ⅩⅩⅩ
Eira y’Omonene ase abanto baye
Ⅰ Ring’ana ri’Omonene rigacha ase Yeremia, rikamoteebia,
Ⅱ “Aya nar’Omonene, Nyasae bw’Abaisraeli, agoteeba: Amang’ana onsi nagotebetie, yarike ase egetabu,
Ⅲ ekiagera amatuko ngocha are ekero ndairanerie abanto baane Abaisraeli na Abayuda amaya abo; mbarente ase ense eyio naete chisokoro chiabo, na barabwo nabayeire ebe eyabo.” Nab’Omonene atebiire.
Ⅳ Amang’ana aya nar’Omonene akwanete igoro y’Abaisraeli na Abayuda:
Ⅴ “Aya naro inche Omonene ngoteeba:
Twaigure eriogi ri’okorera kw’omoondoko,
okorera kw’obwoba na tikori okw’omorembe.
Ⅵ Boria momanye; Inee, omosacha nabe morito aibore omwana?
Nase ki rende narorire kera omosacha abwatete enda namaboko aye
buna omokungu okobina aibore?
Nase ki kera omonto aonchokire obosio bwaye?
Ⅶ Obee! Naki rituko riria rire rinene!
Rinde tiriri ringa buna rirorio.
Eyio nengaki y’emechando y’abanto ba Yakobo,
korende nonya naboigo mbatoorigwe korwa ase emechando eyio.”
Ⅷ Omonene bw’Emeganda nigo agoteeba iga: “Nebe ekero rituko riria riraike, nimbune amakorogoto, ninyerusie ase amagoti abo. Nimbasansore chingataare basibeire, na barabwo tibakoba abasomba b’abaanto b’egesaku ekeao nonya ng’ake.
Ⅸ Korende mbamokorere Omonene, Nyasae obo, bamokorere na Daudi, omorwoti obo, oyio ndabatenenerie.
Ⅹ “Inwe abanto ba Yakobo, timoiroka,
inwe Abaisraeli, timoondoka,
ekiagera naama, nimbatoorie korwa ase ense y’obosomba.
Abanto ba Yakobo mbairane banyore omorembe na obotoereru;
monto onde tari oraboboyie”
Ⅺ Naende Omonene oteebire:
“Inche nigo inde amo nainwe mbatoorie,
ninsirie kegima ebisaku bionsi,
ebio ase nabasiarerete gochia,
korende inwe tinkobasiria kegima.
Nimbae egesusuro gi’okobarongeyia ase oboronge,
tinkobatiga nonya ng’ake timbaa egesusuro.”
Ⅻ Aya nar’Omonene agoteeba:
“Ogochandeka kwaino tigokogwenigwa,
amaote aino abeire amabe mono.
ⅩⅢ Monto onde tari orabarwanerere.
Eriogo ri’amaote aino tiriri,
okogwenigwa tikori ase more.
ⅩⅣ Abanchi baino bonsi baabatigire,
tibari kobechandera,
ekiagera inche nabaakire inwe ogoakwa kw’obobisa.
Nabaeire egesusuro ntari namaabera,
ekiagera okomocha kwaino nokonene,
na ebibe biaino biamentekanire.
ⅩⅤ Nase ki mokorera ase engencho y’emechando yaino?
Obororo bwaino tibokogwenigwa.
Ogosaria kwaino nokonene,
na ebibe biaino biamentekanire.
Ayio naro agerire nabakoreire igo.
ⅩⅥ Ase igo bonsi abarabasirie inwe nabarabwo mbasirigwe,
na ababisa baino bonsi, kera oyomo obo nairwe obosomba.
Abwo baraboose, nabarabwo mbooswe,
abwo barabasakore, nabarabwo mbasakorwe.
ⅩⅦ Omonene oteebire iga: Inche nimbasebokie naende,
ningwenie amaote aino,
ekiagera abanto nigo baabaarogete inwe abamotugutire,
na bateba ng’a Sayoni nomochie otigetwe, monto onde atayochandekereti.”
ⅩⅧ Aya nar’Omonene agoteeba:
“Naama! Ning’iranie abanto ba Yakobo ase chiema chiabo,
nimbe namaabera ase obomenyo bwabo.
Omochie o Yerusalemu noagachwe naende ase orenge.
Na enyomba y’omorwoti neagachwe ase yarenge.
ⅩⅨ Abanto abwo nabatere amatera ay’ogoaka ng’a mbuya mono,
mbaake amariogi ’omochengo.
Nimbamentekanie babuche, na omobaro obo tokoba omoke.
Ningere basikwe na tibakobarwa ng’a tibaisaini gento.
ⅩⅩ Abana babo mbabe abange buna kare,
omoganda obo nonyore chinguru ase obosio bwane,
abwo bakobachanda, nimbae egesusuro.
ⅩⅪ Omonene obo nigo arabe omonto obo abanyene,
na omogambi obo nigo ararue ase egati yabo.
Nimosukie gocha ang’e ase ’nde, nere nang’ike ang’e,
ekiagera monto ki orabe noboremu kong’ika ang’e bweka ntamong’useti.”
Nab’Omonene atebiire.
ⅩⅫ “Inwe namobe abanto baane,
na inche nimbe Nyasae oino.”
ⅩⅩⅢ Rora omwaga Omonene! Endamwamu yaye yachire buna omwaga bw’ekerambauti, noguse igoro ase emetwe y’abanyabibe.
ⅩⅩⅣ Endamwamu entindi y’Omonene tekonyara koirana ebatige goika abe oikeranirie ekiina kiaye na gokora buna okogania kwaye kore. Amang’ana ayio nigo morache koyamanya buya ase amatuko agochi‐gocha.