Ⅰ Ase rituko riarenge kobwatia, Holoferne agasangereria abarwani baye amo na abaande baria beruete kobwatana nere bonsi. Akabachiika kogeenda Bethulia erio babagwere Abaisraeli goetera ase chinchera chi’ebitunwa. Ⅱ Bakang’anyia chiema chiabo goika ase rikura rire ang’e nomochie o Bethulia. Abarwani baye nigo barenge abange mono, abakogeenda n’amagoro abarwani 170,000, abagochira chibaarasi, 12,000 komenta nebirwanero na baria barenge gotaara babibogoretie. Ⅲ Egetwori kiabo bariosetie agwo ang’e nomochie o Bethulia ase chingegu yakarooche nigo kiarenge ekenene mono. Nigo yarenge engare ebwatekaine korwa omochie o Dothani goika omochie o Balibaimu na obotambe borwete korwa Bethulia goika omochie o Kaimoni ase chinsinyo chia Esidireloni. Ⅳ Ekero Abaisraeli barooche obonene bwa abarwani baria, bagasogwa nomoondoko omonene bagatebania oyomo ase oyonde, Abarwani aba nigo bararie kera egento baraikeere. Nonya nechindagera chionsi chigachire ase ebitunwa ase chiirema nechinsemo chiimokerete igoro tichikobaisana. Ⅴ Ase omoondoko Abaisraeli bonsi bakabogoria ebirwanero bagatongia ebieri erio bakarenda bogakia. 7:5 rora 1 Maka 12:28-29 Ⅵ Rituko riarenge kobwatia, Holoferne akabaraa abarwani baye bagotaara namagoro erio abanto b’egesaku kia Israeli banyaare kobarora buya. Ⅶ Akaunenkia buya chinchera chigosoa ase omochie nechinsooko chikobairera amaache. Ataraua agwo, agachiira chinsooko echio na kobeka abarendi bachitenenere. Ⅷ Erio abamenyi ba Bani Esau, na abarai bonsi ba abanto ba Moabu na abarai b’ense mbarabare yenyancha ya Mediterania bakamochira Holoferne bakamoteebia, Ⅸ “Twakoboririe aye omonene oito erio abarwani baito tibabugwa. Ⅹ Abaisraeli aba tibasemereti oborendi bokorwa ase ebirwanero biabo, korende ase ebitiiro bire ase bamenyete na nigo teri aororo koriina ebitunwa ebio. Ⅺ Igo teri buya kobabeeka amo abarwani abwo erio nario bataakwe gose goitwa. Ⅻ Otigare ase egetwori erio ayobarigereria abarwani ase ebitwori biabo. Ring’ana rinene nokoira chinsooko chire inse yebitunwa, ⅩⅢ egekogera nchirochio chikobaa abamenyi ba Bethulia amaache. Erang’o nero eragere berue abanyene ase ore. Agwo boigo, intwe abanyene toriine goina igoro ase ebitunwa na goikerania ng’a omonto nonya noyomo tari gotama korwa ase omochie oyio. ⅩⅣ Barabwo mbarose ase engencho yenchara, boigo abakungu n’abana baabo mbarare ase chinchera chire gati yechinyomba chiabo nonya ekero totarabaikera ase okobarwania. ⅩⅤ Ase enchera eyio nonyaare gweakanera egesiomba ase bare, ekiagera barabwo tibacheti gokoarigania ase okorigia okobwatana kwomorembe”. ⅩⅥ Holoferne amo na abanto baye bonsi bakagokigwa ase omoroberio oyio. Igo agaetia gokorera obosemia obwo aetwe. ⅩⅦ Erio abarwani ba Moabu amo na abarwani 5,000 na Abaashuru bakanyia egetwori kiabo gochia ase ebitogomera erio korenda chinsemo chiria chiechinsooko chigotubokera. ⅩⅧ Basinto be Esau amo nabasinto ba Amoni bakageenda kobeeka ebitwori biabo ase ebitunwa birigereretie Dothani. Abande ase abanto baabo bakageenda ensemo ya Irianyi ya moocha ase omochie bwe Egirebeli ang’e nomochie o Chusi agwo ase chingegu chi’orooche rwa Mokimuri. Abatigari ba abarwani bonsi ba Asuri bakabeeka egetwori kiabo ase rikura bagaetanana ense yonsi. Chiema nebirwanero biabo bi’eseegi bigakora egetwori kororekana koba ekenene ase engencho biarenge ebinge kobua. ⅩⅨ Bono, Abaisraeli bakamoreera Omonene Nyasae abatoorie. Bagasiria ogosemeria kwabo kobwatekana nobonge bwa ababisa abwo babaetananete na koribia kera enchera yobotamero. ⅩⅩ Abarwani bonsi ba Asuri bariinete chibarasi, ababwate chigari chi’echibarasi amo na baria barenge gotaara na amagoro, bakabaetanana Abaisraeli ase amatuko emerongo etato na ane (34). Amaache akaera korwa kera ase ekebekerero abenyi ba Bethulia babwate. ⅩⅪ Na amaache onsi begacherete akaera; tarenge omonto orenge koigotia erang’o ekigera bare kogaberwa make make. ⅩⅫ Abana bagachaaka kogoya; kera ase obomenyo bwabo na ase chinchera, abakungu na abasae bagachaaka kogireka. Tarenge omonto nonya noyomo obwate chinguru chimoisaine. ⅩⅩⅢ Erio abanto bonsi, abasacha, abakungu amo na abana bakamoetanana Uzia bagaaka egeturi bakoboora, ⅩⅩⅣ “Nyasae abagambie ase onsi aria mwatokoreire. Mwatorenteire amaakwa amanene ekiagera motakorete okobwatana kwomorembe na Abaashuru. ⅩⅩⅤ Bono rora, titori nonde oratotorie! Nyasae otobeekire ase amaboko abo naboigo inatokwe ase obosio bwabo totabwati obokoonyi. ⅩⅩⅥ Barangerie bwango; oyorwe omochie oirwe na abanto ba Holoferne amo nabarwni baye. ⅩⅩⅦ Nigo ere buya inwe koba abooswa baye kobua buna tore bono, nabo toraisa koba moyo kobua korora abana baito ebing’werere bagokwa tobarigereretie boigo abakungu na abana baito bagotweka mo. ⅩⅩⅧ Bono tiga igoro nense, nony’Omonene Nyasae oito boigo, ere omonene bw’echisokoro chiaito, ere oyotoagete ase ebibe biaito amo nebibe bie chisokoro chiaito. Nigo tokobasaba mokore ayio bono na reero iga”. ⅩⅩⅨ Erio ekerero giokweumia gekaba ase omosangererekano bwonsi, na abanto bonsi bakamoreera Omonene Nyasae ase eriogi rinene. ⅩⅩⅩ Erio Uzia akabateebia, “Abaminto, timokwa omoyo! Toremererie ase amatuko atano, goika rituko erio, Omonene Nyasae oito, Omonene natororere amabeebe; nekeene, ere tagototugutera are. ⅩⅩⅪ Ekero eraabe ng’a nonya magega ya amatuko ayio atano titonyoreti obokonyi bonde bwonsi, rirorio nabo ndakore buna mwateebire.” ⅩⅩⅫ Uzia akabaa ribaga abanto bakagenda chinka chiabo. Abasacha bakairana gochia ase oborendi bwabo boigo abakungu na abana bakairana gochia inka. Omochie bwonsi okaba nokoiguswa okonene.