Ⅱ
Oborendi bwa Nyasae ase Abaisraeli
Ⅰ Ring’ana ri’Omonene rigacha ase ’nde, riganteebia:
Ⅱ “Genda orarie ase abanto ba Yerusalemu, obateebie ng’a aya nar’Omonene agoteeba.”
Nainyoire buna kwarenge omwegenwa ekero kwarenge omoke,
buna kwanyanchete ekero kwarenge omoriakari one,
naende buna kwabeete kogontunyana agwo ase erooro,
ense eria etarenge gosimekwa kende kiameo.
Ⅲ Inwe Abaisraeli, nigo mwaatananetwe koba abachenu ase ’nde inche Omonene,
ogotongora gw’okwama kwane.
Abanto bonsi abariete ogotongora okwo nigo banyoretwe n’emechando.
Inche Omonene Nyasae nateebire.
Ebibe bie chisokoro chi’Abaisraeli
Ⅳ Inwe ab’ororeria rwa Yakobo ne chiamate chionsi chi’Abaisraeli, igwa ring’ana ri’Omonene.
Ⅴ Aya nar’Omonene agoteeba:
“Mbobe ki chisokoro chiaino chiaroche ase ’nde,
erinde chigantiga, chikagenda gosasiima emegwekano ere bosa nabarabwo bakaba bosa?
Ⅵ Barabwo tibaboretie:
Inee! Omonene oria otorusetie ase ense ya Misiri, ng’ai are?
Ere nigo atoraaete ase erooro,
ense eria ere enyomo ere namaoromomo,
ense y’eguru‐gura enyomo pa ere ekiriri ki’amakweri.
Ense eria omonto atarenge konyara goeta ase egati yaye,
agwo omonto nonya noyomo atamenyete.
Ⅶ Nkabarenta ase ense y’omoigoto,
monyare kogoka ase okwama kwaye na ebinto biaye ebiya.
Korende ekero mwachete, mogakora ense yane ekaba entwambu,
mogakora omwando one nabaete okaba okogechia.
Ⅷ Abakuani tibaboretie: Ng’ai Omonene are?
Baria barenge kworokereria amachiiko aane, tibamanyete inche;
abagaambi bagasaria ase ’nde;
ababani bakaba bakobana ase erieta ri’enyasae ekorokwa Baali;
barabwo bagatunyana na gokorera ebinto bitarenge kobakonya.”
Ekiina kia Nyasae ase abanto baye
Ⅸ Omonene oteebire iga:
Inche ningendererete kobagambia inwe ekiina,
boigo ningambie abana baino, na ororeria rwabo.
Ⅹ Amboka gochia ase ebisinka bi’Abakuporo, morore,
gose motome abanto gochia Kedari bauna‐unie buya,
barore gose egento buna ekio kiana gokorekana aroro.
Ⅺ Inee! Gesaku kende kiana koonchoreria chinyasae chiaye,
nonya tichiri echi’ekeene?
Korende abanto baane bang’onchoreirie inche inde obonene bwabo,
banchire egento getari kobakonya.
Ⅻ Inche Omonene nigo ngoteeba iga:
Inwe igoro chionsi, kumia ase ayio,
kabe nobwoba, moiroke na koiguswa!
ⅩⅢ Abanto baane bakorire amabe abere:
bantigire inche inde ensoko y’amaache amaya ay’obogima;
bakunyire ebisima biabo bi’amaache,
ebisima biremogete, bitanyare kogaacha amaache nonya ng’ake.
Aya abanyorete Abaisraeli ekiagera tibabete abegenwa
ⅩⅣ Inee! Abaisraeli nabasomba bare?
Gose nigo baiboretwe bare abasomba?
Onye taibo, nase ki rende abeire buna oy’ogotwarwa?
ⅩⅤ Chindo chiarumire ase bare, chiarumire namariogi amanene;
chirochio chiasaririe ense yabo yabeire erooro;
emechie yabo yabeire amaturi atamenyiri nabaanto.
ⅩⅥ Tari ayio oka, abanto ba Memifisi na aba Tapenesi
batire ebiore biabo.
ⅩⅦ Inee! Tari inwe abanyene mwerenteire emechando eye,
ekiagera mwantigire inche Omonene, Nyasae oino,
ekero naganetie kobaraa ase orogendo rwaino?
ⅩⅧ Ngento ki mogochia konyora ase okogenda Misiri konywa amaache ’orooche rwa Sihori?
Gose inki mogochia konyora ase okogenda Asuri konywa amaache ’orooche rw’Eufarati?
ⅩⅨ Obobe bwaino nabobarentere egesusuro;
okogwa kwaino korwa ase okwegena nkogere motogonyerwe.
Goika momanye na korora ng’a mbobe mono gontiga inche Omonene Nyasae oino na korusia obomanyi bwane ime yaino.
Nabo Inche Omonene, Nyasae bw’Emeganda, nateebire.
