Ⅰ Ekaba ekero risase rigochia korimera, abakori emeremo baye bakaayerera gosooka. Bogoa agasieka egesieri korwa isiko akabaigorera baria bonsi barenge komokorera omonene oye bakageenda ase amarere abo koraara ekiagera konye barosire mono ase engencho omoyega oirete ebiro ebinge. Ⅱ Yuditi agatigara ore bweka ere amo na Holoferne oyio orambereretie borere ase ogotinda okonene ime ase egetwori. Ⅲ Omokoreri o Yuditi akaba omoganyete omonene oye isiko ye enyomba erio bagende gosaba buna yarenge amenaria abo a kera obotuko. Yuditi boigo konye omoteebirie Bogoa ng’a nasooke kogenda gosaba buna botaambe. Ⅳ Ase ebiro ebio abageni abanene amo na abanto bonsi konya basookire erio bagatigara Yuditi na Holoferne boka ime ase enyomba. Erio Yuditi agatenena mesia y’oborere bwa Holoferne, agasaba ase omoyo oye, “Aye Omonene Nyasae Omobui, nkoonye ase ring’ana eri indigetie gokora ase engencho yobonene bw’omochie o Yerusalemu. Ⅴ Bono nario ebiro biokobatooria abachoore bao; inkoonye inche goikerania omoroberio one bwokobasiria ababisa aba batoimokeire.” Ⅵ Yuditi agasuka goika ase omotobwa bwoborere na omotwe bwa Holoferne, erio akabogoria omoyio oye obirende osung’unanirie aroro. Ⅶ Agasuka goika ang’e kegima, akamobwata Holoferne erio agateeba, “Aye Omonene Nyasae bwa Abaisraeli, ing’a okobua bono!” Ⅷ Erio Yuditi akaimokia omoyio oria igoro na komobutora ebigoti biaye mara kabere nechinguru chiaye chionsi, akayosomora omotwe bwa Holoferne. Ⅸ Agakurura omobere bwa Holoferne akayobeka nyaaro yoborere erio agasooka akamoa omokori emeremo oye omiseke omotwe bwa Holoferne. Ⅹ Omoiseke oria akayobeeka ime ye egunia yendagera. Erio Yuditi na omoiseke oria bagasoka, buna yarenge engencho yaabo kogenda gosaba. Bagaetera ase enchera yegetwori kia Abaashuru, bagaeta ime yerikura na koriina egetunwa goika ang’e negesieri kiegesieri kiomochie o Bethulia. Ⅺ Ekero baikire egeka ake, Yuditi akabarangeria abarendi barenge ase egeita akabora, “Igora egesieri! Igora egesieri Omonene Nyasae oito nao are naintwe. Ase rituko ria reero naende oorokirie okobua kwaye ase abanto b’egesaku kia Israeli ere okorire okobua kwaye ase ababisa baito.” Ⅻ Ekero abasacha baigwete eriogi ria Yuditi, bakarindoka ne chimbero gochia ase ebiita bi’omochie korangeria abagaaka. ⅩⅢ Erio kera omonto, abasacha na abamura bakaminyoka gochia ase ebiita. Taba nonya noyomo bwegenete ng’a Yuditi oiranire. Bakamoigorera egeita ere amo no omokoreri oye omoiseke, bakabaarigania. Erio bagauta omorero erio banyoore oborabu, bakabaetanana abakungu abwo babere. ⅩⅣ Yuditi agaaka eriogi erio agateeba, “Motogie Omonene! Ee, moe obonene. Motogie Nyasae ere oyio otana gotiga kobarorera Abaisraeli amaabera. Ase obotuko bwa reero osiririe ababisa baito goetera asende inche.” ⅩⅤ Erio akayorusia omotwe bwa Holoferne ase egunia eria yendagera, akaboorokia abanto basangererekanete, erio akabateebia, Oyo aa nomotwe bwa Holoferne ejamadari ya abarwani ba Asuri. Neke nakio ekiebisio kioborere ase aramberetie ase okoraara okonene ase ogotinda kegima. Omonene omoitire Holoferne goetera ase omokungu. ⅩⅥ Nigo natianire ase Omonene oyio ondendire ase emeremo eyio narenge nero, ekiagera ekieni kiane kimong’ainete Holoferne goika ase ogokwa kwaye; Holoferne takoreti ebibe nainche, ere takorete ogosaria asende gose gonkorera obosooku. ⅩⅦ Kera omonto ase omochie akabwatwa nomoichano. Bagatugama ase okomosasiima Nyasae ase ogosaba bakoboora, “Otogiwe aye Nyasae oito goika kwababuire ababisa ba abanto bao.” ⅩⅧ Erio Uzia agateeba, “Aye Yuditi omosubati one, Nyasae Ore Igoro Mono ogosesenirie kobua abakungu bonsi ase ense engima. Inaki toranyaare komotogia Omonene oyo otongete igoro na ense! Ere nigo akoraete goika nonya nekero kwarenge koyonacha omotwe bw’omobisa oito omonene. 13:18 rora Abag 5:24; Luka 1:28,42 ⅩⅨ Okwegena kwao ase Omonene ekeene tigokonyaara kwebwa na baria baraabe bakweinyoria okobua kwa Nyasae. ⅩⅩ Tiga Nyasae agosesenie nesiko etakoera ase onsi aya gwakorire. Tiga Omonene agosesenie ekiagera gwatigarete koba omwegenwa na tikwairete kobeeka obogima bwao ase akong’u ekero egesaku giaito kiamigetwe mono. Aye okagenda motwe korwana nogosirigwa gwatoetananete, okabwatia enchera endonge ase obosio bwa Nyasae oito.” Erio abanto bonsi bakairaneria, “Amina, Amina!”