ⅩⅫ
Amang’ana a Yeremia ase enyomba y’omorwoti bw’Abayuda
Ⅰ Aya nar’Omonene agoteeba: “Tirimboka gochia ase enyomba y’omorwoti bw’Abayuda, okwane amang’ana aya:
Ⅱ Aye omorwoti bw’Abayuda oikaransete ase ekerogo ki’oborwoti gia Daudi, aye amo nabasomba bao, na abanto bao mogosoera ebiita ebi, igwa ring’ana ri’Omonene.
Ⅲ Aya nar’Omonene agoteeba: Kora ayare ay’ekeene na oboronge, naende motoorie omonto ourererigwe korwa ase okoboko kw’omochandi oye. Timobaisa gokorera abamenyi ne chintakana bobe, gose ababoraka, gose koba abatindi ase bare, na aase aiga timobaisa goitera amanyinga ’omonto otari na komocha.
Ⅳ Ekeene, komoraigwe ring’ana eri, abarwoti mbagenderere goikaransa ase ekerogo ki’oborwoti gia Daudi, mbabe bagosoera ebiita bi’omochie bariinete chigari ne chibarasi, barabwo amo nabasomba babo, na abanto babo.
Ⅴ Korende onye timokoigwera amang’ana aya, inche omonyene netianirie ng’a enyomba eye nebe bosa. Nab’Omonene atebiire.”
Ⅵ Aya nar’Omonene agoteeba igoro y’enyomba y’oborwoti bw’Abayuda: “Aye nigo ore ase ’nde buna Gileadi, na buna egetunwa kia Lebanoni, korende nonya naboigo, ekeene, ningokore obe buna erooro, na buna omochie otamenyiri nabaanto.
Ⅶ Nintome abanto bache kogosiria; kera oyomo agochere obwate ebirwanero biaye bi’esegi, nabarabwo nabageche emete y’emecharake, eria ere emiya mono ase more, na bayerute ase omorero.
Ⅷ “Abanto b’ebisaku ebinge nabaetere ase omochie oyo, babe bakoborania: Nase ki Omonene akorire omochie oyo omonene osarekire iga?
Ⅸ Nabairanerigwe: Aya nigo akorekire, ekiagera abanto b’omochie oyo batigete okobwatana kw’ogotianania kw’Omonene, Nyasae obo, bakaonchokera gosasiima na gokorera chinyasae ching’ao.”
Obobani bwa Yeremia igoro ya Salumu, nere Yehoahasi
Ⅹ Timobaisa koreera omonto okuure,
gose komobokeria amagombo;
korende momoreere mono oyochiire aare,
ekiagera oyio takoirana naende korora ense yaye ase aiboreretwe.
Ⅺ Aya nar’Omonene agoteeba igoro ya Salumu, mosinto o Yosia, Salumu oria ogamberete Abayuda ribaga ria ise na akagenda agatiga aase aa: “Ere takoirana aiga nonya ng’ake,
Ⅻ korende aase airetwe obosomba, nao arakwere, gose takoirana gocha aa ase ense ayerore naende.”
Obobani bwa Yeremia igoro ya Yehoyakimu
ⅩⅢ Obobe nobw’omonto oyio okoagacha enyomba yaye
ase chinchera chitari chia boronge,
na ase oborianania koroisia chiero chinene chi’enyomba yaye;
oyio ogokora omogisangio oye amokorere emeremo bosa,
na tari komoakana eng’eria yaye.
ⅩⅣ Obobe nobwaye omonto oyio ogokwana:
“Ninyeagachere enyomba enene,
enachanire chiero chinene ase rirongo riaye.
Nigo akobochora chitirisa chingare ase enyomba eria,
naende ochabera chinyasi nemecharake
na oyeaka erangi embariri ye rigori rinene.
ⅩⅤ Inee! Nigo okagete ng’a aye nomorwoti ore,
ekiagera okoamererania nabande ase okoagachera emecharake?
