Ⅰ Yuditi akamobaaka Omonene ogoteeba; Mobake Omonene one ase okobugia chikonu, Mobake Omonene one ase ogakania amabaati, moterere ase amariogi ya amateera nechingero chi’omogooko; moimokererie igoro na komosasiima. Ⅱ Ekiagera Nyasaee n’omonene ogotenenia esegi. Nigo antoretie korwa ase amaboko ya baria barenge kominyokia, akang’irania ase obomenyo bwa abanto baye. Ⅲ Abaashuru nigo batirimbogete korwa rogoro; bagatirimboka na abarwani chilifu ikomi. Abarwani abwo bagatuba chindoche ase amakura; na abariini chibarasi baabo bagaichora ebitunwa. Ⅳ Nigo amochetie koyebeeka ense yaito omorero, na goita abasae baito n’omoro, kobarambereria inse ebing’werere, koboosa abana baito na boigo koboosa abaiseke baito. Ⅴ Korende Omonene Nyasae akabaita goetera ase okoboko kw’omokuungu. Ⅵ Etwoni yaabo tiyaitetwe no omosae gose abarwani abanyanguru; gose amamonto amanene tamoumokerete. Korende Yuditi omosubati o Merari, nere omoiyeretie ase obonyakieni bwaye. Ⅶ Akabarentera Abaisraeli abwo bachandire obobui, ekero asoogete nechianga chiaye chioboboraka, agechabera ase obosio bwaye ase ogwetereria na amanukato. Ⅷ Akamiina etukia yaye na koyeboa ekiore, ekeboyia egataani ase okomotega. Ⅸ Egekoroto kiaye nigo kiamogogetie ase amaiso aye, ekieni kiaye gekamosiba ase enkoro yaye. N’omoro okanachanacha riigoti riaye. Ⅹ Abaperisi nigo batengechetiwe nobonyankongo bwaye, ee, Abamedi nigo bairogete obomg’aini bwaye. Ⅺ Barabwo nigo babwatetwe nobwoba ekero abanto baito abwo konya bagoyire baagete egeturi gieseegi; bakabwatwa nobwoba ekero abanto baito konye bagoyire baagete eriogi; bagatabanana na gotama ekero abanto baito baagete eriogi. Ⅻ Abana ba abasomba abaiseke bakabasaamba; bakabaaka chingoma buna abana ba ababisa; bagasirigwa na abarwani ba Omonene oito. ⅩⅢ Nimoteerere ogoteera okoyia Nyasae Omonene one. Aye Omonene, aye nomonene one ore nokobua! Aye nigo ore nokobua okonene, naende tokobugwa. ⅩⅣ Ebitongwa bia bionsi tiga bigokorere aye! Ekiagera aye nigo gwakwanete na bionsi bikabao; nigo kwabiuterete omoika na bikaba ebitongwa biao. Tari oranyaare koamererania nering’ana riao. ⅩⅤ Ebigoro nechinyancha nabiisa gotengecha goika amaroso abo buna amaache, ebitare nigo biranyititoke buna amachoe ase obosio bwao. Korende ase baria bakoirogete aye nobarorere amaabera. ⅩⅥ Ebing’wanso bionsi bigotioka buya tibiri egento ase ore aye; amaguta yebing’wanso bi’ogosaambwa nigo are egento egeke ase ore. ⅩⅦ “Obobe nobwabo ebisaku biria bigochaakia esegi ase abanto bao. Omonene omonyanguru nababogorerie egesiomba ase rituko riekina. Ere natome omorero na amakonde koria emebere yaabo erio barere nokoromwa emiaka yonsi.” ⅩⅧ Ekero abanto baigete ime yomochie o Yerusalemu, bakamosasiima Omonene Nyasae, na magega kobachenirwe, bakarua ebing’wanso biabo bi’ogosaambwa, ebing’wanso biokwerwa na okoruugwa kwabo. ⅩⅨ Bionsi ebio biarenge ebia Holoferne ebio abanto bamoete Yuditi, amo nekibisio abogoretie ere omonyene korwa ase oborere bwa Holoferne, Yuditi akabirwa koba okoruugwa ogochenu ase Nyasae ⅩⅩ Ase ebiro biemetienyi etato, bakagenderera gokora omoyega omonene ase obosio bwe Hekalu ime yomochie o Yerusalemu. Nere Yuditi akaba ore nabarabwo. ⅩⅪ Magega ekero omoyega omonene oerire,, kera oyomo akairana gochia ase enka yaye. Yuditi nere akairana gochia Bethulia na komenya ase omogondo oye. Ase ebiro bionsi bi’obogima bwaye, Yuditi akaba nesiko enene ase ense yonsi ya Israeli. ⅩⅫ Abasacha abange bakarigia bamonywome, korende ere tasogete magega yogokwa kwa omogaka oye Manase. ⅩⅩⅢ Korende chinkuma chiaye chikagenderera koranda. Akamoa omokoreri oria oye omoiseke obosibore. Erio akagenderera komenya ime ase enyomba eria omogaka oye Manase atigete goika agaika emiaka 105. Akamoa omokoreri oria oye omoiseke obosibore. Erio Yuditi agakwa. Bakamotindeka ime yomochie o Bethulia ase embeera yomogaka oye Manase. ⅩⅩⅣ Abaisraeli bonsi bakamoreera ase omokubio oyomo. Korende konye atarakwa, Yuditi akagabera abanto b’eamate yomogaka oye chinibo chiaye, boigo na abaamate baye ba aang’e. ⅩⅩⅤ Onde tatogete orenge kobatianera Abaisraeli ase amatuko onsi Yuditi arenge moyo naboigo emiaka emenge magega yogokwa kwa Yuditi.