Ⅰ Ebiro ebio, Yuditi akaigwa aria akorekanete. Ere nomoiseke o Merari mosinto bwo Okisi o Yosefu mosinto bwo Ozieli, mosinto bwe Elikia, mosinto bwa Anania, mosinto o Gidioni, mosinto o Refaimu, mosinto o Hitubu, mosinto bwe Elia, mosinto o Hilikia, mosinto bwe Eliabu, mosinto o Nathanieli, mosinto o Salamieli, mosinto o Sarasadai omwana o Israeli. Ⅱ Omosacha o Yuditi Manase oyio orenge oyo bw’egesaku ekemo nomorugi oye na orooreria oromo nere konye okuure ase ebiro bierigesa ri’esairi. Ⅲ Ere nigo akwete ase ribereera riomobaso omonge ekero atenenerete abakori emeremo baye ase bareenge koboa emesaima yengaano. Akairana koraara ase oborere bwaye. Erio ere agakwa kare ase omochie oye agwo Bethulia. Agatindekwa ase chimbeera chi’abaanto bamwabo gati yomochie o Dothani na Balamoni. Ⅳ Yuditi akamenya ase engaki yemiaka etato ne emetienyi ene kare omoboraka. Ⅴ Ase engaki eyio ya amagombo akeboyia eyanga ye chigunia neyoboboraka ase ekenama kiaye. Akariosia egetwori kiaye sang’ina na akaba oraire aroro Abag 3:20; 2 Abar 4:10 Ⅵ Korwa ebiro ebio abeete omoboraka, akeng’ata chingaki chionsi otataiga rioka chimogoroba chiogochaakera rituko riesabato, esabato enyene, omogoroba bwe rituko riomotienyi omoyia, rituko riomotienyi omoyia, emeyega amo na amatuko yokogooka ase enyomba ya Abaisraeli. Ⅶ Ere nigo arenge omonyakieni mono. Nyagosira omogaka oye Manase namotigerete chitaabu, n’echifeta abakori emeremo na abasomba abasacha na abakungu, chitugo amo nemegondo ebio abeete gakobirenda bionsi buya. Ⅷ Tanyorekanete monto onde okomokwana bobe ekiagera amoirogete Omonene ase okwerwa. Ⅸ Ekero Yuditi aigwete buna okobora kwa amaache karenterete abanto gochaandeka goika kwemurunganeria abaraai baabo naboigo buna Uzia abarierete eira ase okobaa amaache magega ya amatuko atano, Ⅹ Yuditi akamotoma omosomba oye omoiseke oyio otenenerete enyomba yaye abarangerie Kabirisi na Karimisi abwo barenge abagaaka abanene ase omochie obo. Ⅺ Ekero baigete, Yuditi akabateebia, Ntegerere inwe abarai ba Bethulia. Inwe mwakorire okomocha ase ogokwana na gwesiba ase okobariera abanto chiira buna mwakora ase rituko ria reero, boigo ase ogwancha korwa omochie oito ase ababisa onye Nyasae tagochia gototooria ase amatuko a bwango. Ⅻ Inaki yanyaarekana ase more inwe kobogoria ribaga ri’Omonene, komoteema Nyasae na gwesoanania ase amang’ana ya abanto? 8:12; Ayub 38:2 ⅩⅢ Nigo mokomoteema Omobui! Inwe timomanyeti kende naende timokomanya. ⅩⅣ Inwe timokonyaara korenga chinkoro chia Mwanyabaanto gose ebirengererio biabo; inaki rende moranyaare komanya chiseemi chia Nyasae ere oyotongete ebinto bionsi gose komanya ebirengererio na aria arigetie ere omonyene? Teri bo inwe abaminto! Tomobaisa komobeia Omonene oito! ⅩⅤ Ise koba tatageti gototooria ime ya amatuko ayio atano, nabo eranyarekane atorende korwa ase obokong’u ase amatuko amaange buna ere omonyene anchete, boigo buna ere are nokobua kwogotosiria ase obosio bwa ababisa baito. ⅩⅥ Inwe timori nokobua gwokorua obomanyi ase emeroberio emotungetie Omonene Nyasae oito. Nyasae tari kogoswa gose gokorerwa echeche buna ere ase Mwanyabaanto. ⅩⅦ Komenta na ayio, buna intwe tosemeretie ogotooreka korwa ase are, tiga boigo