Ⅱ
Omonene okorua egesusuro ase Yerusalemu
Ⅰ Naki Omonene atubire omochie o Sayoni nomosunte,
ekero arenge n’endamwamu!
Otugutire obonene bokomeka‐meka bw’Abaisraeli
korwa igoro gocha inse aa.
Ere tainyoreti egeteni ki’amagoro aye,
ase rituko ri’endamwamu yaye.
Ⅱ Omonene oiyeirie inse obomenyo bwonsi bw’abaanto ba Yakobo atari namaabera,
otagoire chiburi chi’ense y’Abayuda, ekero arenge nendamwamu;
osiririe oborwoti, na ourire abanene baye amasikani.
Ⅲ Obutoire ching’unchara chionsi chi’Abaisraeli ore nendamwamu yaye entindi,
orusirie okoboko kwaye gw’okorio korwa ase bare ase amasio ’ababisa babo:
ere osambire abanto ba Yakobo
buna omorero ekebemberi ogosamba ase chinsemo chionsi.
Ⅳ Ere otingire obota bwaye buna omobisa agotinga,
otenenire na kobong’usa nokoboko kwaye gw’okorio buna omochandi;
agaita bonsi aba twetogeretie.
Igoro y’obomenyo bw’abaanto ba Sayoni,
oumoire ekeririanda kiaye kere buna omorero.
Ⅴ Omonene obeire buna omobisa, osiririe Abaisraeli;
osiririe chinyomba chiaye chionsi chi’oborwoti,
otagoire chiburi chiaye chinkong’u;
naende omenteire abanto ba Yuda okorera na okweumia.
Ⅵ Ere oiyeirie inse orobago rwaye rore buna orw’omogondo,
ee, osaririe aase emesangererekano y’ogosasiima ekobeera.
Omonene otigire abanto bebire Amatuko Amanene ne Chisabato agwo Sayoni,
na ase okogechigwa kwaye okonene bwangire omorwoti na Omokuani.
Ⅶ Omonene bwangire egesasiimero kiaye,
otigire Aase aye Aachenu asarigwe;
otigire chindwaki chiaye ase amaboko ’ababisa.
Abanto bakuurire ime ase enyomba y’Omonene,
buna nase rituko ri’omosangererekano bw’ogosasiima.
Ⅷ Omonene onachire ase ebirengererio biaye gosaria chindwaki chi’omochie o Sayoni,
oramboire engori y’okorengera.
Tagotanga okoboko kwaye tayosaria;
otigire chiburi ne chindwaki chikweumia,
chionsi amo nigo chiumatete.
Ⅸ Ebiita biaye biarimeire ase riroba,
emekorogoto yaye yabunirwe na gosarigwa.
Omorwoti oye, na abagaambi baye,
nigo bamenyete ase egati y’abanto b’ebisaku bitabwati amachiiko,
na ababani baye tibari konyora amaroro korwa ase Omonene.
Ⅹ Abagaaka b’omochie o Sayoni nigo
baikaransete inse bakirete‐kiri,
besiarerete ebuse ase emetwe yabo
na kweboyia chigunia,
abaiseke abekungi ba Yerusalemu nigo baturegete emetwe yabo gochia inse.
Ⅺ Amaiso aane arosire ase okoiyeria amariga,
omoyo one oonchokanire,
na enkoro yane yachandekire
ase engencho y’ogosaria kw’omochie bw’abaanto bane,
ekiagera abana, nonya nabakogonka, nigo bakona‐kogireka ase chinchera chi’omochie.
Ⅻ Barabwo nigo bakoboria abang’ina:
“Ng’ai endagera ere, na edivai?”
Nigo bakona‐kogireka na korara ase chinchera chi’omochie buna abaakirwe chingoma,
batweka mo ase amaboko ’abang’ina.
ⅩⅢ Aye omochie o Yerusalemu, ninki ndagoteebie?
Ninki ndakoreng’anie?
Mang’ana ki anga buna ayao ndagoteebie, erinde nkoremie,
aye Sayoni ore buna omoiseke omwekuungi?
Ogosarigwa kwao nokonene buna enyancha ere enene,
ning’o oranyare gokogwenia?
ⅩⅣ Abaabani bao nigo bakobarorera amaroro ’obong’ainereria are bosa,
tibakoorokeretie obobe bwao, erinde nario orairanerigwe amaya
ao; korende aya amaroro abo ayakworogetie,
nigo arenge ay’oborimo, agerete ogatantanigwa.
ⅩⅤ Abanto bonsi abagoeta inchera nigo bagoaka chinkobi ase okogochaaya,
nigo bakobugia emeroria na gosingiseria omochie o Yerusalemu emetwe, bakobora:
“Inee! Omochie oyio noro orenge korokwa omoikeranu bw’obosiani, na omogooko bw’ense yonsi?”
ⅩⅥ Ababisa bao bonsi baasamirie emenwa yabo
gokobugeria emeroria na gokoriananeria amaino, bakobora:
“Twayosaririe!
Ee, rituko eri nario twaganetie,
bono twariikeire, twarirorire!”
ⅩⅦ Omonene okorire aya achiigete ng’a ayakore,
oikeranirie ring’ana riaye aroberetie agwo kare,
otagoire atari namaabera,
otigire ababisa bao bagochenga igoro yao,
ere okinirie ching’unchara chi’ababisa bao.
ⅩⅧ Chinkoro chiabo nigo chikorera ase Omonene.
Ee, aye orwaki rw’omochie o Sayoni,
tiga amariga ao aiteke buna orooche, omobaso na obotuko!
Tobaisa korosa, gose gotimokia amaiso ao.
ⅩⅨ Imoka, orere botuko bokie!
Ekero oborendi bw’obotuko bogochaka,
oumore ayare ase enkoro yao ime ase obosio bw’Omonene,
buna okoumora amaache!
Rambora amaboko ao asare osabere obogima bw’abana bao,
abwo bagoyire nenchara ase amatabekania e chinchera chionsi.
ⅩⅩ Aye Omonene, rigereria orore!
Ning’o gwakorerete buna ayio?
Inee! Abakungu mbarie oroiboro rwabo,
abana abwo barerete ase amaboko abo?
Inee! Abakuani na ababani mbaiterwe agwo Aase Aachenu a Omonene?
ⅩⅪ Abamura na abagaaka nigo baraire ase chinchera inse,
abaiseke bane, na abamura bane, baitirwe nemioro;
ase rituko ri’endamwamu yao kwabaitire otari namaabera.
ⅩⅫ Buna ase rituko ri’omoyega omonene okarangeria ababisa bane bakanyoboyia korwa chinsemo chionsi;
ase rituko ri’endamwamu y’Omonene
onde tatooregete, gose gotigara,
ase abwo nabogoretie na kobareera.
Ababisa bane baabasiririe.