EKERERO GIA YEREMIA
Ogochaakera
Egetabu eke ekienge gi’ekerero nigo kere ogosangereria kwa amasairi atano, agwo ase omoriki agokwanera igoro yogosarigwa kwa Yerusalemu ase omwaka 586 nyuma Yeso ataraiborwa. Nigo akwemurunganeria Nyasae ase engencho y’egekorwa ekio, korende abanto ba Yerusalemu n’abarai babo nabwo bagerete Yerusalemu ogasarigwa, ase igo ase ekerero eke nabwo bakomochigwa. Nonya nigo abanto nigo bakoegwa ogosemeria nga Nyasae nabakonye ase amatuko are motwe.
Ase emeyega y’Abaisraeli amasairi aya nigo arenge ay’engencho enene naro bare goteera ekero bare gokora omoyega bw’ogosieka omwaka erio bainyora buna Hekalu y’eritangani yasaretigwa aria Yerusalemu.
Amasairi ane y’eritangani ase omonwa bw’Ekeiberania nigo ariikire ase okobwatia omoroberio bw’echinuta 22 ch’Ekeiberania. Kobwatekana n’omoroberio oyio, egesieri 1, 2 na 4 nigo bibwate chiraini 22, korende egesieri 3 nigo kebwate chiraini 66. Korende n’ering’ana ri’ogokumia mono buna egesieri 5 nigo kebwate chiraini 22, korende chirochio tichirikiri ase enchera eyio buna echinde.
Okobagwa kw’egetabu eke:
Emechando ya Yerusalemu 1:1-22
Egesusuro na ogosemeria 3:1-66
Yerusalemu yatagoire 4:1-22
Ogosaba gw’okororerwa amaabera 5:1-22
Ⅰ
Emechando ya Yerusalemu
Ⅰ Naki omochie oyo otigaire bosa, oyio orenge oichire n’abanto!
Naki otigaire buna omokungu omotakanwa
oyio orenge omonene ase egati y’ebisaku!
Oyio orenge buna eting’ana ase egati-gati y’emechie,
bono obeire omosomba ase emechie ende.
Ⅱ Nigo okorera nobororo botuko bokia,
na amariga nigo agoiteka ase chimboto chiaye;
ase abanchi baye bonsi onde tari okomoremia;
abasani baye bamong’ainire,
babeire ababisa baye.
Ⅲ Abayuda bairirwe ase obosomba,
babeire nemechando na obokong’u batari gotimoka.
Nigo bamenyete ase egati y’abanto b’ebisaku;
abakobabwatia baabaikereire kobare nemechando.
Ⅳ Chinchera chikogenda Sayoni nigo chiichanete,
ekiagera onde tari ogocha ase Amatuko Amanene achiikire;
ebiita biaye bionsi nigo bitigarete bosa,
na abakuani baye bonsi nigo baichanete.
Abaiseke baye abekungi nigo baumatete,
na omochie omonyene nigo ore nobororo obonge.
Ⅴ Ababisa baye babeire abanene baye,
ee, ababisa baye nigo bagendererete goseseneka.
Omonene oyotomeire emechando ase engencho y’ogosaria kwaye okonge,
na ababisa baye bairire abana baye ase obosomba.
Ⅵ Ogosikwa gwonsi kwarure ase abanto ba Sayoni;
abagaambi baye babeire buna chingabi chitabwati ase chikorisia;
batamire korwa ase abakobabwatia, tibari ne chinguru.
Ⅶ Ekero abanto ba Yerusalemu baarenge nemechando na obokong’u,
bakaba bakoinyora ebinto ebiya mono baarenge nabio ase amatuko a kare.
Agwo ekero bagwete ase amaboko y’abachandi,
onde tarenge ore kobakonya,
abachandi babo bakobachecheria ase engencho y’okogwa kwabo.
Ⅷ Abanto ba Yerusalemu bakorire ebibe ebinene;
ase ayio babeire okogechia,
bonsi abaabasigete baabachayire,
ekiagera barorire obogetirianda bwabo.
Ee, omochie omonyene nkweumia ore,
bweonchoire gochia magega.
