ⅩⅫ
Okorua kw’obong’ainereria kwa Yudasi
(Mat 26:1-5,14-16; Mar 14:1-2,10-11)
Ⅰ Rituko Rinene ri’Emegati etabekiri memera, rikorokwa Epasaka, rigaika.
Ⅱ Abakuani abanene na aborokia b’amariiko bakarigia enchera y’okomoita, ekiagera nigo bairogete abanto.
Ⅲ Saitani agasoa Yudasi okorokwa Iskariota. Yudasi nigo arenge oyomo bwa baria ikomi na babere.
Ⅳ Akagenda agakwana nabakuani abanene na abatang’ani b’abarendi buna aranyare komobeeka ase amaboko abo.
Ⅴ Bakagoka bakabwatana nere komoa chiropia.
Ⅵ Agancha, akarigia ribaga akomoruera ase bare emeganda etaiyo.
Okwearigania kw’Endagera y’omoerio
(Mat 26:17-19; Mar 14:12-16)
Ⅶ Rituko ri’Emegati etabekiri memera rigaika, eri’emanwa y’eng’ondi y’Epasaka egwenerete konyenywa.
Ⅷ Erio Yeso agatoma Petero na Yohana, akabora, “Genda motoroiserie Epasaka, erinde toyerie.”
Ⅸ Bakamobooria, “Ng’ai origetie toyeroiserie?”
Ⅹ Akabateebia, “Rora, ekero mwasoire omochie, namoumerane nomosaacha obogoretie enyongo ere namaache; momotunyane goika enyomba agosoa,
Ⅺ moteebie omonyene enyomba: Omworokia nkoboria are: Ng’ai enyomba y’abageni ere, inyare koriera Epasaka amo naborokigwa baane?
Ⅻ Omonto oria naboorokie akanyomba akanene ka irongo karoisirie; agwo moariganie.”
ⅩⅢ Bakagenda, bakanyora buna abateebetie, bakaarigania Epasaka.
ⅩⅣ Erio ensa egachia goika ang’e, agaikaransa amo nabatomwa.
ⅩⅤ Akabateebia, “Ninganetie mono koria Epasaka eye amo nainwe ritang’ani ntarachaandwa,
ⅩⅥ ekiagera nabateebirie, tinkoyeria naende goika yaikeranigwe ase oborwoti bwa Nyasae.”
Endagera y’omoerio
(Mat 26:20-30; Mar 14:22-26; 1 Abakr 11:23-25)
ⅩⅦ Akabogoria egekombe, na ekero airaneirie ng’a mbuya mono, akabora, “Bogoria eke, mosaange inwe ase inwe;
ⅩⅧ naki nabateebirie, korwa bono tinkonywa okwama kw’omosabibu goika oborwoti bwa Nyasae boche.”
ⅩⅨ Akabogoria omogati, na ekero airaneirie ng’a mbuya mono, akayosamunyora, akabaa, akabora, “Oyo nomobere one orurwe ase engencho yaino. [Kora iga ase okong’inyora.”
ⅩⅩ Naboigo akabogoria egekombe magega ase okoria, akabora, “Egekombe eke nokobwatana okoyia ase amanyinga aane, aitekire ase engencho yaino.]
ⅩⅪ Korende rigereria, okoboko kwaye ere oyokondua nigo kore amo nainche ase emesa.
ⅩⅫ Ekiagera Omwana‐o‐Mwanyabaanto nkogenda are buna yachiigetwe; korende obobe nobwaye omonto oria okomorua!”
ⅩⅩⅢ Na barabwo bagachaaka koborania barabwo ase barabwo, gose ning’o ase bare orakore ring’ana eri.
Obonene bw’ekeene
ⅩⅩⅣ Gokaba okoamererania ase egati yabo, gose ning’o ase bare obarirwe koba omonene kobua abande.
ⅩⅩⅤ Yeso akabateebia, “Abarwoti b’abaanto b’ebisaku nigo bakogambera abanto; naende abare nokobua igoro ase bare barokwa Abakori Abaya.
