ⅩⅩⅢ
Yeso ase obosio bwa Pilato gabana o Rumi
(Mat 27:1-2,11-14; Mar 15:1-5; Yoh 18:28-38)
Ⅰ Bakaimoka bonsi, bakaira Yeso ase Pilato.
Ⅱ Bagachaaka komosoera, bakobora, “Twanyorire omonto oyo oonchoire ense yaito, otokanirie titoa Kaisari ebango, okobora ng’a ere omonyene nere Kristo omorwoti.”
Ⅲ Pilato akamobooria, “Naye Omorwoti bw’Abayahudi?”
Yeso akaimoiraneria, “Naye gwateebire.”
Ⅳ Pilato agateebia abakuani abanene na emeganda, “Inche tindochi komocha konde ase omonto oyo.”
Ⅴ Barabwo bakamobetereria, bakaboora, “Oburukanirie abanto, goetera ase amorokererio aye ase Boyahudi yonsi, korwa Galili ase achaakerete na goika bono oikire aiga.”
Yeso ase obosio bwa Herode
Ⅵ Pilato agachia koigwa ring’ana eri, akaboria, “Omonto oyo n’Omogalili?”
Ⅶ Agachia komanya ng’a nigo are inse ase obogambi bwa Herode, akamotoma gochia ase Herode. Na Herode omonyene nigo arenge Yerusalemu ase amatuko aria.
Ⅷ Ekero Herode achia korora Yeso akagokigwa mono, ekiagera korwa kare nigo arigetie komoorora, ekiagera aigwete chinkuma chiaye, naende nigo asemeretie korora egekone kegokorwa nere.
Ⅸ Akamoboria amaborio ase engaki entambe, korende Yeso tamoiraneria ing’ana rinde rionsi.
Ⅹ Abakuani abanene na aborokia b’amariiko bagatenena, bakomosoera ne chinguru.
Ⅺ Herode na abarwani baye bakamochaya, bakamosekereria, bakamobekera chianga chingiya mono, akamoirania ase Pilato.
Ⅻ Erio Herode na Pilato abwo barenge ababisa agwo ritang’ani bakabwatana korwa rituko riria bakaba abasani.
Pilato, na Baraba, na Yeso
(Mat 27:15-26; Mar 15:6-15; Yoh 18:39—19:16)
ⅩⅢ Pilato akarangeria amo abakuani abanene, na abagaambi, na abanto,
ⅩⅣ akabateebia, “Mwandeterete omonto oyo, buna oyo baonchoire abanto; naunirie amang’ana aye ase amasio aino, na tindochi bobe ase omonto oyo ase aria mwamosoerete,
ⅩⅤ nonya n’Herode tarochi, ekiagera omoiranirie gocha ase tore. Rora, ere takorete gento kemogwenerete akwe.
ⅩⅥ Erio konamoakire, nimosibore.”
ⅩⅦ Bono igo yamogwenerete kobasiborera omonto oyomo ekero kie rituko rinene.
ⅩⅧ Bagaaka eriogi bonsi amo, bakaboora, “Morusie oyo, tosiborere Baraba!”
ⅩⅨ (Ere nomonto obegetwe ase echela ase engencho y’eriomana riakoregete ase omochie ime, na ase oboiti.)
ⅩⅩ Nabo eria kabere Pilato agakwana nabarabwo, akarigia gosibora Yeso.
ⅩⅪ Korende barabwo bagaaka eriogi, bakaboora, “Mobambe, mobambe!”
ⅩⅫ Ere akabateebia eria gatato, “Nase ki? Mbobe ki akorete oyo? Tindochi nonya ne ring’ana erimo asare rigwenerete akwe. Ase igo, nanchire komoaka na komosibora.”
ⅩⅩⅢ Korende bakagenderera kobora ase eriogi rinene ng’a goika abambwe. Eriogi riabo rikabua.
ⅩⅩⅣ Pilato akanacha amang’ana akoreke buna barigetie.
ⅩⅩⅤ Agasibora ere oyobegetwe echela ase eriomana na oboiti, oyobarigetie; akarua Yeso ase bare buna ogwancha kwabo kwarenge.
Okobambwa kwa Yeso
(Mat 27:32-44; Mar 15:21-32; Yoh 19:17-27)
ⅩⅩⅥ Bagachia komoira, bakabwata Simioni Omokurene, oyorenge korwa borabu, bakamotweka omosalaba, ayobogorie magega ya Yeso.
ⅩⅩⅦ Omoganda bw’abaanto okamotunyana, na abakungu baare kweaka‐aka, na komweng’erereria.
ⅩⅩⅧ Yeso akabeonchorera, akabora, “Abaiseke ba Yerusalemu, timondeera inche, korende ereere inwe abanyene, na abana baino.
