Ⅰ Holoferne akamoteebia Yuditi, “Aye omokungu, remia enkoro yao, toba na bwoba bonde bwonsi ase omoyo; inche tanana komokorera bobe monto onde bwensi bwanchire gokorera Nebukadinesaro omogambi bwe ense engima. Ⅱ Goika bono nonya nabaanto baino abwo bamenyete ase ebitunwa bare koba tibandameti, inche tinarenge koraria esegi ase bare. Barabwo nigo berenteire obokong’u obo barabwo abanyene. Ⅲ Nteebie eki kiagera gwatotamera gocha aiga? Aye norendwe kegima. Tobaisa koba nobwoba; nonyaare koba moyo ase obotuko obo boigo ase amatuko agochia goocha. Ⅳ Monto taiyo orakoire gechara korende kera omonto nagokorere buya buna ase abasomba bande b’omorwoti one Nebukadinesaro.” Ⅴ Yuditi akamoteebia Holoferne, Nigo nkogosaba onyaanchere inkwane naye, omonene nagosabire ontegerere buya inche omokoreri oo omokungu aria indaabe inkoyakwana ase obosio bwao. Ekiagera nigo ngochia gokwana ekeene gioka. Ⅵ Korategerere oboseemia bwane inche omokoreri oo omokungu, Nyasae nakore amanene goetera asore aye naboigo ekeene emeroberio yao nesesenigwe. Ⅶ Nigo ngotiana ase obomoyo na okobua kwa Nebikadinazaro, omorwoti bw’ense yonsi, ere oyio ogotomete koreta okobwatana ase egati ya abanto bo oborwoti bwaye, tari rioka ng’a aye gwakorire abanto bamokorere ere, korende nonya neching’iti chi’orosana, chitugo boigo ne chinyoni bionsi biamoigwereire ere. Ase engencho yao, omorwoti Nebukadinesaro namenteke amo noborwoti bwaye bwonsi. 11:7 rora Yer. 27:6; Dan. 2:38 Ⅷ Intwe twiguure chinkuma chie chiseemi nobong’aini bwao. Ense engima yamanyire ng’a aye nomonto omuya, oichire obomanyi na okomanya okonene ase amang’ana ye esegi. Ⅸ Akioro oyio otooretigwe na abanto baito, otomanyirie aria akwanete ase egeikaranso kiabagaaka bao. Ⅹ Ase igo aye omonene, aria akwanete tobaisa koyasiereria koba aya atari na ngeencho, nagosabire moyabogorie no oborito obonene ekiagera aria akwanete nekeene kegima. Monto taiyo oranyaare gosaria egesaku giaito gose gokebua goika rioka enyarekane twakorire ebibe ase Omonene oito. Ⅺ Korende aye togosiria gose gosinywa goikerania amagania ao. Ekero Abaisraeli barakore ebibe na komobeyia Nyasae obo, erio rioka nario barakwe. Ⅻ Bono emonga ye endagera yaabo yaerire korwa ase ebigancha biabo boigo amaache abo abeire ang’e koera. Bono baetirie konyenya chitugo chiabo naboigo koria chindagera chiria chire mamincha yerichiiko ri’Omonene obo. ⅩⅢ Barabwo baetirie koria chindaagera chi’okobusenia korwa ase engaano, ensemo ya ikomi ye edivai amo na amafuta ebio bikoriegwa na abakuani amo na baria bagokora ase Hekalu ya Nyasae ime ya Yerusalemu booka. Chindagera echio chinchenu intwe totancheiri nonya nogokunwa na amaboko aito abanyene. 11:13 rora Okong’ 23:19; Abal 27:30 ⅩⅣ Ase engencho abanto b’omochie o Yerusalemu basaririe ogochika okwo abanto b’omochie oito batomire amang’ana gochia ase omochie o Yerusalemu erio basabe ribaga riogokora buna ayio barabwo bakorire goetera ase egeikaranso ekenene kia abagaaka. ⅩⅤ Ase rituko na ebiro biriabaraegwe ribaga riogokora aya anga buna ayio, nario aye oranyaare kobasiria. ⅩⅥ Ekero nemanyetie ayio, inche inkabatama abanto baane. Boigo Nyasae ontomire inche inyare gokora egento ekemo amo naye ekio keranyaare koirokia ense yonsi ekero barakeigwe. ⅩⅦ “Inche nomokuungu omosigete Nyasae ore igoro mono. Nigo nkomosasiima Nyasae ase obotuko n’omobaso. Nintigare ase egetwori kiao, korende ase kera obotuko nimbe inkogenda ase rikura gochia komosasiima Omonene, nere nanyorokie ekero Abaisraeli baraabe bakorire ebibe. ⅩⅧ Ekero ndabe namanyire ring’ana erio, agwo kegima nigo ngocha nkomanyie erio osooke aye amo na abarwani bao bonsi. Takoba nonya noyomo bwa Abaisraeli oratenene bosio bwao. ⅩⅨ Inche ninkorae goetera enchera ya gati ya Yuda goika omochie o Yerusalemu erio nkobeke aye koba omorwoti ase egati yo omochie oyio. Erio aye nonyaare kobasirera abamenyi b’omochie oyio buna ching’ondi chitari nomoriisia. Tekoba nonya nesese eragokogere. Omonene onyorokirie amang’ana aya erio nyaare gokoyamanyia ayio ataraikerana.” ⅩⅩ Holoferne amao na abakoreri baye bakagokigwa mono na amang’ana a Yuditi boigo bagaicha buna areenge omong’aini. ⅩⅪ Bagateebania barabwo ase barabwo, “Ekeene, ase ense yonsi tari omokungu ore omonyakieni naende ore nonong’aini buna oyo.” ⅩⅫ Holoferne akamoteebia, “Nigo rire ring’ana rigiya buna Nyasae agotomete erio obatang’anere abande, ase ogotobeeka chinguru egere baria bamoramete omonene one banyaare gosirigwa. ⅩⅩⅢ Aye nigo ore omonyakieni naende ogokwana n’obong’aini. Oinse gokora buna kwarire eira, Nyasae oo nabe Nyasae one. Aye nomenye ase enyomba y’oborwoti ya Nebukadinesaro naye nobe omokungu bwesiko ase ense engima.”