ⅩⅩⅥ Korende ase more inwe taibo, otatiga oyore omonene oino nabe buna oyore omoke; na ere oyokobatang’ana nabe buna omokoreri abande.
ⅩⅩⅦ Inee! Ning’o ore omonene, noyoikaransete ase endagera, gose noyogokorera? Tari ere oyogoikaransa ase endagera? Korende inche nigo inde ase egati yaino buna omokoreri.
ⅩⅩⅧ “Inwe ninwe mwabeire mogendererete amo nainche ase ogoteemwa kwane,
ⅩⅩⅨ na inche nabaeire inwe oborwoti buna Tata ang’ete,
ⅩⅩⅩ monyaare koria na konywa ase emesa yane ase oborwoti bwane, na goikaransa ase ebirogo bi’obonene, na kogambia abanto b’ebisaku ikomi na bibere bi’Abaisraeli.”
Ogokana gwa Petero gokobanwa
(Mat 26:31-35; Mar 14:27-31; Yoh 13:36-38)
ⅩⅩⅪ Akabora, “Simioni, Simioni, rora Saitani nabarigetie abaire anyaare kobasoonga buna engano,
ⅩⅩⅫ korende nagosabeire, erinde okwegena kwao tikoera, na aye gokwaonchokire, obeeke abamiino chinguru.”
ⅩⅩⅩⅢ Akamoteebia, “Omonene nigo inde ang’e kogenda amo naye echela, nonya nase ogokwa.”
ⅩⅩⅩⅣ Akabora, “Nagotebirie Petero, reero etuoni etarabuga nonkane ara gatato ng’a tomanyeti.”
ⅩⅩⅩⅤ Akababoria, “Inee! Ekero nabatomete motari nebimoya, ne chisaaro, na ebikoroto, imwaremeretwe na gento?” Bakamoiraneria, “Yaya”.
ⅩⅩⅩⅥ Akabateebia, “Korende bono oyore nekemoya akebogorie, na esaro boigo, na ere oyotari nomoyio o birende aoonie eganchwa yaye, agore oyomo.
ⅩⅩⅩⅦ Naki nabateebirie, eriarigetwe ndigwenerete goikeranigwa ase ’nde. Ere nigo abareranetigwe amo nabasaria, ekiagera ayarigetwe igoro ase ’nde aikeranigwe.”
ⅩⅩⅩⅧ Bagateeba, “Omonene, rora ntore nemeyio ya birende ebere aa.” Akabateebia, “Nabo aisanire.”
Yeso ore Gethisemane
(Mat 26:36-46; Mar 14:32-42)
ⅩⅩⅩⅨ Agasooka, akagenda goika egetunwa ki’Emezeituni, buna engencho yaye yarenge, na aborokigwa baye bakamotunyana.
ⅩⅬ Agachia goika aase aria akabateebia, “Saba, erinde timosoa ase ogoteemwa.”
ⅩⅬⅠ Ageatanana korwa ase bare, ekerengo gi’okoruta rigena, akabeeka amaru inse, agasaba,
ⅩⅬⅡ ogoteeba, “Tata, koranche, onduserie egekombe eke, korende tari buna ndigetie inche, korende buna origetie aye, bikoreke.”
ⅩⅬⅢ Omomalaika akamoorokera korwa, igoro, akamobeka chinguru.
ⅩⅬⅣ Na ere ekiagera arenge nomoichano mono, akamenta ogosaba nomokia; ebigeri biaye bikaba buna amatoima y’amanyinga agoiteka inse.
ⅩⅬⅤ Agachia koimoka korwa ase ogosaba agachiera aborokigwa baye, akabanyora bararire ase ogoichana.
ⅩⅬⅥ Akabateebia, “Inaki mwararire? Boka, mosabe, erinde timosoa ase ogoteemwa.”
Okobwatwa kwa Yeso
(Mat 26:47-56; Mar 14:43-50; Yoh 18:2-11)
ⅩⅬⅦ Ekero arenge gokwana, rora, omoganda ogaacha, na oria okorokwa Yudasi, oyomo bwa baria ikomi na babere, obatang’aine. Ere akamoika Yeso ang’e komonyunyunta.
