Ⅸ
Yeso ogotoma abatomwa ikomi na babere
(Mat 10:5-15; Mar 6:7-13)
Ⅰ Akarangeria baria ikomi na babere akabaa chinguru na okobua igoro ase ebirecha bionsi na ase okogwenia amarwaire.
Ⅱ Akabatoma korandia oborwoti bwa Nyasae na kogwenia abarwaire.
Ⅲ Akabateebia, “Timobogoria gento ase orogendo rwaino, nonya nenyimbo, gose esaro, gose omogati, gose chitaabu; naende timoba ne chianga ibere.
Ⅳ Naende enyomba ende yonsi morasoe, mobeere aroro goika moruo.
Ⅴ Naende abatabaroiseti, komogosoka korwa omochie oria, mokong’onte orotu rw’amagoro aino, erinde robe kirori ase bare.”
Ⅵ Bakagenda, bagaetanana ase emechie, bakorandia enchiri, na kogwenia abanto chinsemo chionsi.
Ogoichana kwa Herode
(Mat 14:1-2; Mar 6:14-16)
Ⅶ Bono Herode omorwoti akaigwa onsi ayakorekire, agaichanigwa mono, ekiagera abande baare goteeba ng’a Yohana obokiigwe korwa ase abakuure,
Ⅷ na abande ng’a n’Elija oorokire, na abande ng’a noyomo bw’ababani abakoro obokire.
Ⅸ Herode agateeba, “Yohana inamonachete omotwe, korende ning’o oyo rende naigure amang’ana are buna aya?” Akarigia komorora.
Okoragerigwa kw’abaanto chilifu isano
(Mat 14:13-21; Mar 6:30-44; Yoh 6:1-13)
Ⅹ Abatomwa baria ekero bachia koirana bagateebia Yeso amang’ana onsi ayabakorire. Erio akagenda amo nabarabwo bobisi akabaira, gochia ase omochie okorokwa Bethisaida.
Ⅺ Emeganda egachia korora, ekamotunyana, na ere akabaroisia, agakwana nabarabwo amang’ana ’oborwoti bwa Nyasae, akagwenia abarenge nokogania gw’okogwenigwa.
Ⅻ Rigachaaka kogoroba, na baria ikomi na babere bakamochiera, bakamoteebia, “Tiga omoganda ogende goika ase ebichie ne chinsemo chietanaine, banyore aase bakorara amo nendagera, ekiagera aiga nigo tore aase erooro.”
ⅩⅢ Akabateebia, “Inwe bae endagera!”
Bakaboora, “Titobwati kende kobua emegati etano ne chinswe ibere. Gose togende kogorera abanto aba bonsi endagera?”
ⅩⅣ Naki mbarengeo abasacha chilifu isano iga.
Agateebia aborokigwa baye, “Baikaransie abanto aba ase ebiombe, na kera ekeombe koreng’ana emerongo etano.”
ⅩⅤ Bagakora boigo, bakabaikaransia bonsi.
ⅩⅥ Akabogoria emegati eria etano ne chinswe chiria ibere, akarigereria igoro, akabisesenia, akabisamunyora, akaa aborokigwa babiterekere abanto.
ⅩⅦ Bonsi bakaria, bakaigota. Na ebisamunye biria biatigarete bigasangererigwa, bigaichora ebitonga ikomi na bibere.
Okoorokia gwa Petero ng’a Yeso nere Kristo
(Mat 16:13-19; Mar 8:27-29)
ⅩⅧ Engaki eyemo ekero Yeso are gosaba are ere bweka, aborokigwa baye nigo barenge ange nere, akababooria, “Abanto nigo bakobora ng’a ninche ng’o?”
ⅩⅨ Bakairaneria, “Yohana Omobatisi; abande Elija, na abande ng’a oyomo ase ababani abakoro obokire.”
ⅩⅩ Akababoria, “Nainwe nigo mokobora ng’a ninche ng’o?” Petero akairaneria, “Kristo o Nyasae.”
