ⅩⅩⅢ
Ogosemeria kw’amatuko agochi‐gocha
Ⅰ Obobe nobw’abarisia abwo bagosaria na goserebania ching’ondi chie riicho riane. Nab’Omonene atebiire.
Ⅱ Aya nar’Omonene, Nyasae bw’Abaisraeli, agoteeba igoro y’abarisia, abwo babekire korenda abanto baane: Inwe mwaserebanirie riicho riane, mwariseririe gochia aare, gose timwariechanderete. Naama! Nimbae inwe egesusuro ase engencho y’ogokora kwaino okobe.
Ⅲ Ase ayio inche omonyene ninsangererie abatigari be riicho riane, mbarusie korwa chinse chionsi agwo ase nabasiarerete gochia; nimbairanie gocha ase obweri bwabo, na barabwo nabaibore na komentekana.
Ⅳ Nimbabeekere abarisia, abwo barabarende, na abanto baane tibakoba nobwoba nonya ng’ake, gose tibakoondoka, gose onde takonyara gosira. Nab’Omonene atebiire.
Ⅴ Omonene nigo agoteeba iga: “Amatuko ngocha are ekero ndasebokie oyomo ore Omoseboka omooronge o Daudi. Oyio nabe omorwoti, oragambe nobong’aini na konacha ebiina bi’ekeene na ebi’oboronge ase ense.
Ⅵ Ase amatuko aye Abayuda nabatoorigwe na Abaisraeli bamenye ase obotoereru, na oyio narokwe: Omonene Nere Oboronge Bwaito.”
Ⅶ Ase ayio Omonene oteebire ng’a amatuko ngocha are, ekero abanto batakwane: “Ekeene, buna Omonene are moyo, oyio orusetie Abaisraeli korwa ase ense ya Misiri.”
Ⅷ Ribaga ri’ayio nigo barakwane: “Ekeene, buna Omonene are moyo, oyio orusetie na koraa ororeria rw’Abaisraeli korwa ase ense ya sugusu, na korwa ase chinse chionsi agwo ase abaseretie gochia.” Erio mbamenye ase ense yabo abanyene.
Obobani bwa Yeremia igoro y’ababani
Ⅸ Amang’ana igoro y’ababani:
Enkoro yane yairianyekire ime yane,
amauga aane onsi atengechire;
nabeire buna omonto otindire ase okonywa,
na buna oyo edivai yabuire,
ase engencho y’Omonene
na ase amang’ana aye amaachenu.
Ⅹ Ense eye nigo eichire nabatomani,
nigo ekweumia ase engencho y’okoragererigwa,
na amarisia ’erooro omire.
Orogendo rw’abaanto nigo rore orobe,
ne chinguru chiabo nigo chire ase ogokora aya atari amaronge.
Ⅺ “Abaabani na abakuani tibamoirogeti Nyasae.
Nonya nase enyomba yane obobe bwabo bwarorekanire.”
Nab’Omonene atebiire.
Ⅻ “Ase ayio chinchera chiabo nachibe ase bare
buna chinchera chinterere ase omosunte,
agwo ase baraserigwe gochia, bagweo.
Nindete obobe igoro ase bare ase omwaka oria ndabae egesusuro.”
Nabo inche Omonene natebiire.
ⅩⅢ “Naroche oboriri ase ababani ba Samaria,
nigo barenge kobana ase erieta ri’enyasae Baali,
na gotantania abanto baane Abaisraeli.
ⅩⅣ Korende narorire ababani ba Yerusalemu bakorire obobe goetania.
Nigo bagokora obotomani na gosiarera oborimo.
Nigo bakobeeka abakori amabe chinguru,
erinde onde taonchoka na gotiga ebibe biaye.
Bonsi babeire ase ’nde buna abanto ba Sodomu,
na abanto bamenyete Yerusalemu babeire buna aba Gomora.”
ⅩⅤ Aya nar’Omonene bw’Emeganda agoteeba igoro y’ababani abwo:
“Naama! Nimbae ekemeri ekeroro barie,
nimbae namaache are nobosongo banywe.
Korwa ase ababani ba Yerusalemu,
ogotamoiroka Nyasae gwesiareire ase ense yonsi.”
ⅩⅥ Aya nar’Omonene bw’Emeganda agoteeba: “Timobaisa koigwera amang’ana ’ababani abwo bakonakobaabaanera na kobaichoria nogosemeria kw’obong’ainereria. Barabwo nigo bagokwana amaroro aye chindoto chie chinkoro chiabo, gose tari ayakorwa ase omonwa one inche Omonene.
ⅩⅦ Abwo nigo bagendererete goteebia abanto baria bachayete ring’ana riane: Omonene oteebire ng’a namonyore omorembe. Naende bateebia baria bakobwatia obomwenu bwe chinkoro chiabo: Amabe tagocha ase more.”
