ⅩⅩⅪ
Abaisraeli bakoirana sobo
Ⅰ Omonene nigo agoteeba iga: “Ase engaki egocha, inche nimbe Nyasae bw’ebisaku bionsi bi’Abaisraeli, na barabwo nababe abanto baane.”
Ⅱ Aya nar’Omonene agoteeba: “Abanto abwo batooregete korwa ase ogoitwa nemioro, mbanyorete amaabera agwo ase erooro. Ekero Abaisraeli baganetie banyore obotoereru,
Ⅲ inche Omonene nkabaorokera korwa aare. Nabeire mbanchete nobwanchani bwa kare na kare. Ase ayio obuya bwane bwa botambe bwabang’usire.
Ⅳ Naende inwe Abaisraeli, abamore ase ’nde buna omoiseke omwekungi, nimbaagache nainwe moagacheke, mokong’e. Inwe namwechabere chinchigiri naende, erio mochenge mogotenga amo nabwo bagochenga.
Ⅴ Mosimeke emesabibu ase emegondo y’ebitunwa bia Samaria. Abwo barasimeke nabarie okwama okwo.
Ⅵ Rituko ngocha rire ekero abarendi bararangerie korwa ase ense y’ebigoro y’Efraimu, bateebe: Imoka togende Sayoni ase Omonene Nyasae oito.”
Ⅶ Aya nar’Omonene agoteeba:
“Tera neriogi ri’omogooko ase engencho y’abanto ba Yakobo,
moake amariogi ase engencho yaye oyore omonene bw’ebisaku.
Raria na goaka ng’a mbuya mono, erio motebe:
Omonene obooririe abanto baye,
abatigari b’Abaisraeli.
Ⅷ Rora, nimbarente korwa ase ense ya sugusu,
mbasangererie korwa chinsinyo chi’ense.
Amo nabarabwo mbachiche emeuko na ebirema,
abakungu bare barito na abakobina baibore,
nabairane aase aiga bare omoganda omonene.
Ⅸ Ekero barairane mbache bakorera,
korende inche nimbatang’ane mbairanie gocha bagosaba.
Nimbatang’ane gochia ase chindooche chi’amaache,
mbaeterie ase enchera engiya ase batagochwe.
Inche nigo inde ise bw’Abaisraeli,
na Efraimu nomwana one omotangi.
Ⅹ “Inwe abanto b’ebisaku, igwa ring’ana ri’Omonene,
morirarie ase ebisinka na ase chinse
chi’aare echire ang’e ne chinyancha, motebe:
Oria osiarerete Abaisraeli, nabasangererie naende,
ere nabarisie buna omorisia akorisia ching’ondi chiaye.
Ⅺ Omonene obooririe abanto ba Yakobo,
obatooririe korwa ase amaboko ’abaanto bare ne chinguru kobabua.
Ⅻ Nabachiche bagotera neriogi rinene igoro y’egetunwa gia Sayoni;
nabaayerere gochia ase kobeeka,
gochia ase endagera, na edivai, na amaguta ’amazeituni,
na ase chimanwa chi’eching’ondi, na echie chimbori, ne chimori chi’echiombe.
Obogima bwabo nabobe buna omogondo ogoitororerwa amaache;
barabwo tibakogoya nonya ng’ake.
ⅩⅢ Erio abaiseke abekungi mbatenge na bagoke,
abanto abake na abagotu nababe nomogooko.
Ning’onchore ebirero biabo bibe omogooko.
Nimbaremie, mbae omosasoko ribaga ri’omoichano.
ⅩⅣ Ninyigotie na goisanekia abakuani n’ebinto ebinoru;
abanto baane mbaisaneke nobuya bwane.
Nab’Omonene atebiire.”
Amaabera a Nyasae ase Abaisraeli
ⅩⅤ Aya nar’Omonene agoteeba:
“Eriogi riaigurwe Rama,
okorera na okweumia nobororo.
Raeli nkobareera are abana baye;
tancheti aremigwe ase engencho y’abana baye,
ekiagera tibaiyo.”
ⅩⅥ Naende aya nar’Omonene agoteeba:
“Tiga korera mono iga,
takoiyeria amariga,
ekiagera emeremo yao nenyorerwe eng’eria yaye,
abwo nabairane korwa ase ense y’ababisa babo,
Inche Omonene nakwanire.
ⅩⅦ Naende ngoteeba iga:
Ogosemeria nkore asore ase amatuko agochi‐gocha,
na abana bao nabairane gocha ase ense yabo.
ⅩⅧ “Naigure Efraimu okorera, ogoteeba:
Aye kwang’akire ase okondongeyia,
na inche narongeire buna emori etorokereiri,
ng’iranie, na inche ning’iranigwe,
ekiagera naye Omonene, Nyasae one.
ⅩⅨ Ekero nagotigete nigo neitetie, nkaonchoka;
magega konorokererigwe, nigo neagete ebachwa,
ngatureka omotwe one nkarora obosooku,
ekiagera nabogoretie obosooku bw’obosae bwane.
ⅩⅩ “Inee! Efraimu tari omwana one nyanchete?
Ere nere ongogetie mono.
Nonya nkomotianera,
nigo imorengereretie botambe.
Enkoro yane nigo emwechanderete,
ekeene, nimororere amaabera.”
Nab’Omonene atebiire.
ⅩⅪ “Ebekere ebimanyererio ase enchera yao,
beka ekiorokererio kegokoraa ase ogoetera.