ⅩⅬⅧ Yeso akamoteebia, “Yudasi, nkomorua ore Omwana‐o‐Mwanyabaanto ase okomonyunyunta?”
ⅩⅬⅨ Na abwo barenge amo nere bagachia korora ayakorigia koba, bakaboora, “Omonene, inatorwane nomoyio o birende?”
Ⅼ Oyomo obo agaaka omosomba bw’Omokuani omonene, akamobutora ogoto gw’okorio.
ⅬⅠ Yeso akabora, “Tiga tokora igo.” Akamokuna ogoto, akamogwenia.
ⅬⅡ Yeso agateebia abakuani abanene, na abanene b’abarendi be Hekalu, na abagaaka, baria bamoocherete, “Iga mwachire nemeyio ya birende ne chinungu buna mogochiera omouri.
ⅬⅢ Ekero narenge amo nainwe ase Hekalu kera rituko timwaramborete amaboko mombwate, korende bono ensa eye neyaino, ekero omosunte okogamba.”
Petero okomokana Yeso
(Mat 26:57-58,69-75; Mar 14:53-54,66-72; Yoh 18:12-18,25-27)
ⅬⅣ Bakamobwata, bakamoira, bakagenda nere nyomba ime ase Omokuani omonene. Na Petero akamotunyana korwa magega ore egeka.
ⅬⅤ Bagachia gouta omorero egati y’egoora, bagaikaransa amo, na Petero agaikaransa ase egati yabo.
ⅬⅥ Erio omoiseke oyomo akamorora oikaransete ang’e nomorero, akamobeta amaiso akabora, “Oyo nere igo arenge amo nere.”
ⅬⅦ Agakana, akabora, “Omokungu, timomanyeti.”
ⅬⅧ Naende ake omonto onde akamorora, akabora, “Aye noyomo obo ore.”
Petero akabora, “Omonto oyo, tai inche.”
ⅬⅨ Na magega y’ensa eyemo, omonto onde akabetereria mono, akabora, “Ekeene, oyo nigo arenge amo nere, ekiagera nere n’Omogalili.”
ⅬⅩ Petero akabora, “Omonto oyo, timanyeti eri ogokwana.”
Erio kegima kagokwana, etuoni ekabuga.
ⅬⅪ Omonene akeonchora, akarigereria Petero. Petero akainyora ring’ana ri’Omonene, buna amoteebetie, “Reero, ritang’ani etuoni etarabuga nonkaane ara gatato.”
ⅬⅫ Agasoka isiko, akarera nobororo.
Yeso ogosekererigwa na goakwa
(Mat 26:67-68; Mar 14:65)
ⅬⅩⅢ Abanto baria babwatete Yeso, bakamosekereria, na komoaka.
ⅬⅩⅣ Bakamotuba amaiso, bakamobooria, “Bana! Ning’o ogoaka?”
ⅬⅩⅤ Bakamokwana bobe amang’ana ande amange ay’okomorama.
Yeso ase obosio bw’abakuani abanene
(Mat 26:59-66; Mar 14:55-64; Yoh 18:19-24)
ⅬⅩⅥ Ekero bwachia gokia, abagaaka b’abaanto, na abakuani abanene, na aborokia b’amariiko bagasangererekana amo, bakamorenta ase ekegambero kiabo, bakoboora,
ⅬⅩⅦ “Onye aye naye Kristo, toteebie.”
Korende akabateebia, “Ninsa kobateebia, timokonyaara gwancha;
ⅬⅩⅧ naende nimbaboria, timokong’iraneria.
ⅬⅩⅨ Korende korwa bono Omwana‐o‐Mwanyabaanto naikaranse ensemo y’okoboko gw’okorio kw’obonene bwa Nyasae.”
ⅬⅩⅩ Bakaboora bonsi, “Aye naye Omwana o Nyasae.”
Akabateebia, “Inwe mwateebire ng’a ninche ere.”
ⅬⅩⅪ Bakaboora, “Mborori ki torigetie goetania obo? Naki intwe abanyene twaigure amang’ana korwa ase omonwa oye.”