Ⅴ
Yeso okorangeria aborokigwa baye b’eritang’ani
(Mat 4:18-22; Mar 1:16-20)
Ⅰ Ekaba abanto nkomomiga baare, erinde baigwe ring’ana ria Nyasae, agatenena ase engegu y’enyancha ya Genesareti,
Ⅱ Akarora amaato abere ateneine engegu y’enyancha, na abarubi basokire korwa aroro, ngosibia bare ebionga biabo.
Ⅲ Akariina obwato obomo obwarenge bwa Simioni akamobooria abotigerie are ake korwa ase engegu. Agaikaransa, akorokereria omoganda korwa ase obwato.
Ⅳ Goika agachia gokoora ogokwana kwaye, agateebia Simioni, “Sukia obwato goika endiba, moikie ebionga biaino ase okoruba.”
Ⅴ Simioni akamoiraneria, “Omonene, nabo twakorire emeremo obotuko obogima, titonyoreti gento, korende ase ring’ana riao natoikie ebionga.”
Ⅵ Kobakorire iga, bakanyora chinswe chinyinge mono, na ekero ebionga biabo biachaaka gotandoka,
Ⅶ bagasuma abagisangio babo, abarenge ase obwato bwa kabere, bache kobakonya. Bagacha, bagaichoria amaato onsi abere, goika agachaaka korimera.
Ⅷ Korende Simioni Petero, agachia korora aya, akagwa ase amaru a Yeso, akabora, “Omonene, karue ase ’nde, ekiagera inche nomonto omonyene ebibe!”
Ⅸ Naki igo akumetie, ere na bonsi abarenge amo nere, ase oborubi bwe chinswe barubete;
Ⅹ naboigo Yakobo na Yohana, abana ba Zebedi, abarenge ababwatani ba Simioni. Yeso agateebia Simioni, “Toiroka; korwa bono nobe omorubi bw’abaanto.”
Ⅺ Naende kobarentire amaato abo gochia engegu, bagatiga bionsi, bakamotunyana.
Yeso Okogwenia omonto orenge noborwaire bwa ukoma
(Mat 8:1-4; Mar 1:40-45)
Ⅻ Ekero arenge ase omochie oyomo, rora, narengeo omonto omosacha oichire noborwaire bwa ukoma. Ere agachia korora Yeso, akagwa maumama, akamosorora, okomoteebia, “Omonene, onye ngwancha, nonyare gonsibia.”
ⅩⅢ Yeso akarambora okoboko kwaye, akamokuna, akamoteebia, “Nanchire; sibeka.”
Erio agwo oborwaire bwaye bwa ukoma bokamorua.
ⅩⅣ Akamoteebia, “Toteebia monto onde ing’ana, korende genda, bweorokie ase Omokuani, orue ekeng’wanso ase ogosibeka kwao buna Musa achiigete, kebe kirori ase abanto.”
ⅩⅤ Korende chinkuma chiaye chikamenteka gokuma. Emeganda emenge egasangererekana gocha komoigwa, na kogwenigwa amarwaire abo.
ⅩⅥ Korende ere akerusanania, akagenda aase atari nabaanto, agasaba.
Yeso okogwenia omonto orenge rigata
(Mat 9:1-8; Mar 2:1-12)
ⅩⅦ Rituko erimo ri’amatuko aria ekero arenge kworokereria, Abafarisai na aborokia b’amachiiko barenge aroro baikaransete. Abwo baruete ase kera omochie o Galili na Boyahudi, na korwa Yerusalemu. Na okobua kw’Omonene nigo kwarenge amo nere anyare kogwenia.
ⅩⅧ Na rigereria, abanto mbabogoretie noborere omonto orenge rigata, bakarigia komoira nyomba ime na komobeka ase obosio bwaye.
ⅩⅨ Ekiagera batanyorete ribaga ri’okomoira ime ase engencho y’omoganda oria bw’abaanto, bakariina kerama igoro, bakamoikia korwa kerama noborere bwaye goika gati‐gati ase obosio bwa Yeso.
