Ⅰ Magega yerirorooche erio riokoamererania na amang’ana ya Akioro riategereire, Holoferne ejamadari ya abarwani ba Asuri akamoiraneria Akioro, ase obosio bwa abarwani bonsi abwo bakomboetwe korwa ase chingegu chia enyancha ya Mediterania na Abamoabu. Ⅱ Aye ning’o Akioro ase obosio bwa abarwani bakomboire korwa Efraimu, erio bwekore koba omobani? Ning’o nyasae kobua Nebukadinesaro? Ⅲ Nebukadinesaro nabogorie abarwani baye na kobasireria are abanto abwo korwa ase obosio bw’ense. Nyasae obo takonyara nonya ng’ake kobakoonya. Intwe abakoreri b’omorwoti Nebukadinesaro nigo togochia kobasiria ara rimo rioka. Barabwo tibakonyaara gotenena ase obosio bw’echinguru chia abarwani baito. Ⅳ Nigo torabasambe rimo rioka, ebitunwa biabo inabiichore amanyinga na emegondo yaabo eichore ebitondo. Tibakonyaara koamererania naintwe. Omorwoti bw’ense yonsi ere Nebukadinesaro, nere ochiikire ng’a goika tobasirie bonsi. Amang’ana gwakwanire ase tore tabwati engencho ende yonsi. Ⅴ Korende Akioro, aye ogorire na Abaamoni aye nomorwa abande. Tokondora naende ase obosio bwao goika ebiro ndabasirie abanyabigoti bikong’u abwo barwete ase ense ya Misiri. Ⅵ Magega yaye abarwani baane mbagokenyane nomoyio. Nobe oyomo bwa baria bagochia goitwa. Ⅶ “Bono abanto baane mbakoire na gokobeeka ime yomochie oyomo agwo ase ebitunwa ase ebisaku bia Abairaeli, Ⅷ naye nao orachie gokwera amo na Abaisraeli abwo. Ⅸ Ekeene onye bwegenete ase enkoro yao ng’a barabwo tibari gochia gokwa, nagoteebirie nga tiriri ring’ana riane nonya nerimo riragwe bosa.” Ⅹ Holoferne akabachiika abasomba baye abwo bareenge gokora emeremo ase chiema chiaye bamobwate Akioro na komoira goika omochie o Betthulia erio bamoererie Abaisraeli. Ⅺ Abatomwa baria bakamobwata Akioro, bakamosokia isiko yomochie na komoira goika ase rikura. Korwa aroro bakamoira goika ase ebitunwa ase ensoko yarenge ang’e nomochie o Bethulia. Ⅻ Ekero abanto b’omochie oria barooche abanto baria bagocha ang’e nomochie obo, bakabogoria ebioge biabo na kearigania agwo ase ebitunwa igoro. Bakabeeka amagena ase chinduruche chiabo na kobarumbereria abarwani ba Holoferne. Ekaba abarwani ba Holoferne tibanyaara koriina ebitunwa biabo. ⅩⅢ Ekababetereria kwebisa ase amakere yebitunwa na agwo bakamosiba Akioro chingori. Bakamotiga aroro na koirana gochia ase omonene obo. ⅩⅣ Ekero Abaisraeli baigete korwa ase omochie obo, bakamonyora Akioro na komosibora korwa aria ase asibire na komoira ase abanene b’omochie obo. ⅩⅤ Abaanene baabo ase engaki eria nigo barenge Uzia mosinto o Mika, korwa ase egesaku gia Simioni, Kabirisi mosinto o Gothonieli na Karimisi mosinto o Melikieli. ⅩⅥ Abaanene abwo bagasangereria abagaaka b’omochie na abakungu amo na abana bakaminyoka gochia ase omosangererekano. Ekero Akioro arentetwe aroro, bagachaaka komounenkia. ⅩⅦ Akioro akabaorokeria kera ring’ana rikwanetwe ase omosangererekano bwa Holoferne igoro yeseegi. Akabateebia aria ere omonyene akwanete ase omosangererekano oyio bwo Holoferne na abarai ba Abaashuru na buna Holoferne etogetie ase aria are gochia kobakorera Abaisraeli. ⅩⅧ Ekaro baigwa ayio onsi, bakagwa inse ase okomosasiima Nyasae. Bakamoreera erio bagateeba, ⅩⅨ “Aye Omonene Nyasae ore igoro, rigereria buna ababisa baito bagototianera na gwetogia. Tororere amaabera intwe abanto bao”. ⅩⅩ Bakamoremia Akioro buna takonyorwa na amabe ande onsi na komotogia ase onsi aria akorete. ⅩⅪ Magega y’ogokoora omosangererekano Uzia akamoira goika bwoye na kokorera omoyega ere amo na abagaaka bonsi ase omochie oye. Ase obotuko bwonsi, bakamogaramera Nyasae bwa Abaisraeli abatoorie.