ⅩⅧ
Yeremia ore ase enyomba y’omokori chinyongo
Ⅰ Ring’ana rikarwa ase Omonene rigacha ase ’nde inche Yeremia, riganteebia,
Ⅱ “Imoka, otirimboke, ogende ase enyomba y’omokori chinyongo, ningoteebie amang’ana aane.”
Ⅲ Ase ayio nkagenda ngaika ase enyomba eyio y’omokori chinyongo. Ere nigo arenge gokora emeremo ase emesa yaye y’okoroisia chinyongo.
Ⅳ Enyongo y’amaroba arenge koroisia egasareka ase okoboko kwaye. Ase ayio akabomba esike eria naende, akaroisia enyongo ende buna aganetie ebe.
Ⅴ Erio ring’ana ri’Omonene rigacha ase ’nde, riganteebia,
Ⅵ “Inche Omonene nigo ngoteeba iga: Inwe Abaisraeli, Inee, tinkonyara kobakora inwe buna omokori chinyongo oyo akorete? Ee, inwe Abaisraeli, buna koreng’ana esike ere ase okoboko kw’omokori chinyongo, naboigo nainwe more ase okoboko kwane.
Ⅶ Engaki ende yonsi ndakwane igoro y’egesaku, gose oborwoti, ng’a ngochia koborusia inde aroro, mbotagore na kobasiria kegima,
Ⅷ na abanto b’oborwoti obwo nakwanire amang’ana aane igoro ase bare, kobaraonchoke na batige ebibe biabo, na inche ning’onchoke ntige amabe aria nare gochia gokora ase bare.
Ⅸ Na engaki ende yonsi inche ndakwane igoro y’okoagacha na gokinia abanto b’egesaku gose oborwoti,
Ⅹ na abanto abwo kobarakore ebibe ase obosio bwane bange konyigwera, inche ning’onchoke, ntige amaya aria narengereretie kobakorera.
Ⅺ Bono teebia Abayuda na abanto ba Yerusalemu ng’a: Aya nar’Omonene agoteeba: Naama! Nkoroisia inde na nkore emeroberio emebe igoro ase more. Kera oyomo tiga airane atige chinchera chi’obobe, morongeyie chingencho chiaino na ogokora kwaino.
Ⅻ Korende barabwo mbateebe: Ayio namang’ana abosa. Ntoganetie tokore buna torengereretie, kera oyomo nigo arabwatie obomwenu bw’enkoro yaye embe.”
Abanto bakwanga Omonene
ⅩⅢ Ase ayio, aya nar’Omonene agoteeba:
“Boria abanto b’ebisaku
gose bana koigwa amang’ana anga buna ayio.
Abaisraeli, abwo banga buna omoiseke omwekungi,
bakorire amang’ana are amabe mono.
ⅩⅣ Inee! Amagena ’embura a Lebanoni ana koruao atige ebitare bia igoro?
Gose ebirooche bikorwa ase ebitare biana koborwa amaache amakendu?
ⅩⅤ Korende abanto baane banyebire,
basambire ubani ase emegwekano bagosasiima.
Ase ayio bagochirwe na kogwa ase chinchera chiabo,
ekiagera batigire goeta ase chinchera chia kare,
baetire ase ebinchera gose tari ase enchera enene.
ⅩⅥ Basaririe ense yabo na koyekora ey’ogoichanerwa,
na ey’ogosekererigwa kare na kare.
Kera omonto ogoeta aroro
nigo agokumia na gosingisia omotwe oye.
ⅩⅦ Nimbaserebanie ase obosio bw’ababisa babo,
buna omwaga o moocha ogoserebania.
Ning’onchoke imbae omogongo,
gose tinkoborokia obosio bwane ase rituko ri’emechando yabo.”
Omoroberio bw’ogoita Yeremia
ⅩⅧ Abanto bagakwana, bagateebania, “Inchuo tokore omooroberio bw’ogoita Yeremia. Ntobwate abakuani, na barabwo tibagotiga gotworokereria, gose abanto abang’aini tibagotiga gotosemia, gose ababani tibagotiga gotoraareria amang’ana. Inchuo tomosoere titobaisa koigwera amang’ana aye nonya nerimo.”
ⅩⅨ “Aye Omonene, inyigwe, tegerera amang’ana aya ababisa baane bagokwana.
ⅩⅩ Inee! Amaya naakanwe namabe? Abanto bakunyire engoro, erinde basirie obogima bwane. Omonene, ing’inyore buna natenenete ase obosio bwao kobasabera na gokwana amang’ana amaya ase engencho yabo, erinde aye oonchoke na otige endamwamu yao korwa ase bare.
ⅩⅪ Ase ayio, oite abana babo nenchara, orue abwo abanyene babugwe nababisa babo na baitwe nemioro; tiga abakungu babo bakwerwe nabana babo amo nabasaacha babo, batigwe babe ababoraka. Abanto babo abasacha baitwe namarwaire, na abamura babo baitwe nemioro ase esegi.
ⅩⅫ Obarentere abauri mobosokano, erinde ebirero biigugwe korwa ase chinyomba chiabo, ekiagera bakunyire eirima, erinde basirie obogima bwane: babekire oboreba ng’a amagoro aane abwatwe.
ⅩⅩⅢ Korende aye Omonene nomanyete omooroberio obo bw’okong’ita. Tobaisa kobaabera ebibe biabo, gose tobitinyia birue ase obosio bwao. Obatige babugwe ase obosio bwao, obakorere ayio ekero ore nendamwamu.”