ⅩⅧ Ning’o ase egati y’ababani abwo otenenire ase ekegambero ki’Omonene koigwa na komanya ring’ana riaye? Gose ning’o otegereire ring’ana riaye na oriigure?
ⅩⅨ Rora, omwaga omotindi okorwa ase Omonene, oichire nendamwamu yaye enga buna ekerambauti osokire; nigo egocha igoro ase emetwe y’abanyabibe.
ⅩⅩ Omonene takoonchoka atige endamwamu yaye, goika aikeranie okogania kw’ebirengererio biaye ase okonacha ekiina. Nigo morache komanya buya amang’ana ayio ase amatuko agocha.
ⅩⅪ “Inche tinatomete ababani abwo, korende nigo baminyogete boka abanyene; tinakwanete nabarabwo, korende nigo bagendererete kobana.
ⅩⅫ Korende onye ababani abwo mbaigwerete ogosemia kwane, nanga mbaraaretie amang’ana aane ase abanto baane, na nigo barenge gocha koonchora abanto batige ebibe biabo na ogokora kwabo okobe.
ⅩⅩⅢ “Inee! Inche nigo inde Nyasae ore ang’e rioka? Tindi Nyasae ore aare boigo?
ⅩⅩⅣ Naende inche Omonene nigo ngoteeba: Inee! Omonto nanyare kwebisa aase are bobisi inche ntamorore? Tari inche oria inde aande onsi, igoro na ense?
ⅩⅩⅤ Naigure amang’ana ’ababani abwo bagokwana, abwo bakobana oborimo ase erieta riane, bagoteeba. Inche narotete, ee, narotete!
ⅩⅩⅥ Inee! Ngoika ririri oborimo boragenderere koba ime ase chinkoro chi’ababani abwo bakobana obong’ainereria bwe chinkoro chiabo?
ⅩⅩⅦ Abaabani abwo barengereirie ng’a abanto baane nigo barebe erieta riane ase engencho ye chindoto chiabo babe bagoteebania buna chisokoro chiabo chiebete erieta riane, chikaonchokera Baali.
ⅩⅩⅧ Omobani oria obwate chindoto, tiga achikwane, korende oyobwate ring’ana riane, tiga arikwane ase obwegenwa. Inee! Omoiriro, ninki oisaine ekero okoreng’anigwa nengano? Nabo inche Omonene natebiire.
ⅩⅩⅨ Inee! Ring’ana riane tiriri buna omorero, naende buna enyundo egwatia ebitare? Nab’Omonene atebiire.
ⅩⅩⅩ Naende omonene oteebire: Inche nigo inde mamincha y’ababani abwo bakoiba na koura abande amang’ana aane.
ⅩⅩⅪ Boigo inche nigo inde mamincha y’ababani abwo bagokwana amang’ana abo abanyene na goteeba ng’a Omonene oteebire bo.
ⅩⅩⅫ Naende nigo inde mamincha y’ababani abwo bakobana chindoto chi’oborimo, naende bachiteebia abanto baane na igo baabasiria. Ase ayio tibari gokonya abanto aba nonya ng’ake. Inche Omonene nakwanire.”
Egurube y’Omonene
ⅩⅩⅩⅢ Omonene nigo agoteeba iga: “Ekero oyomo bw’abaanto aba, gose omobani, gose Omokuani, arakoborie: Egurube y’Omonene nereri? Obairanerie, obateebie: Ninwe egurube yaye, ere nabaserie morueo.
ⅩⅩⅩⅣ Omobani, gose Omokuani, gose omonto onde bwensi bw’abaanto aba karakwane Egurube y’Omonene, inche nimoe egesusuro, ere amo neamate yaye.
ⅩⅩⅩⅤ Inwe nigo mogwenerete koborania, kera omonto nomogisangio oye, na kera oyomo noyomwabo: Mang’ana ki Omonene airaneria? Gose: Narari akwanire?
ⅩⅩⅩⅥ Korende timobaisa gwatora nonya ng’ake ring’ana eri: Egurube y’Omonene, ekiagera ring’ana ri’omonto nario rire egurube asare ere omonyene. Inwe mwasaririe na koonchorana amang’ana a Nyasae ore moyo, oyore Omonene bw’Emeganda. Nyasae oito.
ⅩⅩⅩⅦ Amang’ana aya naro oraborie ababani abwo: Ninki Omonene akoiraneirie? Gose: Narari akwanire?
ⅩⅩⅩⅧ Omonene nigo agoteeba ng’a inwe moise kogenderera gokwana: Egurube y’Omonene, na kwanga koigwera, korende mogokwana amang’ana ayio Omonene abakanirie ng’a timobaisa gokwana bo,
ⅩⅩⅩⅨ rirorio inche nimbaserie morue ase obosio bwane, inwe amo nomochie oyio nabaete inwe ne chisokoro chiaino.
ⅩⅬ Inche nindete igoro ase more ogochaywa, na obosooku, ebio bigenderere koba ase more kare na kare.”