Ⅱ
Okoiborwa kwa Yeso
(Mat 1:18-25)
Ⅰ Ase amatuko aria, ogochika gokarua ase Kaisari Augusto, ng’a omobaro bw’abaanto oriikwe ase ense yonsi.
Ⅱ Oyo noro orenge omobaro bw’eritang’ani oriigetwe ekero Kurenio arenge gabana o Siiria.
Ⅲ Abanto bonsi bakagenda koriikwa, kera omonto ase omochie oye.
Ⅳ Na Yusufu nere akaimoka korwa Galili korwa ase omochie o Nazareti, agatiira kogenda Boyahudi, goika Omochie o Daudi, okorokwa Bethlehemu, ekiagera nigo arenge oyo bw’enyomba na eamate ya Daudi,
Ⅴ erinde ariikwe amo na Mariamu, ekiagera konya omoriereire boko, na Mariamu nigo arenge morito.
Ⅵ Ekero barenge aroro engaki yaye y’okoibora egaika.
Ⅶ Akaibora omwana oye omoisia omotangi, akamobekera chianga chi’obwana, akamwareria ase orotuba chiombe chiare koriera, ekiagera batanyorete ribaga ase enyomba y’abageni.
Abarisia na Abamalaika
Ⅷ Ase ense eyio mbarengeo abarisia baikaransete ase ebitii, bakorenda amaicho abo botuko.
Ⅸ Omomalaika bw’Omonene akabaorokera, na obonene bw’Omonene bokabaabarera; bagasogwa nomoondoko omonge.
Ⅹ Omomalaika akabateebia, “Timoiroka, ekiagera nabarenteire amang’ana amaya ay’omogooko omonene, oraabe ase abanto bonsi,
Ⅺ naki reero ase Omochie o Daudi oiboirwe Omotooria ase engencho yaino, nere Kristo Omonene.
Ⅻ Na eke nekemanyererio ase more: Namonyore omwana ekeng’werere obekeire chianga chi’obwana, bwareirie ase orotuba.”
ⅩⅢ Bwango igo mbarengeo amo nomomalaika oria omoganda o igoro, bagotogia Nyasae, bakoboora,
ⅩⅣ “Obonene ase Nyasae ore Igoro Mono,
na ase ense omorembe, ase abanto abwo bancheirwe nere.”
ⅩⅤ Ekero abamalaika abwo bachia koimoka kogenda igoro, abarisia baria bagateebania, “Gaki togende goika Bethlehemu, torore ring’ana eri riakorekire, eri Omonene atomanyirie.”
ⅩⅥ Bakagenda nomoayerero, bakanyora Mariamu na Yusufu, na omwana oria ekeng’werere bwareirie ase orotuba.
ⅩⅦ Bagachia komorora, bakaorokia ring’ana bateebetigwe igoro y’omwana oyio.
ⅩⅧ Bonsi abaigwete bagakumia ase aria bateebetigwe nabarisia.
ⅩⅨ Korende Mariamu akagacha amang’ana aya onsi, okoyarengereria ase enkoro yaye.
ⅩⅩ Abarisia bakairana, bagotogia Nyasae na komobaka ase amang’ana onsi baigwete, na ayabaroche, buna bateebetigwe.
Yeso Okorokwa Erieta
ⅩⅪ Rigachia goika rituko ria gatano na gatato, rituko ri’okomwarokia, akarokwa erieta riaye Yeso, riria riatoretwe nomomalaika ritang’ani atarabogorigwa oborito.
Okoirwa kwa Yeso ase Hekalu
ⅩⅫ Na ekero amatuko ogwesibia kwabo achia goika, ayachikiire ase amachiiko a Musa, bakamoira Yerusalemu, bamobeke ase Omonene
ⅩⅩⅢ (buna ariikire ase amachiiko y’Omonene, “Kera omoisia omotangi okoigora enda ya ng’ina narokwe omochenu ase Omonene”),
ⅩⅩⅣ barue ekeng’wanso buna ariikire ase amachiiko o Omonene, “Amaruma abere, gose amage ’amaruma abere.”
ⅩⅩⅤ Rora narengeo omonto Yerusalemu, erieta riaye Simioni. Oyio nigo arenge omonto omooronge, na nigo asigete Nyasae, ere nigo aganyete ogosemeria kw’Abaisraeli; na Omoika Omochenu nigo orenge igoro asare.
ⅩⅩⅥ Ere nigo aorokereretigwe n’Omoika Omochenu, ng’a takorora amakweri atararora Kristo Omonene.