ⅩⅩ Agachia korora okwegena kwabo, akamoteebia, “Mosani, ebibe biao biabeirwe.”
ⅩⅪ Aborokia baria b’amariiko na Abafarisai bagachaaka korengereria, bakobora, “Ning’o oyo ogokwana okorama? Ning’o oranyare kwabera ebibe, otatiga oyomo, nere Nyasae?”
ⅩⅫ Yeso akamanya ebirengererio biabo, akairaneria, “Naki mokorengereria ase chinkoro chiaino?
ⅩⅩⅢ Ndiriri rire eriango, goteeba: Ebibe biao biabeirwe, gose goteeba: Imoka, ogende?
ⅩⅩⅣ Korende monyare komanya ng’a Omwana‐o‐Mwanyabaanto nare nokobua ase ense gw’okwabera ebibe.” Erio agwo agateebia oria rigata, “Nagoteebirie: Imoka, bwetweke oborere bwao, ogende bwoo.”
ⅩⅩⅤ Erio kegima agatenena ase obosio bwabo, akabogoria ekeraarero kiaye arenge koraarera, akagenda bwoye, ogotogia Nyasae.
ⅩⅩⅥ Ogokumia gokabwata bonsi, bagatogia Nyasae; bagaichorwa nokoiroka, bakaboora, “Twarorire amakumia reero.”
Yeso okorangeria Lawi
(Mat 9:9-13; Mar 2:13-17)
ⅩⅩⅦ Magega ase aya akaimoka, akarora omorusia ebango, erieta riaye Lawi, oikaransete aase bakoruseria ebango, akamoteebia, “Ntunyana!”
ⅩⅩⅧ Agatiga bionsi, akaimoka, akamotunyana.
ⅩⅩⅨ Nere Lawi akamokorera omoyega omonene nyomba mwaye, naende mbarengeo omoganda bw’abarusia ebango na abanto bande baikaransete amo nabarabwo ase endagera.
ⅩⅩⅩ Abafarisai na aborokia b’amariiko babo bakemurunganeria aborokigwa baye, bakaboora, “Nase ki mokoria na konywa amo nabarusia ebango na abanyene ebibe?”
ⅩⅩⅪ Yeso akabairaneria, “Abare buya tibari korigia omogwenia, otatiga abarwarete.
ⅩⅩⅫ Tincheti korangeria ababoronge korende abanyene ebibe baonchoke.”
Riborio igoro y’okweng’ata
(Mat 9:14-17; Mar 2:18-22)
ⅩⅩⅩⅢ Bakamoteebia, “Aborokigwa ba Yohana nigo bakweng’ata ebiro ebinge na gosaba, na aborokigwa b’Abafarisai nabo bagokora, korende abao nigo bakoria na konywa.”
ⅩⅩⅩⅣ Yeso akabateebia, “Inee! Inamonyare gotiga abachire ase enyangi beng’ate ekero omonywomi are amo nabarabwo?
ⅩⅩⅩⅤ Korende amatuko nache, barache kourwa omonywomi, erio nario barache kweng’ata ase amatuko aria.”
ⅩⅩⅩⅥ Akabateebia omoreng’anio: “Onde tari ogotandora ekeraka ki’eanga enyia na gokebeeka ase eanga engotu; aise gokora bo, natandore eria enyia, na ekeraka keria ki’eanga enyia tigekobwatana neanga eria engotu.
ⅩⅩⅩⅦ Gose onde tari okobeeka edivai enyia ase ebirandi ebigotu biroisirie korwa ase amasankwa, gose edivai eria enyia nayaate ebirandi biria; edivai enyene eiteke, na ebirandi bitandoke.
ⅩⅩⅩⅧ Korende edivai enyia negwenerete ebeekwe ase ebirandi ebiya.
ⅩⅩⅩⅨ Gose omonto tari onyure edivai yaroisetigwe kare, naende arigie edivai enyia, ekiagera nigo agoteeba: Eria ya kare nengiya kobua.”