ⅩⅩⅨ Naki amatuko naache ekero abanto barateebe: Mbasesenirie abare abagomba, ne chinda chitaiboreti, ne chimbeere chitana kogonkwa!
ⅩⅩⅩ Erio nabachaake goteebia ebitunwa: Togwere, na ebigoro: Totube.
ⅩⅩⅪ Onye bagokora aya ekero omote ore omobese, naki eraabe ekero bwomire?”
ⅩⅩⅫ Abande babere abasaria bakairwa, baitwe amo nere.
ⅩⅩⅩⅢ Bagachia goika aase akorokwa Ekeore, bakamobamba aroro, na baria abasaria, oyomo ensemo y’okoboko gw’okorio, na oyonde ensemo y’okoboko gw’okobee.
ⅩⅩⅩⅣ Yeso akabora, “Tata, baabere, ekiagera tibamanyeti eke bagokora.”
Bakagabana chianga chiaye, bagachiakera obomera.
ⅩⅩⅩⅤ Abanto bagatenena, bakarigereria. Na barabwo abanyene bakamokorera echeche, bakaboora, “Natooretie abande, tiga etoorie ere omonyene, onye oyo nere Kristo o Nyasae, Omochore oye.”
ⅩⅩⅩⅥ Abarwani boigo bakamosekereria, bakamochiera, bakamoa chinkama,
ⅩⅩⅩⅦ bakaboora, “Onye aye naye Omorwoti bw’Abayahudi, etoorie.”
ⅩⅩⅩⅧ Igoro asare nkiarengeo ekemanyererio keriikire ase omonwa bw’Ekegiriki, na Ekerumi, na Ekeiberania “OYO NERE OMORWOTI BW’ABAYAHUDI.”
ⅩⅩⅩⅨ Oyomo bwa baria abasaria baabambetwe akamorama, akabora, “Inee! Tari aye Kristo? Etoorie aye omonyene, naintwe ototoorie.”
ⅩⅬ Oyo o kabere akamokania, akabora, “Aye tori komoiroka nonya Nyasae, aye kore ase ekiina keria keria?
ⅩⅬⅠ Intwe ekeene mboronge; ekiagera twaeirwe eng’eria ya boronge y’ogokora gwaito, korende oyo takoreti gento kende kebe.”
ⅩⅬⅡ Erio agateebia Yeso, “Yeso, ong’inyore ekero ogocha ase oborwoti bwao!”
ⅩⅬⅢ Yeso akamoteebia, “Ekeene nagotebirie: Reero nobe amo nainche Paradiso.”
Ogokwa kwa Yeso
(Mat 27:45-56; Mar 15:33-41; Yoh 19:28-30)
ⅩⅬⅣ Bono nigo chiarenge ang’e chinsa isano nemo, omosunte okaba igoro ase ense yonsi goika chinsa kianda,
ⅩⅬⅤ ekero omobaso orimire. Na egetambaa gi’okonacha Hekalu kegatandoka gati‐gati.
ⅩⅬⅥ Yeso akarera ase eriogi rinene, akabora, “Tata, ase amaboko ao nabekire omoika one!”
Magega gakwanire aya agatweka mo.
ⅩⅬⅦ Omotang’ani bw’abarwani rigana agachia korora aya, agatogia Nyasae, akabora, “Ekeene, omonto oyo nigo arenge omonyene oboronge.”
ⅩⅬⅧ Naende emeganda yonsi, abasangererekanete korora aya, kobachia korora ayakoreka, bakairana chinka chiabo, bakweaka ebikuba.
ⅩⅬⅨ Abasani baye bonsi na abakungu abamotunyanete korwa Galili, bagatenenera are, bakarora ayio.
Ogotindekwa kwa Yeso
(Mat 27:57-61; Mar 15:42-47; Yoh 19:38-42)
Ⅼ Rora, narengeo omonto oyomo, erieta riaye Yusufu, omonto bw’Arimathaya, omochie o Boyahudi, ere nomonto bw’ekegambero kiabo, omonto omuya, naende omooronge.
ⅬⅠ Ere tanchete amang’ana abo, nonya nogokora kwabo, nigo aganyete oborwoti bwa Nyasae.
ⅬⅡ Omonto oyo agachiera Pilato, akamosaba aegwe omobere o Yeso.
ⅬⅢ Akayoikia, akayoboyia egetambaa ki’egatani, akayobeeka ase oboina bwabaachetwe ase egetare, aase monto onde atana kobekwa.
ⅬⅣ Nigo riarenge rituko ri’Okwearigania, na Esabato egachaaka gosoa.
ⅬⅤ Abakungu abaachete amo nere korwa Galili, nigo batunyanete korwa magega, bakarigereria oboina na buna omobere oye bwareretigwe.
ⅬⅥ Bakairana, bakaroisia amanukato na amaguta ye rimisu rigiya.
Ne rituko ri’Esabato bagatimoka buna yachiigetwe.