Abaisraeli bakwanga gosasiima Omonene
ⅩⅩ Naende Omonene oteebire iga:
“Agwo kare inwe nigo mwerusetie rikorogoto riaino, mokaba mwesiboire,
mogateeba: Titorigeti koba abakoreri ba Omonene.
Igoro ase kera ekegoro egetambe,
na inse ya kera omote omobese,
mogatung’ama mogasasiima chinyasae chinde chi’ense entobu, timwabeete abegenwa ase ’nde.
ⅩⅪ Inche nkabasimeka buna omosabibu omuya,
korwa ase chimbusuro chingiya mono.
Naki rende inwe mwaonchokire na gwesaria,
mwagwekanire omosabibu bw’orosana?
ⅩⅫ Inwe namoisa gwesiberia esabuni ere ne chinguru chi’okorusia riko,
ebimoa bi’okomocha kwaino nigo bigendererete koba ase obosio bwane.
ⅩⅩⅢ Naki inwe moranyare goteeba: Titori abatachenegeti,
timwasasimete Baali?
Rigereria chinchera chiaino ase amakura ime,
inyora na komanya egento mwakorire;
mwabeire buna engamia eaberi ekominyoka gochia aaria na aaria.”
ⅩⅩⅣ Mwabeire buna etigere eaberi y’orosana enarete ase erooro,
ekero ere nokogania nigo ekoeyana mono na gwesesa.
Ning’o oranyare gotanga etigere ase okogania kwaye?
Etigere etuoni ekoyerigia tekwerosia enyene,
ekiagera engaki yaye egoika eganetie erieme neoroke enyene.
ⅩⅩⅤ Renda amagoro aino, timobaisa koba motari nebikoroto,
naende timobaisa koba nerang’o.
Korende inwe nigo mogoteeba: Ayio namang’ana abosa;
nigo twanchete chinyasae chingeni,
na echio chioka nachio torabe tokobwatia.
Abaisraeli mbagwenerete konyora egesusuro
ⅩⅩⅥ “Buna koreng’ana omoibi akoba nobosooku ekero abwatirwe, naboigo n’Abaisraeli bararore obosooku barabwo amo nabarwoti babo, n’Abakuani na abanene b’oborwoti bwabo, na ababani babo.
ⅩⅩⅦ Inwe mwensi abamogoteeba ng’a, omote noro iso, ne rigena nario nyoko, nigo morasookigwe. Ayio nigo arakoreke, ekiagera mwantigire na kong’a amagega; timong’onchorereti amasio aino. Korende ekero more nemechando mwabora: Inchuo ototoorie.
ⅩⅩⅧ “Inwe Abayuda, ng’ai chinyasae chiaino chire, echio mweroiseretie? Tiga chiche, erinde chibatoorie ekero more nemechando, ekiagera buna emechie yaino ere emenge, nabo nachirochio chire chinyinge.
ⅩⅩⅨ Inche Omonene nakwanire iga: Nase ki mokwemurungania ase ’nde? Inwe mwensi mwasaririe ase ’nde.
ⅩⅩⅩ Nkaa abana baino egesusuro, korende tikiabarongeetie. Emioro yaino abanyene egaita ababani baino, buna nigo yarenge endo egoita.
ⅩⅩⅪ Inwe Abaisraeli igwera ring’ana riane, inche Omonene. Inee! Inche nigo nabeire buna erooro ase more? Gose nigo nabeire buna ense y’omosunte ekerima ase more? Nase ki inwe abanto baane mogoteeba ng’a mobwate obosibore, na timorigeti kong’iranera inche?
ⅩⅩⅫ Inee! Omoiseke omwekungi nanyare kweba ebinto biaye bi’ogwechabera? Gose omoriakari nkweba are chianga chiaye chi’enyangi? Korende abanto baane banyebire ase amatuko atakobareka.
ⅩⅩⅩⅢ Imomanyete buya mono korigia abanchi, nonya nabakungu abanyaka begire chinchera chiaino chimbe.
ⅩⅩⅩⅣ Chianga chiano nigo chibwate ebimoa bi’amanyinga ’abaanto abataka batari nokomocha. Ekero mwabaitete timwabanyorete bakobochora chinyomba chiaino, korende nase okogania kwaino mwabaitete.
ⅩⅩⅩⅤ “Nigo mogendererete goteeba: Intwe titori nokomocha, na ase ayio Omonene tari nendamwamu ase tore. Ekiagera mwakanire ng’a timokoreti ebibe, nimbanachere ekiina.
ⅩⅩⅩⅥ Nase ki mokwerosia kobwatia chinchera ching’ao? Inwe mwasookigwe n’Abamisiri buna mwasoogetigwe n’Abaasuri.
ⅩⅩⅩⅦ Nigo morarue ase bare, mwetwegete amaboko ase emetwe, ekiagera Omonene bwangire abanto abwo mosemeretie, rirorio timokonyora ogosesenigwa amo nabarabwo.”