Ⅹ
Obotomwa bw’aborokigwa emerongo etano na ebere
Ⅰ Magega ase aya Omonene agachora abande emerongo etano na ebere na babere (72), akabatoma babere babere bamotang’anere kogenda kera omochie na kera aase arengereretie kogenda ere omonyene.
Ⅱ Akabateebia, “Rigesa nerinene, korende abakori emeremo nabake; gaki mosabe Omonene bwe rigesa atome abakori emeremo ase rigesa riaye.
Ⅲ Bwatia enchera; rigereria, nabatomire inwe buna chimanwa chi’eching’ondi gati‐gati ye chisese chi’orosana.
Ⅳ Timobogoria ekemoya, gose esaro, gose ebikoroto; gose timokwania monto nchera.
Ⅴ Na enyomba ende yonsi morasoe, ritang’ani mobore: Omorembe obe ase enyomba eye.
Ⅵ Onye omonto bw’omorembe oreo, omorembe oino noikaranse asare; korende onye taibo, nobairanere inwe.
Ⅶ Mobeere ase enyomba eyio, morie na konywa ebi bakobaa, ekiagera omokori emeremo nagwenerete aegwe eng’eria yaye. Timoetanana enyomba ase enyomba.
Ⅷ Na omochie onde bwonsi morasoe, na abanto b’omochie oyio baabaariganie, karie eki barabae.
Ⅸ Mogwenie abarwaire abareo, mobateebie: Oborwoti bwa Nyasae bwabaikeire ang’e.
Ⅹ Kero kende gionsi mogosoa omochie, na barabwo batabaariganeti, soka korwa aroro, eta ase chinchera chiaye, motebe:
Ⅺ Nonya norotu rw’omochie oino rwabwatereire amagoro aito twarwabusire ase more, korende manya aya, ng’a oborwoti bwa Nyasae bwaikire ang’e.
Ⅻ Nabateebirie, nabe aororo ase Sodomu ase rituko riria kobua omochie oria.”
Okoragererigwa ase emechie etari nokwegena
(Mat 11:20-24)
ⅩⅢ “Obobe nobwao, Korasini! Obobe nobwao, Bethisaida! Ekiagera onye mbiakoregete ase Turo na Sidoni ebikone bie chinguru ebiakoregete ase more, abanto b’aroro anga mbaonchogete kare na goikaransa babegete chianga chi’echigunia na beagete ribu.
ⅩⅣ Korende nebe aororo ase Turo na Sidoni ase rituko riria ri’ekiina kobua ase more.
ⅩⅤ Naye Kapernaumu, noimokererigwe igoro? Noche goikigwa goika Eora y’amakweri.
ⅩⅥ “Oyorabaigwere inwe, nanyigwere nainche, na ere oyorabaange inwe, onyangire nainche, na ere oyoranyange inche, omwangire ere oyontomete.”
Okoirana kwa baria emerongo etano na ebere
ⅩⅦ Baria emerongo etano na ebere na babere (72) bakairana nomogooko, bagateeba, “Omonene, nonya nebirecha biatoigwereire ase erieta riao.”
ⅩⅧ Akabateebia, “Naroche Saitani okogwa korwa igoro buna okomesa.
ⅩⅨ Rora, nabaeire okobua gotindacha ching’iti chionsi, na ebiuge, ne chinguru chionsi chi’oria omobisa; gose gento kende tikeri kerabaite.
ⅩⅩ Nonya nabo timogoka ase aya, ng’a ebirecha biabaigwereire, korende goka ekiagera amarieta aino arikirwe igoro.”
Yeso okoiraneria ng’a mbuya mono
(Mat 11:25-27; 13:16-17)
ⅩⅪ Ase ekero keria Yeso agasasoka ase Omoika Omochenu, akabora, “Nakobakire aye Tata, Omonene o igoro na ense, ng’a kwabisire amang’ana aya ase abare nobong’aini ne chisemi, na koyamaanora ase abana abake. Ee, Tata, oko nakwo kwarenge ogwancha kwao okuya.
