Ⅰ Omonene agakwana nainche aganteebia, Genda ogore enyongo korwa ase omokori chinyongo. Ogende nabagaaka b’abaanto, na abagaaka b’abakuani, Ⅱ +goika ase Rikura ria mosinto o Hinomu rire ase Egeita gie Chindogio, na aroro agwo orarie amang’ana inche ndagoteebie, Ⅲ Okwane iga: Inwe abarwoti ba Yuda, na Abayuda mwensi, na abanto ba Yerusalemu, igwa ring’ana ri’Omonene. Aya nar’Omonene bw’Emeganda, Nyasae bw’Abaisraeli, agoteeba: Naama! Nkoreta nde amang’ana amabe mono igoro y’aase aiga, na kera oyomo orayaigwe nigo araichane. Ⅳ Ninkore ayio, ekiagera abanto bantigire na bakorire aase aiga abeire aya atachenegeti ase ogosamba ubani ase chinyasae ching’ao, chiria barabwo, gose chisokoro chiabo, gose abarwoti b’Abayuda, batamanyete, Naende baichoirie aase aiga namanyinga ’abaanto batari na komocha. Ⅴ +Barabwo baagachire aase aimokererete igoro ase enyasae Baali, erinde bayesambere abana babo abamura babe ebing’wanso bi’ogosambwa asere, amang’ana inche ntachigete gose kobateebia, gose amang’ana atana koba ase ebirengererio biane. Ⅵ Naende Omonene oteebire, “Rora, amatuko ngocha are, aase aria atarokwe Tofeti, gose Rikura ria mosinto o Hinomu, korende nigo rirarokwe Rikura ri’Okonyenyera. Ⅶ Na ase aase aiga ninsarie omooroberio bw’Abayuda na obw’abaanto ba Yerusalemu. Nindue abanto b’emechie eyio baitwe nemioro ase obosio bw’ababisa babo na ase amaboko ’abaanto baria bakorigia gosiria obogima bwabo. Nindue emebere yabo ekwete ebe endagera ye chinyoni na eye ching’iti chi’orosana. Ⅷ Ning’onchore omochie oyo osareke kegima, oichanerwe. Kera omonto orabe ogoeta ase egati yaye naichanigwe mono na gokumia ase engencho y’ogosareka kwaye. Ⅸ Nintige abanto barie emebere y’abana babo, abamura na abaiseke, ee, kera omonto narie omobere bw’omogisangio oye ase engaki eyio y’emechando eria ababisa babo na abanto baria bakorigia gosiria obogima bwabo baraarente ase bare.”

Ⅹ “Aye Yeremia, bwate enyongo eye ase amasio ’abaanto abwo moragende komo, Ⅺ obateebie amang’ana aya: Aya nar’Omonene bw’Emeganda agoteeba: Naboigo inche ndakore abanto aba amo nomochie oyo, buna omonto agwata enyongo etanyare koroisigwa naende. Abanto nabatindeke ebitondo biabo agwo Tofeti, goika aase ande abore barabitindeke.” Ⅻ Naende Omonene oteebire: “Naboigo ndakore aase aiga amo nabaanto bamenyeteo, omochie oyo obe buna Tofeti. ⅩⅢ Chinyomba chia Yerusalemu, na echi’abarwoti b’Abayuda, chinyomba chionsi echio igoro ase ebirama biabo abanto basambire ubani ase ogosasiima erioba, na omotienyi, ne ching’enang’eni chionsi chia igoro, naende okoruegwa kw’ebinyugwa biaumoirwe ase chinyasae ching’ao, chinyomba echi nachikorwe chibe echitachenegeti buna Tofeti.”

ⅩⅣ Erio Yeremia akairana korwa Tofeti ase Omonene konya amotomire gochia koraria amang’ana ’obobani obwo; agacha agatenena ase eraaro ye Hekalu y’Omonene, agateebia abanto bonsi: ⅩⅤ “Aya nar’Omonene bw’Emeganda, Nyasae bw’Abaisraeli, agoteeba: Naama! Inche nkorenta inde ase omochie oyo omonene na ase emechie yaye yonsi amang’ana onsi amabe nateebete ng’a nindete, ekiagera abanto nigo bare abanyabigoti bikong’u bangire koigwera amang’ana aane.”