Ⅳ
Ogoteemwa kwa Yeso
(Mat 4:1-11; Mar 1:14-15)
Ⅰ Na Yeso oichire n’Omoika Omochenu, akairana korwa Yorodani, agatang’anwa n’Omoika kogenda ase erooro,
Ⅱ agateemwa na Saitani ase engaki y’amatuko emerongo ene. Na amatuko aria tariete gento. Goika agachia koera, akaigwa enchara.
Ⅲ Saitani akamoteebia, “Onye kore Omwana o Nyasae, teebia rigena eri ribe omogati.”
Ⅳ Yeso akamoiraneria, “Neriikire. Omonto takoba moyo ase omogati bwoka.”
Ⅴ Saitani akamoira aase aimokererete igoro, akamworokia amarwoti onsi ay’ense ase egeka ekemo,
Ⅵ akamoteebia, “Ninkoe okobua oko gwonsi, na obonene bwaye, ekiagera nabieirwe, na inche iga nkoa oyo ngwancha.
Ⅶ Nabo koransasiime, bionsi nabibe ebiao.”
Ⅷ Yeso akamoiraneria, “Neriikire: Mosasiime Omonene Nyasae oo, omokorere ere bweka.”
Ⅸ Saitani akamoira goika Yerusalemu, akamotenenia igoro ase egechuria gie Hekalu egetambe mono, akamoteebia, Onye kore Omwana o Nyasae, etugute gochia inse korwa aa,
Ⅹ ekiagera neriikire:
Ere nagochikere abamalaika baye bakorende,
Ⅺ naende:
Nabakoimokie ase amaboko abo,
erinde tobaisa kogochwa okogoro kwao ne rigena.
Ⅻ Yeso akamoiraneria, “Neteebire, Toteema Omonene Nyasae oo.”
ⅩⅢ Saitani agachia gokoora ogoteema kwaye gwonsi, akaimoka korwa asare, akamotiga ase egeka.
Yeso ogochaka emeremo Galili
(Mat 4:12-17; Mar 1:14-15)
ⅩⅣ Yeso akairana gochia Galili ne chinguru chi’Omoika, chinkuma chigasarera ase chinsemo chionsi chi’ense eria.
ⅩⅤ Ere akorokereria ase chisinagogi chiabo, ogotogigwa nabaanto bonsi.
Yeso okwangwa Nazareti
(Mat 13:53-58; Mar 6:1-6)
ⅩⅥ Akagenda Nazareti, aria ase arereretwe; na ase rituko ri’Esabato agasoa ase esinagogi yabo, buna engencho yaye yarenge, agatenena gosoma.
ⅩⅦ Akaegwa egetabu y’omobani Isaya. Nabo akaigora egetabu eyio, akanyora aase ariikire,
ⅩⅧ Omoika bw’Omonene nigo ore igoro yane,
ekiagera ong’akire amaguta koranderia abataka amang’ana amaya.
Ontomire koranderia abasibwa ogosiborwa,
na koa abare emeuko banyare korora naende,
na gosibora abasionoirwe.
ⅩⅨ Na korandia omwakabwo Omonene bwancheretwe.
ⅩⅩ Akamumekeria egetabu eria akayea omokori emeremo bw’esinagogi, agaikaransa. Abanto bonsi abarenge ase esinagogi bakamobeta amaiso.
ⅩⅪ Agachaaka kobateebia, “Reero ririiko eri riaikeranigwe ase more buna mwarigwa rigosomwa.”
ⅩⅫ Bonsi bakamokwana buya bagakumia amang’ana obuya aruete ase omonwa oye, bagateebania, “Oyo tari ere omwana o Yusufu?”
ⅩⅩⅢ Akabateebia, “Ekeene, namonteebie omoreng’anio oyo: Omogwenia, egwenie aye omonyene; amang’ana onsi twaigure akorekire Kapernaumu, yakore aiga ase ense yao.”
ⅩⅩⅣ Akabateebia, “Ekeene nabateebirie: Omobani tari oranyare gwanchwa ase ense yaye omonyene.
