Ⅰ Erio Yuditi akabateebia, “Abamiinto, ntegerere bono,, bogoria omotwe oyo moyotonge igoro ase enyasi yomochie oino. Ⅱ Chora omorai erio mambia chuni ekero bogokiamoka mobogorie abamura abaremu babogoretie ebirwanero biabo, basoke isiko yomochie, babe buna baria baimogete kogenda gochia gokeumokera egetwori kia Abaashuru; korende timotirimboka. Ⅲ Abarendi ba Abaashuru mbabogorie ebirwanero biabo na komonyoka gochia ase ekambi gochia kobatura abanene baabo b’esegi. Abaanene abwo nabarabwo mbamonyoke gochia ase enyomba ya Holoferne komotura, korende tibamonyora. Abwo abarwani bonsi betumate koirana gochia magega ekero inwe mogosuka gochia motwe erio mobagwere. Ⅳ Abwo inwe amo na Abaisraeli bonsi mobarwe magega na kobaita ekero bagotama. Ⅴ Korende ekero motarakora ayio onsi, ndetere Akioro amomanye na komorora omonto oyio ochaayete Abaisraeli na komorenta Akioro ase tore ase ogokagera ng’a Akioro nigo agocha goitwa.” Ⅵ Barabwo bakamorangeria Akioro korwa ase arenge mwa Uzia. Korende ekero achete na koyorora omotwe bwa Holoferne ore ase amaboko y’oyomo ase abanto basangererekanete, akagireka akagwa inse. Ⅶ Ekero bamokonyete komotenenia, Akioro agatung’ama ase amagoro a Yuditi agateeba, “Gwaseseniigwe ase egati ye chinyomba chionsi chia Yuda; na ase kera egesaku abwo baraigwe erieta riao rigwatorwa inabegose. Ⅷ Bono nagosoroire onteebie aria gwakorete ase amatuko ayio onsi aetire.” Ⅸ Magega gakoorire kobaenekeria, abanto bagaaka eriogi riomogooko na omochie omogima okabaitaberia. Ⅹ Ekero Akioro aigwete ari’Omonene bwa Abaisraeli akorete, ere akamwegena Nyasae n’enkoro yaye yonsi. Akioro akaarokigwa na gokorwa koba oyomo ase ekeombe kia Abaisraeli, naboigo abaibore baye bonsi goika reero iga. Ⅺ Mambia yaye, Abaisraeli bakayotonga omotwe bwa Holoferne na koyosunga igoro ase enyasi yomochie. Abasacha bonsi bakaimoka bare nebirwanero biabo ase ebikosi biabo. Bagachaaka gotirimboka ase ebitirimboko bi’omochie. Ⅻ Kegima ekero Abaashuru babarooche, bagatoma amang’ana gochia ase abateneneri baabo, na abateneneri abwo bakabamanyia abanene baabo, abakamanda baabo be chilifu na abanene ba igoro baande. ⅩⅢ Abaanene abwo bakageenda ase enyomba ya Holoferne na komomanyia oria otenenerete amang’ana abene ya Holoferne; “Yeture ejamadari! Abasomba baria ba Israeli betiemire goocha ase esegi naintwe erinde intwe tobasirie!” ⅩⅣ Bagoa agasoa nyomba na koyenyegeria ebasia ase enyomba ime ase Holoferne areenge koraara (ere nigo akagerete ng’a Holoferne nigo araire borere amo na Yuditi). ⅩⅤ Korende ekero ataraigweigwa, akabisioria chibasia chiria gochia ensemo na gosoa nyomba. Akegosa ekero anyoorete omobere bwa Holoferne otari na motwe ase egeteni egeke kia amagoro. ⅩⅥ Bogoa agaaka egekuuro, akarera n’amayianda akeumia agakuura na gotandora chianga chiaye. ⅩⅦ Akagenda ase enyomba ase Yuditi arenge koraara, ekero anyoora taiyo akamonyoka gochia isiko na kobarangeria abanene ba abateneneri ase eriogi rinene, ⅩⅧ Abasomba baria nigo batong’ainete! Omokungu oyomo bweka korwa ase Abaisraeli orenteire oborwoti obogima bwa Nebukadinesaro amachaaya. Rora! Holoferne ninse arambereretie ere otigaire riende ritari na motwe! ⅩⅨ Ekero abanene ba abateneneri baigwete amang’ana ayio, bagatandora chianga chiabo nobororo; eriogi riokweumia kwabo gokaigwekana ase ekambi yonsi.