ⅩⅨ
Zakayo
Ⅰ Yeso agasoa Yeriko, akaba ngoeta are egati‐gati yaye.
Ⅱ Narenge aroro omonto oyomo ore korokwa Zakayo, omonene bw’abarusia ebango; ere nomonda orenge.
Ⅲ Akarigia korora Yeso, gose ’monto ki; ko tanyara ase engencho y’omoganda, ekiagera arenge omweng’e.
Ⅳ Agatang’ana bwango, akariina igoro ase omoko anyare komorora, ekiagera ngoetera arenge ase enchera eria.
Ⅴ Ekero Yeso achia goika aase aria, akarigereria igoro, akamoteebia, “Zakayo, ika bwango, ekiagera reero ningwenerete goikaransa nyomba mwao.”
Ⅵ Agaika bwango, akamoroisia nomogooko.
Ⅶ Ekero abanto bachia korora aya, bakemurungania bonsi, bakobora, “Osoire koba omogeni bw’omonyene ebibe.”
Ⅷ Zakayo agatenena, agateebia Omonene, “Rora, Omonene, ekeng’ese ki’enibo yane ning’ee abataka; naende onye naureretie omonto egento nimoiranerie ara kane.”
Ⅸ Yeso akamoteebia, “Reero ogotooreka gwaikire enyomba eye, ekiagera oyo boigo nomwana o Aburaamu.
Ⅹ Naki Omwana‐o‐Mwanyabaanto nigo achete korigia egiasirete na kogetooria.”
Omoreng’anio bwe chiropia
Ⅺ Abanto baria bagachia koigwa aya, Yeso akamenta kobateebia omoreng’anio, ekiagera konya oikire ang’e na Yerusalemu, na barabwo bagakaga ng’a oborwoti bwa Nyasae nigo borarorekane ekero ekio kegima.
Ⅻ Nabo akabora, “Omonto oyomo omosike akagenda ense y’aare, erinde anyare kwenyorera oborwoti, naende airane.
ⅩⅢ Akarangeria abanto ikomi korwa ase abasomba baye, akabaa ebirengo ikomi bie chiropia, akabateebia: Biire mobionchorerie goika ekero nkoirana.
ⅩⅣ Abanto b’ense yaye bakamogecha, bagatoma abatomwa komotunyana na komoteebia, Titorigeti omonto oyo atogambere.
ⅩⅤ “Ekero achia koirana, kanyorire oborwoti, agachiika abasomba baria aete chiropia barangerigwe, erinde anyare komanya ebitoki banyorire ase okoonchoreria kwabo.
ⅩⅥ Oyo bw’eritang’ani agacha, okobora: Omonene, ekerengo kiao kiarentire ebirengo ikomi binde.
ⅩⅦ Akamoteebia: Gwakorire buya, aye omosomba omuya! Ekiagera kwabeire omwegenwa ase egento kere egeke, nabo nobe nokobua igoro ase emechie ikomi.
ⅩⅧ Na oyo o kabere agacha, akabora: Omonene, ekerengo kiao kiarentire ebirengo bitano.
ⅩⅨ Akamoteebia nere boigo: Aye nobe igoro ase emechie etano.
ⅩⅩ Naende oyonde agacha, akabora: Omonene, eke nakio ekerengo kiao nagachete ase egetambaa;
ⅩⅪ nigo nakoirogete, ekiagera aye nigo ore omonto omokong’u. Nigo okobogoria eki otagachete, na kogesa eki otasimegete.
ⅩⅫ Akamoteebia: Ase enkwana y’omonwa oo ninkogambie, aye omosomba omobe. Nkwamanyete ng’a inche nomonto omokong’u, nkobogoria eki ntagachete, na kogesa eki ntasimegete.
ⅩⅩⅢ Naki rende otabeegete chitaabu chiane ase aba bakorua ebitoki, ninche ngocha anga nachinyora amo nebitoki?
ⅩⅩⅣ Agateebia abarengeo: Moure ekerengo kiaye, moe oria oyore nebirengo ikomi.
