ⅩⅦ
Chinkwana chinde chia Yeso
(Mat 18:6-7,21-22; Mar 9:42)
Ⅰ Yeso agateebia aborokigwa baye, “Amang’ana ’okogocha takomocha kooroka, korende obobe nobwaye omonto oria okoyarenta!
Ⅱ Anga mbuya kobua ase omonto oria asungerwe orogena rogosia ase rigoti riaye, arutwe enyancha ime, kobua aragere oyomo bw’aba abake akore ebibe.
Ⅲ Erende; oyomino karakore ebibe, mokanie; karaonchoke, mwabere.
Ⅳ Naende karakore ebibe ase ore ara gatano na kabere ase rituko erimo, karakoiranere ara gatano na kabere na goteeba: Naonchokire, mwabere.”
Ⅴ Abatomwa bakamoteebia, “Omonene, tomentere okwegena gwaito.”
Ⅵ Omonene akabora, “Onye mwarenge nokwegena koreng’aine buna entetere y’omote onga buna omosabisabi, anga mwateebia omokenene oyo: Simoka, bwesimeke nyancha, noro anga nobaigwera.
Ⅶ “Korende ning’o ase more oyore nomosomba okorema, gose okorisia ching’ondi, oramoteebie ekero akorwa mogondo agosoa nyomba: Inchuo bwango oikaranse, orie endagera?
Ⅷ Inee! Takomoteebia: Ebeke ang’e, ondoiserie endagera goika indie inywe, na magega yaye, naye orie na konywa?
Ⅸ Gose nkomoteebia are omosomba oria ng’a mbuya mono, ekiagera akora eki achikwa?
Ⅹ Naboigo nainwe, komorakore onsi aya mwachiikirwe, teba: ‘Intwe nabasomba bataisaneti; twakorire aya atogwenerete gokora.’ ”
Yeso okogwenia abanto ikomi abarenge noborwaire bwa ukoma
Ⅺ Ase enchera ekogenda Yerusalemu Yeso ngoeta arenge egati ya Samaria na Galili.
Ⅻ Ekero are gosoa omochie oyomo, akaumerana nabaanto ikomi abarenge noborwaire bwa ukoma, bateneine are;
ⅩⅢ na barabwo bagaaka eriogi bakaboora, “Yeso, Omonene, tororere amaabera!”
ⅩⅣ Agachia kobarora, akabateebia, “Genda mweorokie ase abakuani.” Kobakogenda bagasibeka.
ⅩⅤ Oyomo obo agachia korora ng’a osibekire, akairana okomobaaka Nyasae ase eriogi rinene,
ⅩⅥ akagwa ase amagoro a Yeso, okomoiraneria ng’a mbuya mono, na ere n’Omosamaria orenge.
ⅩⅦ Yeso akabora, “Tari bonsi ikomi basibeka? Baria kianda, ng’ai bare?
ⅩⅧ Onde tanyorekanete oiranete komotogia Nyasae, otatiga omogeni oyo?”
ⅩⅨ Akamoteebia, “Tenena, ogende; okwegena kwao gwakogwenirie.”
Ogocha kw’oborwoti
(Mat 24:26-28,37-41)
ⅩⅩ Yeso agachia koborigwa n’Abafarisai, “Oborwoti bwa Nyasae indi borache?” Akabairaneria, “Oborwoti bwa Nyasae tibori gocha ase ebimanyererio bikororekana,
ⅩⅪ gose tibakobora: Rora naiga bore, gose: Naaria! Rora, oborwoti bwa Nyasae nigo bore ime ase more.”
ⅩⅫ Agateebia aborokigwa baye, “Amatuko nache morarigie korora rituko erimo ri’amatuko y’Omwana‐o‐Mwanyabaanto, korende timokorirora.
ⅩⅩⅢ Naende nabaabateebie: Rora aaria, gose: Rora aiga! Timogenda, gose timobatunyana.
ⅩⅩⅣ Naki buna okomesa gokomesa korwa igoro ensemo eyemo goika ensemo ende, nabo Omwana‐o‐Mwanyabaanto araache koba ase rituko riaye.
ⅩⅩⅤ Korende ritang’ani nagwenerete konyora ogochandwa okonge, na kwangwa nekegori eke.
ⅩⅩⅥ Naende buna yabeete ase amatuko a Nuhu, naboigo eraabe nase amatuko y’Omwana‐o‐Mwanyabaanto.
ⅩⅩⅦ Barenge koria, bakonywa, bakonyuoma, bakonyuomerigwa, goika rituko riria Nuhu asoete ase obwato; etoigo egaacha, egasiria bonsi.
ⅩⅩⅧ Naboigo buna yabeete ase amatuko a Loti: Barenge koria na konywa, bakogora, koonia, bagosimeka, bakoagacha.
ⅩⅩⅨ Korende ase rituko riria Loti aruete Sodomu omorero na ekebiriti bigatwa korwa igoro, bigasiria bonsi.
ⅩⅩⅩ Naboigo erache koba ase rituko riria Omwana‐o‐Mwanyabaanto araoroke.
ⅩⅩⅪ Ase rituko riria oyore kerama igoro, na ebinto biaye bire nyomba ime, taika abibogorie; nere oyore mogondo naboigo tairana inka.
ⅩⅩⅫ Moinyore moka Loti.
ⅩⅩⅩⅢ Oyorarigie koegera obogima bwaye nabosirie, korende oyorasirie obogima bwaye nabonyoore.
ⅩⅩⅩⅣ Nabatebirie, obotuko boria abanto babere nababe ase oborere obomo, oyomo nairwe, na oyonde natigwe.
ⅩⅩⅩⅤ Abakungu babere nababe bagoseera ase orogena oromo; oyomo nairwe, na oyonde natigwe. [
ⅩⅩⅩⅥ Abanto babere inababe mogondo, oyomo nairwe, na oyonde natigwe.]”
ⅩⅩⅩⅦ Bakamobooria, “Ng’ai Omonene?”
Akabairaneria, “Ase ribego rire nao chinsoti chigosangererekana.”