Yeso okobana ogokwa na okoboka kwaye
(Mat 16:20-21; Mar 8:30-31)
ⅩⅪ Akabachiika na kobakania tibateebia monto ring’ana eri,
ⅩⅫ ogoteeba, “Negwenerete Omwana‐o‐Mwanyabaanto anyore ogochandeka ase chinchera chinyinge, na kwangwa nabagaaka, na abakuani abanene, na aborokia b’amariiko, naende aitwe, na ase rituko ria gatato naboke.”
Okorangerigwa kw’ogwekeyia omonyene
(Mat 16:24-28; Mar 8:34—9:1)
ⅩⅩⅢ Agateebia bonsi, “Oyorigetie gontunyana, tiga ekaane ere omonyene, etweke omosalaba oye kera rituko antunyane.
ⅩⅩⅣ Naki onde bwensi orarigie koegera obogima bwaye oyio nabosirie; na oyorasirie obogima bwaye ase engencho yane, oyio naboegere.
ⅩⅩⅤ Ekiagera inki eragwenere omonto karanyore ense yonsi, ko esirie gose gwesaria ere omonyene?
ⅩⅩⅥ Naki kera omonto orandorere obosooku inche na amang’ana aane, Omwana‐o‐Mwanyabaanto kagocha ase obonene bwaye, namororere obosooku ase Ise na ase abamalaika abachenu.
ⅩⅩⅦ Korende nabateebirie ekeene, mbare abanto ase aba bateneine aa, abataigwe amakweri nonya ng’ake, goika barore oborwoti bwa Nyasae.”
Okoonchoka ekieni kwa Yeso
(Mat 17:1-8; Mar 9:2-8)
ⅩⅩⅧ Agachia koba amatuko ang’e atano na atato magega ase amang’ana aya, akaira Petero, na Yohana, na Yakobo, agatiira gochia egetunwa igoro gosaba.
ⅩⅩⅨ Na ekero arenge gosaba, ekieni ki’obosio bwaye gekaonchoka, ne chianga chiaye chikaba chindabu, chikameka‐meka.
ⅩⅩⅩ Na agwo, abanto babere bakarorekana bagakwana nere, nabwo Musa na Elija.
ⅩⅩⅪ Abwo barorekanete ase obonene, na gokwana amang’ana ay’ogokwa kwaye, aya agwenerete goikerania Yerusalemu.
ⅩⅩⅫ Petero na baria barenge amo nere, konya babwatirwe ne chitoro, korende nigo bategesetie, bakarora obonene bwaye, na abanto baria babere bateneine amo nere.
ⅩⅩⅩⅢ Ekero abanto aba baare korua asare, Petero agateebia Yeso, “Omonene, imbuya intwe koba aiga; tokore ebigutu bitato, ekemo ekiao, na ekemo ekia Musa, na ekemo eki’Elija”; tamanyete aya agokwana.
ⅩⅩⅩⅣ Ekero agokwana amang’ana aya riire rigacha rikababisia, bakairoka kobachia gosoa ase riire.
ⅩⅩⅩⅤ Eriogi rigasoka korwa ase riire riria rigoteeba, “Oyo n’Omwana one, Omochorwa one; moigwere ere!”
ⅩⅩⅩⅥ Ekero eriogi riakwanire, Yeso akarorekana ore bweka. Na barabwo bagakira, tibateebia monto ase amatuko aria ring’ana rinde rionsi ri’ayio baroche.
Yeso okogwenia omomura obwatire nekerecha
(Mat 17:14-18; Mar 9:14-27)
ⅩⅩⅩⅦ Rituko ria kabere ekero baare gotirimboka korwa ase egetunwa, omoganda omonene okaumerana nere.
ⅩⅩⅩⅧ Naende rora, omonto oyomo ase omoganda oria agaaka egeturi, okobora, “Omworokia, nagosabire, origererie omomura one, ekiagera ere nomwana one omomoima.
ⅩⅩⅩⅨ Na rora ekerecha nigo gekomobwata, na ere bwango nigo akorera, naende kemogaragaria, erinde asokia amasombogoku, korende tikeri komorua otatiga ase okomosionora mono.
ⅩⅬ Nasaba aborokigwa bao bageserie, korende tibanyara.”
