ⅩⅪ
Esadaka y’omoboraka
(Mar 12:41-44)
Ⅰ Yeso akaimokia amaiso aye, akarora abanto abanda bakobeeka ebiegwa biabo ase ekebekerero gi’esadaka.
Ⅱ Akarora omoboraka oyomo omotaka, okobeeka ebisabwa bibere bie chitaai.
Ⅲ Erio akabora, “Ekeene nabateebirie, Omoboraka oyo omotaka obekire ebinge kobua bonsi,
Ⅳ ekiagera aba bonsi babeekire korwa ase obonge bwe chinibo chiabo, korende oyo ase obotaka bwaye obeekire ebinto bionsi ebiarenge nabio.”
Yeso okobana ogotagorwa gwe Hekalu
(Mat 24:1-2; Mar 13:1-2)
Ⅴ Ekero abanto bande barenge gokwana amang’ana igoro ye Hekalu, buna echabeire namagena amaya na ebiegwa, agateeba.
Ⅵ “Aya morooche; amatuko nache ritatigare rigena erimo igoro ase erinde eritatagorwe.”
Amabe agochi‐gocha
(Mat 24:3-25; Mar 13:3-23)
Ⅶ Erio bakamobooria, “Omworokia, aya indi arabe rende? Naende ninki ekemanyererio kiaye ekero aya onsi araabe ang’e goikerana?”
Ⅷ Akabora, “Mwerende, timong’ainwa, ekiagera abange nabaache ase erieta riane babore: Ninche ere! Nengaki yaikire! Nabo, timobabwatia abwo.
Ⅸ Na inwe ekero moraigwe amang’ana y’esegi na eburu‐buru, timogoswa, ekiagera aya bori nache kooroka ritang’ani, korende omoerio toraba ang’e.”
Ⅹ Erio akabateebia, “Egesaku nakeimoke korwana negesaku kende, na oborwoti naborwane noborwoti bonde;
Ⅺ emetengecho emenene y’ense nebe chinsemo ne chinsemo, na enchara, na emechando emenene; nabe namang’ana y’ogoichania, na ebimanyererio ebinene bikorwa igoro.
Ⅻ Korende ritang’ani ase aya onsi nabababwaate na kobachanda, nabaabaire ase chisinagogi, na ase chichela, namoirwe ase abarwoti na ase abagabana ase engencho y’erieta riane.
ⅩⅢ Eke nekero kiaino koba kirori.
ⅩⅣ Manya gaki ase emioyo yaino, ng’a timorengereria ritang’ani eki morairanerie,
ⅩⅤ ekiagera inche nimbae chinkwana na obong’aini, abachandi baino batanyare gokana gose koamererania nabio.
ⅩⅥ Na inwe namoruegwe nabaibori baino, na bamura bamino, na eamate yaino, na abasani baino, na barabwo nababeeke abande baino ase ogoitwa.
ⅩⅦ Inamogechwe nabaanto bonsi ase engencho y’erieta riane.
ⅩⅧ Korende nonya nagatukia akamo k’emetwe yaino tikagosira.
ⅩⅨ Na ase okoremereria kwaino namonyoore obogima bwaino.
ⅩⅩ “Korende, komorarore Yerusalemu oetananirwe nemeganda y’abarwani b’esegi, erio momanye ng’a ogosareka kwaye gwaikire ang’e.
ⅩⅪ Erio abare Boyahudi tiga batame gochia ase ebitunwa, na abare ime ase omochie basoke isiko, na abare isiko tibasoa aroro,
ⅩⅫ ekiagera aya namatuko egesiomba, onsi ayarigetwe anyare goikerana.
ⅩⅩⅢ Nabe aakong’u ase abare barito na abakogonkia ase amatuko aria, ekiagera nebe emechando emenene igoro ase ense, na endamwamu ase egesaku eke.
ⅩⅩⅣ Barabwo nabagwe ase chinsonga chi’emioro, nabooswe bairwe ase ebisaku bionsi, na Yerusalemu notachwe nabaanto b’Ebisaku, goika ebiro biabo biikeranigwe.
Omoerio bw’ense
(Mat 24:29-31; Mar 13:24-27)
ⅩⅩⅤ “Naende nabibe ebimanyererio ase erioba, na omotienyi, ne ching’enang’eni, na ase ense emechando ase ebisaku, nabatang’ang’e ase okoeera kw’enyancha na emerindo yaye.
ⅩⅩⅥ Abanto mbakwe ekeondoko na okoiroka kobaganyete ayagoochera ense, ekiagera chinguru chia igoro nachitengechigwe.
ⅩⅩⅦ Erio nabanyare korora Omwana‐o‐Mwanyabaanto ogochaase riire ase chinguru na obonene obonge.
ⅩⅩⅧ Nabo karachake koba ayio, rigereria igoro, ekiagera okoboorigwa kwaino gwaikire ang’e.”
Amorokererio korwa ase Omoko
(Mat 24:32-35; Mar 13:28-31)
ⅩⅩⅨ Akabateebia omoreng’anio, “Rigereria omoko na emete ende yonsi;
ⅩⅩⅩ ekero egochaka goseboka mwarora na komanya ase emioyo yaino ng’a egura gura ng’ang’e ere.
ⅩⅩⅪ Nainwe boigo komorarore ayio agokoreka, momanye ng’a oborwoti bwa Nyasae ng’ang’e bore.
ⅩⅩⅫ Ekeene nabateebirie: Ekegori eke tikegoeta nonya ng’ake goika aya onsi aikeranire.
ⅩⅩⅩⅢ Igoro na ense nabiete, korende amang’ana aane takonyara goeta nonya ng’ake.
ⅩⅩⅩⅣ “Nabo mwerende chinkoro chiaino tichicha koengerwa nokoria bobe na ogotinda, na okwerosia kw’obogima obo, rituko riria ribachere mobosokano, buna omoeto okobwata.
ⅩⅩⅩⅤ Naki naboigo eranyaare goochera abanto bonsi abamenyete igoro ase ense yonsi.
ⅩⅩⅩⅥ Ase ayio, renda kera ekero na gosaba, monyoore chinguru chi’ogoeta ase aya onsi araache koba, naende gotenena ase obosio bw’Omwana‐o‐Mwanyabaanto.”
ⅩⅩⅩⅦ Na kera rituko nigo arenge kworokereria Hekalu ime, korende botuko ogenda isiko obeera ase egetunwa ki’Emezeituni.
ⅩⅩⅩⅧ Abanto bonsi bakamochiera mambia chuni aria Hekalu ime, erinde banyaare komoigwa.