Ⅲ
Yohana Omobatisi na amang’ana aye
(Mat 3:1-12; Mar 1:1-8)
Ⅰ Ase omwaka o ikomi na gatano bw’okogamba gwa Kaisari Tiberio, Pontio Pilato orenge gabana o Boyahudi, na Herode omorwoti o Galili, na Filipo momura omwabo arenge omorwoti o Iturea na ense ya Tarakoniti, na Lusania omorwoti o Abileni,
Ⅱ ekero ki’obokuani obonene bw’Anasi na Kayafa, ring’ana ria Nyasae rigaikera Yohana, omwana o Zakaria, ase erooro.
Ⅲ Akagenda chinse chionsi chi’ensemo ya Yorodani, okorandia ebatiso y’okoonchoka ekorenta okwaberwa kw’ebibe.
Ⅳ Buna eriikire ase egetabu y’amang’ana ’omobani Isaya,
“Eriogi ri’oyogoaka egeturi ase erooro,
Roisia enchera y’Omonene,
rongeyia oboeto bwaye.
Ⅴ Kera rigooko nariichorigwe,
na kera ekegoro na egetunwa nabikeeigwe;
aare bogeka inarongeigwe,
na enchera ere ebitunwa‐tunwa nereng’anigwe;
Ⅵ na abanto bonsi nabarore ogotooreka gokorwa ase Nyasae.”
Ⅶ Nabo agateebia emeganda eyachete, erinde ebatiswe nere, “Inwe oroiboro rwe ching’iti, ning’o obakuureire ng’a motame korwa ase endamwamu egochi‐gocha?
Ⅷ Gaki, ama okwama kogwenerete okoonchoka, gose timochaaka kobora emioyo yaino ime: Ntore na sokoro yaito, nere Aburaamu. Naki nabateebirie ng’a Nyasae nare nokobua ase amagena aya gokorera Aburaamu abana.
Ⅸ Nonya mbono egesire kiabekirwe ase emeri y’emete; nabo kera omote otameti okwama okuya nonachwe, otugutwe ase omorero.”
Ⅹ Emeganda eria ekamoboria, “Ninki rende torakore?”
Ⅺ Akabairaneria, “Oyore ne chianga ibere ae ere oyotari nero; na oyore nendagera akore boigo.”
Ⅻ Abarusia ebango bagacha erinde babatiswe, bakamobooria, “Omworokia, inki rende naintwe torakore?”
ⅩⅢ Akabairaneria, “Timorusia kobua ebi mwachigetwe.”
ⅩⅣ Abasikari nabarabwo bakamobooria, “Naintwe inki torakore?” Akabairaneria, “Timourereria monto onde ase chinguru gose ase obosoeri bw’oborimo; naende moisaneke neng’eria yaino.”
ⅩⅤ Ekero abanto baganyete na konakorengereria, bonsi bakeboria ase chinkoro chiabo ime gose Yohana nere Kristo.
ⅩⅥ Yohana akairaneria abwo bonsi, “Inche nigo nkobabatisa ase amaache, korende oyore ne chinguru kombua ngocha are, ting’isaini gosibora chiusi chi’ebikoroto biaye; oyio nere orabaabatise ase Omoika Omochenu na ase omorero.
ⅩⅦ Oroteru rwaye nigo rore koboko kwaye, ere naabuse ekeooreri kiaye, nasangererie engano ase ekiage kiaye, korende omoiriro nayosambe ase omorero otakorimeka.”
ⅩⅧ Nabo ase ogokuurera okonge Yohana akaranderia abanto amang’ana amaya.
ⅩⅨ Korende Yohana agatogonyera Herode omorwoti, ase engencho y’okonyuoma Herodia, moka momura omwabo, na ase engencho y’amabe onsi Herode akorire,
ⅩⅩ Korende Herode agakora rinene kobua, ase okoruta ase Yohana echela.
Okobatiswa kwa Yeso
(Mat 3:13-17; Mar 1:9-11)
ⅩⅪ Egachia koba abanto bonsi kobaabatisirwe, na Yeso boigo kabatisirwe, na ekero agosaba, igoro akamaanoka.
ⅩⅫ Omoika Omochenu ogaika igoro asare ase omogwekano bwe riruma, eriogi rikarwa igoro, rigoteeba, “Aye naye Omwana one omwanchwa, ngokirie naye.”
Chisokoro ne chisokoororia chia Yeso
(Mat 1:1-17)
ⅩⅩⅢ Yeso nere ekero achagete kworokereria, emiaka yaye igo yarenge ang’e emerongo etato, agakagwa ng’a mosinto o Yusufu, o Eli,
ⅩⅩⅣ o Mathati, o Lawi, o Meliki, o Yana, o Yusufu,
ⅩⅩⅤ o Matathia, o Amos, o Nahum, o Esili, o Nagai,
ⅩⅩⅥ o Maathi, o Matathia, o Semei, o Yoseki, o Yoda,
ⅩⅩⅦ o Yohana, o Resa, o Serubabeli, o Salatieli, o Neri,
ⅩⅩⅧ o Meliki, o Adi, o Kosamu, o Elimadamu, o Eri,
ⅩⅩⅨ o Yoshua, o Eliezeri, o Yorimu, o Mathati, o Lawi,
ⅩⅩⅩ o Simioni, o Yuda, o Yusufu, o Yonam, o Eliakimu,
ⅩⅩⅪ o Melea, o Mainani, o Mattatha, o Nathani, o Daudi,
ⅩⅩⅫ o Yese, o Obedi, o Boazi, o Salimoni, o Nashoni,
ⅩⅩⅩⅢ o Aminadabu, o Admin, o Aramu, o Hezironi, o Peresu, o Yuda,
ⅩⅩⅩⅣ o Yakobo, o Isaka, o Aburaamu, o Tera, o Nahori,
ⅩⅩⅩⅤ o Serugi, o Reu, o Pelegi, o Eberi, o Sala,
ⅩⅩⅩⅥ o Kainani, o Arifakisadi, o Shemu, o Nuhu, o Lameki,
ⅩⅩⅩⅦ o Metusela, o Enoku, o Yaredi, o Malaleeli, o Kainani,
ⅩⅩⅩⅧ o Enosu, o Seti, o Adamu, o Nyasae.