ⅩⅧ
Omoreng’anio bw’omoboraka na omogambi
Ⅰ Yeso akabateebia omoreng’anio ng’a nebagwenerete komosaba Nyasae botambe, tibakwa emioyo,
Ⅱ akabora, “Narenge omogambi ase omochie gete, otasigete Nyasae, gose taare koyiera monto.
Ⅲ Na ase omochie oyio narengeo omoboraka orenge komochiera botambe, ogoteeba: Ngambera boronge ase omosiira one.
Ⅳ Omogambi oria ase ekero egeke tancha; magega agateeba ase omoyo oye: Nonya inche tinsigeti Nyasae, gose tindi koyiera monto,
Ⅴ korende ekiagera omoboraka oyo andosirie, nimogambere boronge, tacha kondosia ase ogonchichera botambe.”
Ⅵ Omonene akabora, “Igwa aya omogambi otari omooronge agoteeba.
Ⅶ Inee! Nyasae takobanyorera oboronge abachore baye, abakomoreera omobaso na obotuko? Na ere takoba omoremereria ase bare?
Ⅷ Nabatebirie nabanyorere oboronge ase obwango. Korende Omwana‐o‐Mwanyabaanto kagocha, Inee, nanyore okwegena ase ense?”
Omoreng’anio bw’Omofarisai na omorusia ebango
Ⅸ Akabateebia omoreng’anio oyo ase abanto baare gwekaga ng’a nabanyene oboronge, bagochaaya abande bonsi:
Ⅹ “Abanto babere bagatiira gochia Hekalu gosaba; oyomo n’Omofarisai na oyonde omorusia ebango.
Ⅺ Oria Omofarisai agatenena, agasaba iga ase omoyo oye: Nyasae, nakoiraneirie ng’a mbuya mono, ekiagera inche tindi buna abanto bande, abauri, abatari boronge, abatomani, gose buna oyo omorusia ebango.
Ⅻ Igo nkweng’ata ara kabere ase echuma; ’ndua ensemo ya ikomi y’okonyora kwane gwonsi.
ⅩⅢ Na oria omorusia ebango agatenena are, tarigia nonya nkoimokia amaiso aye igoro, korende ageaka‐aka egekuba kiaye, okobora: Nyasae, indorera amaabera inche omonyene ebibe!
ⅩⅣ Nabatebirie inwe: Omonto oria nigo aigete bwoye konya obareirwe oboronge kobua oria onde, ekiagera oyokweimokereria igoro nairanigwe inse, na ere oyokweirania inse naimokererigwe igoro.”
Yeso ogosesenia abana abake
(Mat 19:13-15; Mar 10:13-16)
ⅩⅤ Bakamorentera abana ebing’werere, erinde abakune; korende aborokigwa baye bagachia kobarora, bakabatanga.
ⅩⅥ Korende Yeso akabarangeria bache asare, ogoteeba, “Batige abana bache ase ’nde, timobaisa kobatanga, ekiagera abare buna aba, oborwotinbwa Nyasae nobwabo.
ⅩⅦ Ekeene nabateebirie: Onde bwensi otancheti oborwoti bwa Nyasae buna omwana omoke, takobosoa nonya ng’ake.”
Obogima bwa kare na kare, na obobe bw’obotenenku
(Mat 19:16-30; Mar 10:17-31)
ⅩⅧ Na omogambi gete akamobooria, “Omworokia omuya, ninki ndakore inyare koba nomwando bw’obogima bwa kare na kare?”
ⅩⅨ Yeso akamoiraneria, “Naki okondoka omuya? Onde tari omuya otatiga Nyasae bweka.
ⅩⅩ Kwamanyire amachiiko; Totomana, Toita, Toiba, Toteba oborimo, sika iso na nyoko.”
ⅩⅪ Akabora, “Ayio onsi ninyabwatete korwa obwana bwane.”
ⅩⅫ Ekero Yeso achia koigwa aya, akamoteebia, “Egento ekemo ngekoremete; oonie ebio ore nabio bionsi ogabere abataka, na aye nobe nenibo igoro. Erio ochiche ontunyane.”
ⅩⅩⅢ Korende ekero achia koigwa aya akaba nomoichano, ekiagera arenge omonda mono.
ⅩⅩⅣ Nabo Yeso akamorigereria, akabora, “Nabe aakong’u ase abare abanda gosoa ase oborwoti bwa Nyasae!
ⅩⅩⅤ Naki naororo engamia goeta ase ekebao gi’esiindani, kobua omonda gosoa ase oborwoti bwa Nyasae.”
ⅩⅩⅥ Na abwo abayaigwete bakaboora, “Ning’o rende oranyare gotooreka?”
ⅩⅩⅦ Akabora, “Aya takonyarekana ase Mwanyabaanto, nigo akonyarekana ase Nyasae.”
ⅩⅩⅧ Petero akabora, “Rora, intwe twatigire chinka chiaito, twagotunyanire aye.”
ⅩⅩⅨ Akabateebia, “Ekeene nabateebirie: Monto onde tari otigire enyomba, gose mokaye, gose abamwabo, gose abaibori, gose abana, ase engencho y’oborwoti bwa Nyasae,
ⅩⅩⅩ otanyore kobua ara aange bono, naende ase ense egochi‐gocha obogima bwa kare na kare.”
Obobani bwa gatato bwa Yeso igoro y’ogokwa kwaye
(Mat 20:17-19; Mar 10:32-34)
ⅩⅩⅪ Erio Yeso akaira baria ikomi na babere, akabateebia, “Rora, ngotiira tore kogenda Yerusalemu, naende amang’ana onsi ayariikeretwe Omwana‐o‐Mwanyabaanto nababani naikeranigwe.
ⅩⅩⅫ Naki nabekwe ase amaboko y’abanto b’Ebisaku, nakorerwe echeche, na gokorerwa bobe, na gotwerwa amate;
ⅩⅩⅩⅢ naende inabamoake emecharichi na komoita, na ase rituko ria gatato naboke.”
ⅩⅩⅩⅣ Korende tibamanya nonya nering’ana erimo ase aya. Ring’ana eri rikabiseka ase bare, na tibamanya ayateebetwe.
Yeso okogwenia omonto omouko
(Mat 20:29-34; Mar 10:46-52)
ⅩⅩⅩⅤ Ekero achia goika ang’e na Yeriko omonto oyomo omouko naikaransete enchera ensemo ogosaba ebiegwa.
ⅩⅩⅩⅥ Agachia koigwa omoganda ogoeta, akaboria, “Inki ekio?”
ⅩⅩⅩⅦ Bakamoiraneria, “Yeso o Nazareti ogoeta.”
ⅩⅩⅩⅧ Agaaka eriogi, akabora, “Yeso, omwana o Daudi, indorera amaabera!”
ⅩⅩⅩⅨ Nabwo batang’aine bakamokania, bakamoteebia akire, korende ere akamenta mono goaka eriogi, “Omwana o Daudi, indorera amaabera!”
ⅩⅬ Yeso agatenena, agachiika arentwe asare. Agachia komoika ang’e, akamobooria,
ⅩⅬⅠ “Ninki origetie ngokorere?”
Akamoiraneria, “Omonene, inyare korora.”
ⅩⅬⅡ Yeso akamoteebia, “Oegwe okorora; okwegena kwao gwakogwenirie.”
ⅩⅬⅢ Erio kegima akaba nkorora are, akamotunyana, okomotogia Nyasae; na abanto bonsi bagachia korora aya, bakamotogia Nyasae.