monyigwere, timorenta egurube ende yonsi ase ebiita bi’omochie oyo ase rituko ri’Esabato; morende rituko ri’Esabato ribe richenu, na timokora emeremo ende yonsi ase rituko erio.
ⅩⅩⅤ Komoranyigwere igo, rirorio abarwoti abarache goikaransa ase ekerogo ki’oborwoti gia Daudi nabasoere ase ebiita bi’omochie oyo. Abarwoti abwo amo nabanene b’oborwoti obwo, na abanto ba Yuda, na aba Yerusalemu, nababe bakoriina ne chibarasi, na abanto nabagenderere komenya ase omochie oyo botambe.
ⅩⅩⅥ Abanto nabachiche korwa ase emechie y’Abayuda, na korwa ase chinsemo chionsi chiaetanaine Yerusalemu, na korwa ase ense ya Benjamini na ense omweya, na korwa ase ense y’ebitunwa, na Negebu. Barabwo mbarente ase enyomba y’Omonene ebing’wanso bi’ogosambwa, na ebing’wanso binde, na okoruegwa kw’endagera, na ubani, na okuruegwa gw’okoiraneria ng’a mbuya mono.
ⅩⅩⅦ Goika monyigwere, erinde morende rituko ri’Esabato ribe richenu, gose timobaisa gosoyia egurube ende yonsi ase ebiita bia Yerusalemu ase rituko erio. Onye timokonyigwera, rirorio inche nintongie omorero ase ebiita bi’omochie oyio, noro nosambe na osirie chinyomba chi’oborwoti chire agwo Yerusalemu, na omorero oyio tokorimigwa.”