ⅩⅫ Naeirwe ebinto bionsi na Tata one; monto onde tari omomanyete Omwana gose nere ng’o, otatiga Tata, gose Tata nere ng’o, otatiga Omwana, na onde bwensi Omwana anchire komoorokeria.”
ⅩⅩⅢ Akaonchokera aborokigwa baye, akabateebia bobisi, “Nasesenirie amaiso aya arorire ayamwarorire inwe!
ⅩⅩⅣ Naki nabateebirie, ababani abange na abarwoti bakarigia korora ayamwarorire inwe, tibayarora, na koigwa aya mwaigure, tibayaigwa.”
Omoreng’anio bwo’mosamaria omuya
(Mat 22:34-40; Mar 12:28-31)
ⅩⅩⅤ Na rora, omworokia bw’amachiiko agatenena okomoteema, okobora, “Omworokia, inki ndakore nyore obogima bwa kare na kare?”
ⅩⅩⅥ Ere akamobooria, “Ase amachiiko inki keriikire? Naki ogosoma?”
ⅩⅩⅦ Akairaneria, “Mwanche Omonene Nyasae oo nenkoro yao yonsi, na omoyo oo bwonsi, ne chinguru chiao chionsi, na obong’aini bwao bwonsi, na omogisangio oo buna bweanchete.”
ⅩⅩⅧ Akamoteebia, “Kwairaneirie buya. Kora iga, nario oramenye amatuko amange.”
ⅩⅩⅨ Omonto oria akarigia gwekora omonyene oboronge, akaboria Yeso, “Omogisangio one nere ng’o?”
ⅩⅩⅩ Yeso akairaneria, “Narenge omonto ore gotirimboka korwa Yerusalemu kogenda Yeriko. Ere akaumera abauri, na barabwo bakamoumokera, bakamorusia chianga, bakamoaka chingoma, bakagenda, bakamotiga oisire gokwa.
ⅩⅩⅪ Ekaba agwo Omokuani oyomo akaoroka, ogoeta ase enchera eria, akamorora, agaeta ensemo.
ⅩⅩⅫ Na Omolawi boigo agachia goika aase aria, akamorora; nere agaeta ensemo.
ⅩⅩⅩⅢ Korende Omosamaria oyomo, kagoeta, agacha aase arenge; ere agachia komoorora, akamororera amaabera.
ⅩⅩⅩⅣ Nabo akamoika ang’e, akamoboa chingoma chiaye, akamoaka amaguta na edivai; akamoriinia ase etigere yaye igoro, akamoira ase enyomba y’abageni, akamorwaria.
ⅩⅩⅩⅤ Goika mambia yaye akarua chisiringi ibere, akaa omonyene enyomba, akamoteebia: Morende buya; na kende gionsi orarue kobua, kondairane naende, ningoakane.
ⅩⅩⅩⅥ Naki rende orooche ase aba iga batato, norori orenge omoamate oye ere oyogwete ase amaboko y’abauri?”
ⅩⅩⅩⅦ Akabora, “Noria omoororerete amaabera.”
Yeso akamoteebia, “Genda naye okore boigo.”
Yeso ogosoa ase enka ya Martha na Mariamu
ⅩⅩⅩⅧ Ekero bare kogenda orogendo rwabo, agasoa ase agachie akamo, na omokungu oyomo, erieta riaye Martha, akamoarigania nyomba mwaye.
ⅩⅩⅩⅨ Ere narenge nomosubati omwabo ore korokwa Mariamu oyio oikaransete ase amagoro a Yeso, koigwa amang’ana aye.
ⅩⅬ Korende Martha nigo arenge gochandeka ase ogokora okonge, akamochiera, akabora, “Omonene, torochi aye buna oyominto antigire ngokora kera egento inche bweka? Moteebie ankonye.”
ⅩⅬⅠ Omonene akamoiraneria, “Martha, Martha, nigo okwerosia na gweichania ase engencho y’ebinto ebinge,
ⅩⅬⅡ korende egento ekemo gioka keganeirie. Mariamu ochorire ensemo ere engiya, eye ataurwe nonde.”