ⅩⅩⅣ
Ebitonga bibere bire namako
Ⅰ Magega Nebukadinesaro, omorwoti o Babiloni, kairire Yekonia, mosinto o Yehoyakimu, omorwoti bw’Abayuda, amo nabanene b’oborwoti boria, na abaroisia b’ebinto, na abaturi b’ebioma, gochia Babiloni, Omonene akanyorokia okorora oko: Bosio bwe Hekalu y’Omonene nkarora ebitonga bibere biarenge namako.
Ⅱ Egetonga ekemo nigo kiarenge namako amaya mono amatobu, aya atongoretwe, na egetonga kende nigo kiarenge namako amabe mono atarenge konyara koriegwa.
Ⅲ Omonene akamboria, “Yeremia, ninki ekio orooche?”
Nkamoiraneria, “Namako amaya, ee namaya mono, na ayande amabe, ee, namabe mono atanyare koriegwa.”
Ⅳ Erio ring’ana ri’Omonene rigacha ase ’nde, riganteebia,
Ⅴ “Aya nar’Omonene, Nyasae bw’Abaisraeli, agoteeba: Abayuda abwo narusirie aase aiga na kobaira ase obosomba ase ense y’Abakalidayo nimbaabare ng’a nabaya buna amako ayio are amaya.
Ⅵ Nimbarende na kobakorera amaya goika mbairanie naende ase ense eye. Nimbatenenie gose tinkobatagora, nimbasimeke gose tinkobasimora.
Ⅶ Nimbae chinkoro chi’okomanya ng’a inche ninche Omonene; nababe abanto baane, na inche nimbe Nyasae obo, ekiagera barabwo nabang’iranere ne chinkoro chiabo chionsi.”
Ⅷ Aya nar’Omonene agoteeba: Korende Zedekia, omorwoti bw’Abayuda, amo nabanene b’oborwoti bwaye, na abanto ba Yerusalemu nigo baratigare ase ense eye, na baria bamenyete Misiri nimbakore babe buna amako ayio amabe atanyare koriegwa.
Ⅸ Nindete amabe amanene igoro ase bare, na abanto b’amarwoti onsi mbaichanigwe na koondoka ekero barabarore, ekiagera nimbatige bachaywe na gosekererwa, naende babe omorabaaro ne ring’ana rigokwanwa bobe, na abanto mbabe bakoragereria ase erieta riabo.
Ⅹ Nimbatomere chiseegi, baitwe nemioro, na abande bakwe nenchara na amarwaire. Mbasirigwe kegima, barue ase ense eyio nabaete barabwo ne chisokoro chiabo.