Ⅸ Riko riaye nigo riarenge ase chianga chiaye,
tarengereretie igoro y’omoerio oye.
Ase ayio okogwa kwaye gokaba ogw’okoondokia,
tarenge nonde okomoremia.
“Aye Omonene, rigereria emechando yane,
ekiagera omobisa one ngwetogia are!”
Ⅹ Omobisa oyio oramboire amaboko aye
gochia gosakora ebinto bionsi bi’erigori rinene bire ase omochie ime;
ee, omochie oyio ororire abanto b’ebisaku bagosoa Aase aye Aachenu,
agwo aye Omonene gwakanete ng’a tibasoa ase omosangererekano oo.
Ⅺ Abanto bonsi b’omochie nigo baumatete,
ekero barigereretie endagera;
barabwo baoonirie chinibo chiabo bagore endagera barie,
erinde banyore chinguru.
“Aye Omonene, koranche ondigererie, ekiagera nachayirwe.”
Ⅻ “Inee! Inwe mwensi aba mogoeta inchera aa,
aya nigo are amang’ana abosa ase more?
Rigereria morore gose emechando ende ere buna eyane,
eyio yarentetwe ase ’nde,
eyi’Omonene andeterete,
ekero arenge n’endamwamu ekobera.
ⅩⅢ “Otomire omorero korwa igoro osambire amauga aane oyabuire,
otegire oboreba ase amagoro aane;
ong’iranirie magega;
ontigire inde bosa, ntari ne chinguru nde n’obororo omobaso boira.
ⅩⅣ “Nigo abarete amamocho aane onsi akayasangereria amo akayasiba ase ebigoti biane buna rikorogoto,
na ase enchera eyio akang’uura chinguru ase oborito bwaye.
Omonene nigo ambegete ase amaboko ay’abwo ntanyare kobua.
ⅩⅤ “Omonene bwangire abanto bonsi chituoni, abamenyete ime yane,
orangeirie omosangererekano bw’abaanto,
erinde osenyente abamura bane.
Abayuda abwo banga buna omoiseke omwekuungi,
Omonene obatiringeire inse,
babeire buna amasabibu agotiringwa ase ekemitero.
ⅩⅥ “Ase engencho y’amang’ana aya nigo nkorera,
amaiso aane nigo akoiyeria amariga,
oyio okondemia nigo are aare korwa ase ’nde,
oyio okong’a chinguru chinyia;
abana bane batigaire bare boka,
ekiagera ababisa bane bambuire.”
ⅩⅦ Abanto ba Sayoni basamunsire amaboko abo,
korende onde tari okobaremia.
Omonene ochikiire igoro y’abanto ba Yakobo
ng’a abanto abwo baabaetananire babe ababisa babo;
Yerusalemu obeire okogechia ase bare.
ⅩⅧ Omonene nomonyene oboronge,
nonya naboigo inche tinyigwereti amachiiko aye.
Inwe abanto bonsi, tegerera moigwe,
morigererie emechando yane,
abaiseke bane abekungi, na abamura bane, boosirwe na koirwa ase obosomba.
ⅩⅨ “Inche nkarangeria abanchi bane ng’a bankonye, korende bakang’aina;
abakuani bane na abagaaka bagakwera ase omochie ime,
ekero baarenge korigia endagera barie banyore chinguru chinyia.
ⅩⅩ “Aye Omonene, rigereria buna inde ase emechando,
omoyo one oonchokanire,
na enkoro yane yaonchoranirwe,
ekiagera nabeire oyo otari omoigweri.
Abana bane baitirwe nemioro ase chinchera,
na amakweri abeire ase enka yane.
ⅩⅪ “Abanto baigure buna ng’umatete,
na onde tari nonya noyomo okondemia.
Ababisa bane bonsi baigure igoro y’emechando yane,
bagokire ng’a naye gwakorire aya.
Renta rituko riria gwateebete ng’a orarente,
na barabwo babe buna inche.
ⅩⅫ “Tiga obobe bwabo bwonsi bororekane ase obosio bwao,
obae egesusuro;
buna kwang’ete inche ase engencho y’ogosaria kwane,
ekiagera nigo ng’umatete mono,
na enkoro yane yanyarekire.”