Ⅰ Ekaba ekero Yuditi akoorire komoreera Nyasae bw’Abaisraeli, Ⅱ akaimoka na komorangeria omokoreri oye erio agatirimboka na gosoa mwaye buna yarenge engencho yaye gokora ase ebiro bie amatuko amanene ne esabato. Ⅲ Akarusia eganchwa yaye yegunia neria yoboboraka, agesibia na kweaka amanukato yerigori rinene. Agachanua etukia yaye ekagwenera erio akeboyia chianga chiaye chingiya chiria arenge kobeka ase omogooko ekero omosacha oye Manase arenge moyo. Ⅳ Akabeeka ebikoroto biaye na gwechabera n’ebinto biokweboyia bie erigori chibangiri ne chibonyi, chisonoi chiamato nebinde. Akarorekana ore nekieni kiare kogokogokia abasacha bonsi barenge komorigereria Ⅴ Akamoa omokoreri oye omoiseke echuba engare yedivai naboigo echuba ende yamafuta. Boigo akabogoria ase buseki obosie bwomirie bwesayiri, chikeki chiamatunda omirie amo nemegati emiya yasambetwe kobwatekana na amachiiko yekeyahudi. Akabiboa ebinto ebio ase chinchera chingiya erio akamoa omokoreri oye omoiseke abibogorie Ⅵ Abakungu abwo babere bagasoka goika ase egeita kiomochie o Bethulia, agwo bakabanyoora Uzia bare amo na Kabirisi na Karimisi abanene b’omochie. Ⅶ Ekero bamorigereria Yuditi ase obosio nechianga chiaye, bakagokigwa nere erio bakamoteebia, Ⅷ “Nyasae bw’abagaaka baito agosesenie na goikerania emeroberio yao ase obonene bwa Abaisraeli naboigo Yerusalemu.” Ⅸ Yuditi akamosaba Nyasae; erio akabateebia, “Banteeberie abanto banyigorere egeita kiomochie. Nigo inde ase orogeendo gochia goikerania omoroberio oria twakwanete.” Erio kegima bakabachiika abamura bamoigorere Yuditi egeita buna okogania kwaye kwarenge. Ⅹ Yuditi na omokoreri oye omoiseke bagasoka gochia isiko yomochie. Abasacha baria bakagenderera komosoncha Yuditi buna koreng’ana amaiso abo amoroche goika akarimera. Ⅺ Ekero abakungu abwo baigete ase rikura bakaumerana na abarendi ba Abaashuru. Ⅻ Bakamobeka Yuditi biara na gochaaka komounenkia bakomobooria, “Egesaku kiaonkereki? Kai okorwa naende narari ogochia?” Erio Yuditi akabairaneria, inche nomoiberania na nigo nkobatama Abaisraeli ekiagera Nyasae obabeekire ase amaboko aino erio mobasirie ⅩⅢ Inche nigo inde ase orogeendo gochia komoirera Holoferne amang’ana yekeene. Inche nimoteebie ebisoero biokoriina egetunwa erio abwate ense eyio yonsi na monto oye onde bwensi ase abarwani baye taakwa chingoma gose gokorobanigwa. ⅩⅣ Abasacha baria bakang’uswa nekieni kiaye Yuditi ekiagera arenge omuya mono. Magega yokomotegerera bakamoteebia, ⅩⅤ Aye gwatoririe obogima bwao ase ogocha komorora ejamadari nomonene oito. Abanto ase egati yaito nkogokooba bare goika ase egetwori kiaye na gokomanyekania ase are. ⅩⅥ Ekero oraoroke ase obosio bwaye tobaisa koiroka kende ase enkoro yao. Aye omoteebie ayio gwatoteebia nere nagokorere amaya. ⅩⅦ Eri bakabachiika abanto rigana erimo bamokoobe Yuditi amo nomokoreri oye omoiseke goika ase egetwori kiaye Holoferne. ⅩⅧ Asa ekambi yonsi chinkuma chigaeta bwango egetwori ase egetwori igoro yogoocha kwa Yuditi. Ekero Yuditi ateneine isiko yegetwori kia Holoferne aganyete aariganigwe gosoa magega Holoferne gateebigwe amang’ana aye, abarwani abange ba Abaashuru bagaika na komoonchokana Yuditi. ⅩⅨ Abarwani baria bakegosa ase okorigereria obonyakieni bwa Yuditi bakebooria barabwo abanyene, Abaisraeli na abanto bangeencho ki! Bagatigara bakona koborania boka, Ning’o oranyaare kobachaaya abanto babwate abaiseke abanyakieni buna oyo? Nigo etogwenerete tobasirie abasacha baabo bonsi, onye tari bo, abanto aba nigo baratantanie ense engima. ⅩⅩ Ekaba abarendi amo nabakoreri baye bonsi bagasooka isiko erio bakamosoyia Yuditi ase egetwori kiaye Holoferne. ⅩⅪ Ase ebiro ebio, Holoferne nigo arenge otimogete ase oborere bwaye obwo bwarire ne egetambaa gechabeire chiusi chia monyinga, efeta na amagena ande ye rigori rinene. ⅩⅫ Ekero atebetigwe buna Yuditi oikire, Holoferne agasooka korwa ase eero yegetwori kiaye. Agatang’anwa nechitaaya chi’echifeta. ⅩⅩⅢ Ekero Yuditi aorogete ase obosio bwa Holoferne amo na abakori baye, bonsi bakegosa ase obuya bw’ekieni kia Yuditi. Yuditi akagwa inse maumama ase obosio bwa Holoferne erio abakori emeremo ba Holoferne bakamoimokia korwa inse ase obwango.