ⅩⅩⅦ Nabo akaraagwa n’Omoika gocha ase Hekalu ime; na ekero abaibori bachia korenta omwana Yeso, bamokorere buna yarenge engencho y’amachiiko,
ⅩⅩⅧ Simioni akamonyora, akamoagata ase amaboko aye, agatogia Nyasae, akabora,
ⅩⅩⅨ “Omonene, bono otige omosomba oo agende nomorembe,
koreng’ana nering’ana riao.
ⅩⅩⅩ Ekiagera amaiso aane arorire ogotooreka kwao,
ⅩⅩⅪ oko kwabekire ase amaiso y’abanto bonsi,
ⅩⅩⅫ omobaso okomorekera abanto b’Ebisaku,
na obonene bw’abaanto bao Abaisraeli.”
ⅩⅩⅩⅢ Ise na ng’ina bagakumia ase aria akwanwa igoro asare.
ⅩⅩⅩⅣ Simioni akabasesenia, agateebia Mariamu ng’ina, “Rora, Omwana oyo otenenigwe ase ogosira na ogotoreka ase abange b’Abaisraeli, abe ekiorokererio kerabe kegokwanwa mamincha,
ⅩⅩⅩⅤ erinde ebirengererio bie chinkoro chinyinge biorokigwe. Boigo omoro nokobete omoyo oo.”
ⅩⅩⅩⅥ Narengeo omokungu omobani, Anna, omoiseke o Fanueli, bw’egesaku ki’Asheri. Ere nomong’ina bw’amatuko amange, obete nomosaacha oye emiaka etano na ebere magega y’okoera kw’oboiseke bwaye.
ⅩⅩⅩⅦ Ere agatigara ore omoboraka goika emiaka emerongo etano etato na ene (84), atana korua ase Hekalu ime, korende akaba okweng’ata, na ogosaba, na ogosasiima obotuko na omobaso.
ⅩⅩⅩⅧ Ase ekero keria ere akaoroka, agatogia Nyasae, agateebia abanto bonsi abarenge baganyete okoboorigwa kwa Yerusalemu amang’ana igoro y’Omwana oria.
Koirana gochia Nazareti
ⅩⅩⅩⅨ Barabwo bagachia gokoora goikerania onsi koreng’ana namachiiko Omonene, bakairana Galili goika omochie obo Nazareti.
ⅩⅬ Omwana oria agakiina, akamenteka chinguru, agaichorwa nobong’aini ne chisemi; na akanyora ogwancherwa ase Nyasae.
Omwana Yeso ase Hekalu
ⅩⅬⅠ Nabo abaibori baye barenge kogenda Yerusalemu kera omwaka ase rituko rinene ri’Epasaka.
ⅩⅬⅡ Goika agachia koba nemiaka ikomi na ebere, bagatiira kogenda aroro, buna yarenge engencho ye Rituko Rinene.
ⅩⅬⅢ Ekero Epasaka yaera, ekero barenge koirana, omwana Yeso agatigara magega agwo Yerusalemu, na abaibori baye tibamanya.
ⅩⅬⅣ Barabwo bagakaga ng’a nigo are ase omoganda obo, bakagenda orogendo rw’omobaso oyomo, bakamorigia ase abairi babo boigo nabasani.
ⅩⅬⅤ Ekero batamonyorete, bakairana Yerusalemu, bakamorigia.
ⅩⅬⅥ Ase rituko riagatato bakamonyora Hekalu ime, oikaransete gati ase aborokia, obategererete na kobaboria amaborio.
ⅩⅬⅦ Na bonsi abamoigwete bagakumia ase okomanya kwaye na okoiraneria kwaye.
ⅩⅬⅧ Abaibori baye bagachia komoorora bagaichana mono. Ng’ina akamoteebia, “Omwana one, naki gwatokorire iga? Rora, iso na inche twarenge gokorigia nomoichano.”
ⅩⅬⅨ Akabateebia, “Naki mokondigia? Timomanyeti ng’a nengwenerete koba ase enyomba ya Tata one?”
Ⅼ Tibamanya ring’ana riria abateebia.
ⅬⅠ Agatirimboka amo nabarabwo, agaika Nazareti, akaba nkobaigwera are. Ng’ina akagacha amang’ana aya onsi ase enkoro yaye ime.
ⅬⅡ Yeso akamenteka gokina ase obong’aini ne chisemi, na ase omobere, akanyora ogwancherwa ase Nyasae na Mwanyabaanto.