ⅩⅬⅠ Yeso akairaneria, “Inwe ekegori getari nokwegena, naende ekebe, nimbe amo nainwe goika ririri, na koremereria nainwe? Renta omomura oo aiga.”
ⅩⅬⅡ Agachia koba nkomochiera are ekerecha keria gekamoigusia na komoiyeria. Yeso agakania ekerecha keria, akagwenia omomura oria, akamoirania ase ise.
ⅩⅬⅢ Abanto bonsi bagakumia ase okobua kwa Nyasae.
Obobani bwa kabere bwa Yeso igoro y’ogokwa kwaye
(Mat 17:22-23; Mar 9:30-32)
Korende ekero bonsi babete nogokumia ase amang’ana onsi akorete, agateebia aborokigwa baye,
ⅩⅬⅣ “Tiga amang’ana aya asoe ase amato aino, ekiagera Omwana‐o‐Mwanyabaanto ngochia are kobekwa ase amaboko ’abaanto.”
ⅩⅬⅤ Korende tibamanya ring’ana riria, rikaba ndiabiseka ase bare, erinde tibarimanya. Bakaba nobwoba komoboria engencho ye ring’ana riria.
Okworokereria igoro y’oboitongo
(Mat 18:1-5; Mar 9:33-37)
ⅩⅬⅥ Okoengererania kogatuboka ase egati yabo ng’a ning’o ase bare ore omonene kobua abande.
ⅩⅬⅦ Korende ekero Yeso achia komanya ebirengererio bie chinkoro chiabo, akabogoria omwana, akamobeka ang’e asare,
ⅩⅬⅧ akabateebia, “Onde bwensi oramwanche omwana oyo ase erieta riane, onyanchire inche; na oyoranyanche inche, omwanchire ere oyontomete. Ekiagera ere oyore omoke ase egati yaino, oyio nere omonene.”
Okworokereria igoro y’okobogorerania
(Mar 9:38-40)
ⅩⅬⅨ Yohana akairaneria, “Omworokia, ntwarora omonto ogoseria ebirecha ase erieta riao, tokamokania, ekiagera tabwataini naintwe.”
Ⅼ Korende Yeso akamoteebia, “Timomokania, ekiagera oyo otari mamincha yaino nigo are ensemo yaino.”
Yeso okomanora kogenda Yerusalemu. Abasamaria abatakoroisia abageni
ⅬⅠ Ekero amatuko aye aika ang’e kogenda igoro, akamanora kogenda Yerusalemu.
ⅬⅡ Agatoma abatomwa komotang’anera, bagende na gosoa ase agachie k’Abasamaria, bamoroiserie aase.
ⅬⅢ Abanto b’omochie oria tibamoroisia, ekiagera arenge kogenda Yerusalemu.
ⅬⅣ Aborokigwa baye Yakobo na Yohana bagachia korora, aya, bakaboora, “Omonene, norigetie toborie omorero oike korwa igoro obasirie?”
ⅬⅤ Akeonchora, akabakania.
ⅬⅥ Erio Bakagenda ase agachie kande.
Amateemwa ase abwo barigetie koba aborokigwa
(Mat 8:19-22)
ⅬⅦ Ekero baare kogenda nchera omonto oyomo akamoteebia, “Ningotunyane aande onsi ase okogenda.”
ⅬⅧ Yeso akamoteebia, “Ebibwe mbire namakuruma, ne chinyoni chia igoro nchire nebiswa, korende Omwana‐o‐Mwanyabaanto tari nase akobeeka omotwe oye.”
ⅬⅨ Agateebia oyonde, “Ntunyana!” Ere akabora, “Omonene, ritang’ani ing’a ribaga ngende gotindeka tata”.
ⅬⅩ Akamoteebia, “Tiga abakuure batindeke abakuure babo, korende aye genda orandie oborwoti bwa Nyasae.”
ⅬⅪ Naende oyonde nere akabora, “Omonene, ningotunyane, korende ritang’ani ing’a ribaga mbaakere ng’a batigare buya abanto b’enyomba yane.”
ⅬⅫ Yeso akamoteebia, “Omonto tari orabeeke okoboko kwaye ase obokombe bwe chieri, naende arigererie magega, oragwenere ase oborwoti bwa Nyasae.”