ⅩⅩⅤ Korende ekeene nabateebirie ng’a mbarenge ababoraka abange ase Israeli ase amatuko ’Elija, ekero igoro yasiegetwe emiaka etato na emetienyi etano nomo, ekero enchara enene yasoete ase ense yonsi;
ⅩⅩⅥ na Elija tatometwe ase oyomo obo, otatiga ase omokungu oyorenge omoboraka agwo Sarefata, ase ense ya Sidoni.
ⅩⅩⅦ Naende mbarenge ase Abaisraeli abanto abange abaare noborwaire bwa ukoma ase ekero ki’omobani Elisha; onde tari osibegete otatiga Naamani, omonto o Siiria.”
ⅩⅩⅧ Bagachia koigwa aya, bonsi ase esinagogi bagaichorwa nendamwamu.
ⅩⅩⅨ Bakaimoka bakamosokia isiko y’omochie, bakamoira goika igoro y’egetunwa keria omochie obo oagachire erio, banyare komoturunkania.
ⅩⅩⅩ Korende ere agaeta egati‐gati yabo, akagenda.
Okogwenigwa kw’omonto obwatire nekerecha ki’eubi
(Mar 1:21-28)
ⅩⅩⅪ Agatirimboka goika Kapernaumu, omochie o Galili. Akaba nkoborokereria are rituko ri’Esabato.
ⅩⅩⅫ Bagakumia mono ase okworokereria kwaye, ekiagera ring’ana riaye riarenge nokobua.
ⅩⅩⅩⅢ Naende ase esinagogi narengeo omonto obwatire n’Omoika bw’ekerecha ki’eubi. Ere agaaka eriogi ase chinguru, akabora,
ⅩⅩⅩⅣ “Ah! Totige intwe Inki tore naye, Yeso o Nazareti? Ngwachire gotosiria? Nakomanyire aye, Omochenu o Nyasae.”
ⅩⅩⅩⅤ Yeso akagetogonyera, akabora, “Kira, omorwe!” Ekerecha keria gekamoiyeria agwo gati‐gati, gekamorwa, tikiamokorera gento.
ⅩⅩⅩⅥ Bagakumia bonsi, bagateebania barabwo ase barabwo, “Ing’ana ki eri? Naki ase chinguru na okobua kiagochika ebirecha bi’eubi, na birobio biasoka.”
ⅩⅩⅩⅦ Chinkuma chiaye chigasarera ase chinsemo chionsi chi’ense eria.
Yeso okogwenia aaria mwa Simioni
(Mat 8:14-17; Mar 1:29-39)
ⅩⅩⅩⅧ Akaimoka korwa ase esinagogi, agasoa ase enyomba ya Simioni. Nabo ng’ina biara Simioni konya orwarire esosera; bakamosaba ase engencho yaye.
ⅩⅩⅩⅨ Agatenena ang’e nere, agatogonyera esosera eria; ekamotiga. Bwango ere akaimoka akabakorera.
ⅩⅬ Goika erioba rigachia kogwa bakarenta asare abanto bonsi abarenge nabarwaire bare namarwaire ao ao, na ere akabeeka amaboko aye igoro ase kera oyomo, akabagwenia.
ⅩⅬⅠ Ebirecha bigasoka korwa ase abange, bigaaka eriogi, bikabora, “Aye naye Omwana o Nyasae.” Akabitogonyera, tabitiga bikwane, ekiagera biamanyete ng’a nere Kristo.
Yeso okorandia ase esinagogi
ⅩⅬⅡ Goika ekaba mobaso, agasoka, akagenda aase atari nabaanto. Na abanto bakamoriga‐rigia, bakamoikera, bakarigia komotanga taimoka korwa ase bare.
ⅩⅬⅢ Akabateebia, “Nengwenerete korandia amang’ana amaya ay’oborwoti bwa Nyasae ase emechie ende boigo, ekiagera natometwe ase engencho eyio.”
ⅩⅬⅣ Akaba nkorandia are ase chisinagogi chia Boyahudi.