Inee! Iso tariete endagera na konywa, naende agakora ayare ay’ekeene na oboronge?
Ee, ase engencho eyio amang’ana nigo abeete amaya asare.
ⅩⅥ Ere nigo arenge konacha ebiina ebironge ase abataka na ase abaremerwa,
ase igo amang’ana akaba amaya asare.
Inee! Ase ogokora igo tari rirorio okomanya inche?
Nab’Omonene akwanire.
ⅩⅦ Amaiso ao na enkoro yao nigo bire ne ribero ri’okonyora ebitoki bia bosa,
na ogoitera amanyinga ’omonto otari nokomocha,
na kwenaria obourereria na obotindi.”
ⅩⅧ Ase ayio, aya nar’Omonene agoteeba igoro ya Yehoyakimu mosinto o Yosia,
omorwoti bw’Abayuda:
“Abanto tibakomoreera na gokwana:
Obee! Momura ominto! Gose: Obee! Mosubati ominto!
Onde tari oramoreere na gokwana:
Obee! Omonene! Obee! Naki arenge Omonene!
ⅩⅨ Ere nigo aratindekwe buna etigere egotindekwa.
Nigo arakururwe atugutwe isiko y’ebiita bia Yerusalemu.”
Obobani bwa Yeremia igoro y’ogosirigwa kwa Yerusalemu
ⅩⅩ Tiira gochia Lebanoni, morere,
moake amariogi agwo Basani,
morere korwa Abarimu, ekiagera abanchwa bao basirigwe.
ⅩⅪ Inche nigo nakwanete naye, ekero kwarenge nogosesenigwa,
korende ogakana ogateba: “Inche tinkogotegerera.”
Ayio naro kwabeire kogokora korwa oboke bwao;
tikwarenge konyigwera.
ⅩⅫ Omwaga noirurukie abarisia bao bonsi,
na abanchwa bao nabooswe, bairwe ase obosomba,
erio aye norore obosooku na gotang’ang’a
ase engencho y’ebibe biao bionsi.
ⅩⅩⅢ Inwe abanto ba Lebanoni,
mwabeire more n’obotoereru ase ebiswa biaino ime, ase egati y’emecharake.
Ekeene, namweumie ekero moraigwe obororo,
obororo buna obw’omokuungu okobina aibore.
Ekiina kia Nyasae igoro ya Konia
ⅩⅩⅣ Omonene nigo agoteeba iga: “Ekeene, buna inche inde moyo, nonya aye Konia omorwoti bw’Abayuda, kore mosinto o Yehoyakimu, kwarenge koba ebonyi ere nekemanyererio kiane ebekire ase okoboko kwane gw’okorio, nabo nare kogosomora.
ⅩⅩⅤ Naende ninkobeke ase amaboko abanto abwo bakorigia obogima bwao, abwo oirogete. Ninkobeke ase okoboko kwa Nebukadinesaro, omorwoti o Babiloni, na ase okoboko kw’Abakalidayo.
ⅩⅩⅥ Ningoserie ne chinguru amo na nyoko okoiborete, erinde mogende ase ense eng’ao ase motaiboreretwe, mokwereo.
ⅩⅩⅦ Na ase ense moraganie koirana gochiao, timokonyara.”
ⅩⅩⅧ Inee! Omonto oyo Konia nigo abeire buna enyongo yatekire, egekorero onde ataganeti? Nase ki rende ere amo nabana baye barutirwe gochia ase ense batamanyeti?
ⅩⅩⅨ Aye ense, ense, ense!
Igwa ring’ana ri’Omonene!
ⅩⅩⅩ Aya nar’Omonene agoteeba:
“Riika igoro y’omonto oyio ng’a tari nabana,
obeire omonto otasesenetigwe ase obogima bwaye.
Ororeria rwaye tirogotoka roraikaranse ase ekerogo ki’oborwoti gia Daudi
agambere Abayuda.”