tomoreere atokoonye; keraabe okwo nakwo ogwancha kwaye, nanyaare koigwa ekerero giaito. ⅩⅧ Buna ere reero iga ase ebiro ebi; tari nonya nomonto oyomo ase egesaku giaito gose ebisaku biaito, omoamate gose ekenyoro kegosasiima enyasae eroisirie na amaboko a Mwanyabaanto buna yarenge agwo kare. ⅩⅨ Nakio kiagerete chisokoro chiaito chiatigetwe chigaitwa ase emioro chigakwa na gooswa, erio bagasira bare nemechaando yokoumokerwa na ababisa baito. ⅩⅩ Ase ensemo yaito intwe abanyene titori gosasiima nyasae ende otatiga Omonene. Ase ogo tiga tobe nogosemeria buna tagotogecha intwe gose onde bwensi ase egesaku giaito. ⅩⅪ Kerabe ekeene ng’a batoirire intwe, rirorio orogongo rwonsi rwa Yudea nigo rogochia koirwa, nonya na ase aito achenu natagorwe na intwe abanyene toakanere ogosaria okwo namanyinga aito itwe abanyene. ⅩⅫ Ogoitwa kwa abaminto, okoirwa gwe ense yaito na ogosirigwa kwobotenenku bwaito nigo birabarwe igoro yaito intwe abanyene ime ase egati yebisaku ebio togochia gokorera obosomba. Boigo abanene baito abayia inabatochaaye buna intwe negesaku ekebe kere nemeroberio emebe. ⅩⅩⅢ Buya bonde tiboiyo togochia konyora ase obosomba bwaito ekiagera Omonene Nyasae nakore bionsi koba obosooku. ⅩⅩⅣ “Inwe abaminto, bono netogwenerete tobe ekiorokererio ekiya ase abaminto ekiagera obomenyo bwabo nigo boraabe ase tore, naboigo ase aachenu: Hekalu negesasiimero nigo bire ase oboreendi bwaito. ⅩⅩⅤ Netogwenerete boigo komoiraneria ng’a mbuya mono Omonene Nyasae oyio bono origetie gototeema buna achiteemete chisokoro chiaito. ⅩⅩⅥ Inyora buna amoteemete Aburahamu amatemwa onsi ase Isaka naria amonyorete, boigo aria amonyorete Yakobo ekero omokorerete Labani ng’inarome, ase ense ya Mesopotamia agwo Siria. ⅩⅩⅦ Ekiagera koreng’ana nogoteemwa okwo aroberetigwe n’Omonene ase ogoteema chinkoro chiabo, eke bono tikeri egesiomba eki’Omonene agotakania korende nogokuurera Omonene akobarentera baria bamwanchete.” ⅩⅩⅧ Erio Uzia akamoteebia Yuditi, “Aria onsi gwakwanire nigo akorwa ase enkoro engiya na onde taiyo okoamereria ing’ana rinde rionsi. ⅩⅩⅨ Rituko ria reero tari rirorio ritang’ani kworokia obong’aini bwao. Intwe ntokomanyete korwa ase obwana bwao buna omonto omonyaseemi na obwate enkoro endemu. ⅩⅩⅩ Korende ase engencho yokorang’a mono barabwo mbabetererie tobikeranerie chiira echio totanyaare kobuna. ⅩⅩⅪ Aye oyomoirogete mono Omonene, koranche otosabere Omonene atorentere embura erio chinsooko chiaito chitware amaache erio ogosira gwaito gotenene.” ⅩⅩⅫ Erio Yuditi akabairaneria, “Ntegerere, inche nindigetie gokora ring’ana riranyaare koinyorwa na tirinyaare kwebwa ase ebiare bionsi bia abaibore baito. ⅩⅩⅩⅢ Ase obotuko bwa reero moreende ase egesieri kiomochie. Inche amo nomokori emeremo one omoiseke inatosoke isiko yomochie. Magega rituko riria kwariete chiira koyorwa omochie oito ritaraika, Omonene nankore inche kobatooria Abaisraeli. ⅩⅩⅩⅣ Nonya nabo timobaisa kombooria keria ndigetie gochia gokora ekiagera tinkobamanyia goika nagekorire.” ⅩⅩⅩⅤ Uziaamo na abanene bonsi bakamotebia, “Ogende nomorembe! Tiga Omonene Nyasae akorae goikerania egesiomba ase ababisa baito.” ⅩⅩⅩⅥ Bakarua ase ekegutu kiarenge egetangora igoro bakairana gochia sobo.