ⅩⅩⅤ (Bakamoteebia: Omonene, oyo nare nebirengo ikomi).
ⅩⅩⅥ Nabatebirie: Kera oyore negento naegwe, korende ere oyotari negento, nonya nkeria abwate naurwe.
ⅩⅩⅦ Korende baria ababisa baane batarigeti mbagambere, barente aiga, mobaite ase obosio bwane.”
Yeso ogochengerwa kagosoa Yerusalemu
(Mat 21:1-11; Mar 11:1-11; Yoh 12:12-19)
ⅩⅩⅧ Gakoorire gokwana amang’ana aya, agatang’ana gotiira kogenda Yerusalemu.
ⅩⅩⅨ Agachia goika Betifage na Bethania, ase egetunwa ki’Emezeituni, agatoma babere baborokigwa baye,
ⅩⅩⅩ akabateebia, Genda goika agachie karia mokoorokera; kamwasoire ime, inamorore emori y’etigere esibire, etana koriinwa na monto; moyesibore moyendetere.
ⅩⅩⅪ Naende omonto karababorie: Naki, mokoyesibora? Momoteebie iga, “Omonene nayeganetie.”
ⅩⅩⅫ Nabo baria batometwe bakagenda, bakayenyora buna abateebeetie.
ⅩⅩⅩⅢ Ekero baare gosibora emori eria y’etigere, abanyene bakababoria, “Nase ki mogosibora emori?”
ⅩⅩⅩⅣ Bakaboora, “Omonene nayeganetie.”
ⅩⅩⅩⅤ Bakayerenta ase Yeso; bakaara chianga chiabo igoro ase emori eria, bakariinia Yeso igoro aseero.
ⅩⅩⅩⅥ Ere gakogenda, bakaara chianga chiabo inchera.
ⅩⅩⅩⅦ Agachia goika egetirimboko ki’egetunwa ki’Emezeituni, omoganda bwonsi bw’aborokigwa baye bagachaaka kogooka na komobaka Nyasae ase eriogi rinene ase ebikone bie chinguru bionsi barorire,
ⅩⅩⅩⅧ bakobora, “Nasesenirie Omorwoti oyogocha ase erieta ri’Omonene! Omorembe igoro, na obonene bore igoro mono!”
ⅩⅩⅩⅨ Abande ase Abafarisai abarenge ase omosangererekano bakamoteebia, “Omworokia, togonyera aborokigwa bao!”
ⅩⅬ Akairaneria, “Nabatebirie: Aba nabaisa gokira, amagena aya naake eriogi.”
Yeso ogwechandera Yerusalemu
ⅩⅬⅠ Ere agachia goika ang’e akarora omochie, akayoiyereria amariga,
ⅩⅬⅡ okobora, “Onye nkwamanya reero ayare korenta omorembe! Korende bono abisekire ase amaiso ao!
ⅩⅬⅢ Naki amatuko nagochere, ababisa bao barakoagachere orwaki bagoetanane, bagotangerane ase chinsemo chionsi,
ⅩⅬⅣ na bakoiyerie inse, na abana bao ime ase ore. Tibagotiga ime ase ore riigena erimo igoro ase erinde, ekiagera otamanyeti engaki y’ogocherwa kwao.”
Yeso ogochena Hekalu
(Mat 21:12-17; Mar 11:15-19)
ⅩⅬⅤ Agasoa Hekalu ime, agachaaka gosokia baria barenge koonia aroro,
ⅩⅬⅥ akabateebia, “Neriikire: Enyomba yane nebe enyomba y’ogosaba, korende inwe mwayekorire koba ribwago ri’abauri.”
ⅩⅬⅦ Akaba okworokereria kera rituko ase Hekalu. Abakuani abanene, na aborokia b’amariiko, na abanene b’abaanto bakarigia komoita;
ⅩⅬⅧ na barabwo tibanyora eki bagokora, ekiagera abanto bonsi bamotegererete.