Ⅰ Yuditi akagwa maumama akeaka riibu omotwe akabisioria egetambaa giatubete eanga yaime yegunia; echi nechingaki chia mogoroba ekero abanto barenge gosamba ubani ime ye Hekalu agwo Yerusalemu. Agwo Yuditi akamoreera Omonene ase eriogi rinene okobora; Ⅱ Aye Omonene one, Nyasae o sokoro yane Simioni, inyora buna kwamobegete chinguru sokoro yane Simioni erio goakana egesiomba n’omoro ase baria bamobwatete nechinguru nagotibonga omoiseke Dina, abwo bamochoborete chianga chiaye na komobeeka obosooku, bakamokorera bobe ere oyorenge omobikira na komochecheria. 9:2 rora Omoch 34:1-31 Ⅲ Ayio akagera okabarua abaraai baabo bagaiterwa ase oborere obwo ase bamotarerete ere Dina. Erio okabasiria abanene abwo, abasomba, boigo na abatunyani baabo. Ⅳ Aye okabatiga abakungu baaabo bagooswa na ebisakore biabo bikairwa na absomba bao bakogogetie, engencho yaye, Abaisraeli abwo berwete gokora ogwancha kwao. Abamura bamwabo Dina bakabea ase ogochecherigwa gwa Dina mosubati omwabo. Nabo ekero bagosabete aye okabaa obokoonyi. Aye Nyasae, Nyasae one, onyigwe inche omokungu omoboraka; Ⅴ ekiagera gwakorire ayaetire, na aria areo bono na aria agochia goocha. Ayareo bono na aria agochia goocha naye kwayarobeirie; aria gwatagete aikeranire. Ⅵ Ogwancha kwao gwakorekanire nakorokwo nigo kogoteeba “Rora nao inde aa!” Ekiagera emeroberio yao yonsi nigo egoikerana; naye nigo omanyete aria gwaetirie nonya taraba. Ⅶ “Bono aye Omonene, Abaashuru nigo bare nechinguru kobua ritang’ani nabo okobua kwabo nigo kore ase abarwani baabo abwo bagotaara na amagoro naboigo baria bariinete chibarasi. Barabwo nigo basemeretie ase ebirwanero biabo korende tibamanyeti buna aye Omonene nore nokobua kwogokiria esegi. Omonene nario erieta riao. Ⅷ Ase obororo bwao, korera chinguru chiao erio obutorane chinguru chinene chire ase abarwani baabo. Barabwo nigo baroberetie gosaria esiko ye egesasiimero gie Hekalu yao. Boigo gotaagora emetobwa yegesasiimero kiao nemioro yaabo. Ⅸ Rora buna bare abaenenu! Baumorere endamwamu yao! Inche nomokuungu omoboraka, korende nagosabire ong’e chinguru erio inche ng’ikeranie omoroberio one. Ⅹ Nagosabire okorere obotantanu bwa amang’ana ane obasirie bonsi, abanene na abasomba boigo. Ee, okoboko kwomokuungo konyaare kobuna na gosaria oboenenu bwabo. Ⅺ Inaki okobua kwao tikori ase obonge bwa abarwani gose chinguru chiabo. Aye Nyasae bwa abare abaitongo boigo nigo ogokoonya abagokorerwa bobe ase okoonerwa. Abare abooro naende batari nomokoonyi nigo okobaa ogokoonya. Nigo okobatooria baria batari nogosemeria. Ⅻ Aye Nyasae, o Sokoro yane Simioni, aye Abaisraeli basemeretie, Nyasae o igoro na ense, aye Omorwoti bw’ebitongwa bionsi, na omotongi bwa amaache, nagosabire oigwe ogosaba kwane. ⅩⅢ Nagosabire okorere amang’ana ane yobotantanu erio arente ogosaria na goita baria barobeirie amabe ase okobwatana ne Hekalu yao, gosaria egetunwa kia gia Sayoni amo nense yonsi kwabaete abanto bao. 9:13 rora Est (Ekegiriki) 24:25 ⅩⅣ Gekore egesaku kiao na kera egesaku kemanye buna aye Nyasae omonguru ore nokobua gwonsi boigo buna naye obarendete Abaisraeli.”