Rengereria mono igoro y’enchera enene,
enchera eyio gwaeterete.
Irana inwe Abaisraeli abamore buna omoiseke omwekungi,
irana ase emechie yaino.
ⅩⅫ Ngoika ririri oragenderere konakoong’anya,
aye omoiseke one otari omwegenwa?
Omonene natonge ring’ana riyia ase ense,
omokungu nabe okorenda omosacha.”
Ogosesenigwa kw’abaanto ba Nyasae ase amatuko agochi‐gocha
ⅩⅩⅢ Aya nar’Omonene bw’Emeganda, Nyasae bw’Abaisraeli, agoteeba: “Ekero ndairanerie abanto bairetwe obosomba amaya abo, nabakwane naende amang’ana aya ase ense y’Abayuda na ase emechie ereo:
“Omonene agosesenie aye obomenyo bw’abanyaboronge,
aye ekegoro egechenu.
ⅩⅩⅣ Abayuda mbamenye ase emechie yabo yonsi amo. Boigo abaremi na abarisia baria bakona‐koong’anya mbamenyeo.
ⅩⅩⅤ Nintimokie na goisanekia abanto abwo barosire; na kera omonto ogoyire nimoisanekie na komoigotia.”
ⅩⅩⅥ (Aroro agwo nkaboka korwa ase chitoro, nkarigereria, ne chitoro chiane nigo chiarenge chingiya ase ’nde.)
ⅩⅩⅦ Omonene nigo agoteeba iga: Amatuko ngocha are, ekero inche ndabusure ense y’Abaisraeli, na ey’Abayuda, ne chimbusuro chia Mwanyabaanto na echie ching’iti.
ⅩⅩⅧ Buna nabeire mbarigereretie ase okobasimora, na kobatagora, na kobaonchorana, na kobasiria, na kobarentera amabe, naboigo ndabarigererie ase okobaagacha na kobasimeka. Nabo inche Omonene natebiire.
ⅩⅩⅨ Ekero amatuko aria araike, tibagokwana iga nonya ng’ake:
Abaise babo barire amasabibu amaroro,
na amaino ’abana babo abeire nobokang’iti.
ⅩⅩⅩ Kera omonto nigo arakwe ase engencho y’obobe bwaye omonyene. Kera omonto orarie amasabibu amaroro, amaino aye nabe nobokang’iti.
ⅩⅩⅪ Omonene oteebire iga: “Rora, amatuko ngocha are, ekero ndakore okobwatana okoyia kw’ogotianania nenyomba y’Abaisraeli na ey’Abayuda.
ⅩⅩⅫ Okobwatana okwo tigokoba buna koria nakorete ne chisokoro chiabo, ekero nabarusetie nokoboko kwane korwa ase ense ya Misiri, okwo basaretie nonya inche narenge buna omosacha obo.” Nab’Omonene atebiire.
ⅩⅩⅩⅢ Naende Omonene nigo agoteeba iga: “Oko nakwo okobwatana ndakore n’Abaisraeli magega y’amatuko ayio: Nimbeke amachiiko aane ime yabo; ninyarike ase chinkoro chiabo. Inche nimbe Nyasae obo, na barabwo mbabe abanto baane.
ⅩⅩⅩⅣ Engaki eyio tibakogenderera kworokererania, kera omonto ogoteebia omogisangio oye, gose oyomwabo: Many’Omonene, ekiagera bonsi pi nabamanye inche, korwa omonto omoke mono goika omonene mono. Inche nimbaabere obobe bwabo; tinkoinyora ebibe biabo nonya ng’ake,” Nab’Omonene atebiire.
ⅩⅩⅩⅤ Aya nar’Omonene agoteeba,
“Ere oyogotoa erioba riabara mobaso,
na gochika omooroberio bw’omotienyi
obara botuko amo ne ching’enang’eni,
ere oyio ogoserokia enyancha erinde yaeera,
oyio erieta riaye n’Omonene bw’Emeganda.
ⅩⅩⅩⅥ Omoroberio oyo obekirwe ase ebinto ebio oise korusigwa ase ’nde,
ororeria rw’Abaisraeli nigo rorasire tirobao,
tibakoba egesaku ase obosio bwane kogenderera botambe.”
Nab’Omonene atebiire.
ⅩⅩⅩⅦ Naende aya nar’Omonene agoteeba:
“Igoro chionsi chiise korengwa na komanyekana,
na amaroso ’ense aise gotukwa na komanyekana buna ere,
erio inche nintugute ororeria rw’Abaisraeli
ase engencho y’amang’ana ayio onsi bakorire.”
ⅩⅩⅩⅧ Omonene nigo agoteeba iga: “Amatuko ngocha are ekero omochie oria oraagachwe naende ase ’nde, gochakera ase Omorobiri o Hananeli goikera ase Egeita gi’Ekoona.
ⅩⅩⅩⅨ Orobebe rwaye rw’okoyorenga narogende aare, rorongee gochia ase ekegoro kia Garebu, naende roonchoke rogende roike Goa.
ⅩⅬ Rikura rionsi rire nemebere ekwete, ne ribu, amo nemegondo yonsi ere agwo goikera akarooche ga Kidironi, na goika ekoona ekorokwa Egeita gie Chibarasi, gochia ase ensemo ya moocha; chinsemo echio nchibe chinchenu ase ’nde inche Omonene. Tichikoonchoranwa gose gosarigwa nonya ng’ake.”