Ⅲ
Egesusuro, okoonchoka, na ogosemeria
Ⅰ Inche nomonto narorire emechando
inse y’endamwamu y’Omonene ere buna enyimbo.
Ⅱ Ontang’anire na kong’etia ase omosunte,
gose tari ase omobaso
Ⅲ Ekeene, nigo akona‐koonchora okoboko kwaye igoro yane,
ekero ase ekero omobaso boira.
Ⅳ Otigire chinyama chi’omobere one, ne risankwa, bigosareka;
obunire amauga aane.
Ⅴ Onsibire ase eburi ime
na ong’etananeirie obororo na obokong’u.
Ⅵ Ombekire imenye ase omosunte,
buna abanto baria bakwete kare.
Ⅶ Onsiekeire ase chinsemo chionsi,
tinkonyara gosoka;
onsibeire ebinyuri ebirito.
Ⅷ Nonya nkorera neriogi rinene ng’a nkonywe,
ere bwangire koigwa ogosaba kwane.
Ⅸ Oribirie chinchera chiane namagena abaachire,
oonchoranire oboeto bwane.
Ⅹ Nigo amboerete buna edubu, enyang’au entindi, ekoboera,
na buna endo eboerete eite.
Ⅺ Oonchoranire chinchera chiane na kombutorana ebing’ese,
ontigire ntang’ang’ete bosa.
Ⅻ Otingire obota bwaye, na ombekire
imbe ekerenga akoruta chinsara.
ⅩⅢ Ere ondasire ne chinsara chi’egochi yaye,
chiasoire ase chinyigo chiane.
ⅩⅣ Inche nabeire oyo ogosekererwa nabaanto bane bonsi,
na engeero y’ogochaaya kwabo omobaso boira.
ⅩⅤ Ong’ichoirie nobororo,
ong’eire ekenyugwa ekeroro nanyure.
ⅩⅥ Obunire amaino aane ase ogontakunia chinche chi’amagena,
ontubire neribu.
ⅩⅦ Aye kwarusirie omorembe ase omoyo one,
na inche nebire ayare ay’omogooko.
ⅩⅧ Ngateeba, “Chinguru chiane chiaerire,
na ogosemeria kwane ase Omonene boigo.”
ⅩⅨ Inyora emechando yane, na obokong’u bwane,
buna nanyure ay’obororo na obosongo.
ⅩⅩ Omoyo one nigo ogendererete koyainyora,
na bwekeeirie ime yane.
ⅩⅪ Korende amang’ana aya nigo nkoyainyora ase omoyo one,
ase ayio ninde nogosemeria.
ⅩⅫ Nobwanchani bw’Omonene botari koera ng’a titosiriri,
ekiagera amaabera aye tari koera;
ⅩⅩⅢ nigo bire ebiyia ase kera emambia,
ee, obwegenwa bwao nigo bore obonene.
ⅩⅩⅣ Omonene nere egetari kiane, ayio naro omoyo one ontebirie,
ase ayio nimosemeretie.
ⅩⅩⅤ Omonene nigo are omuya ase onde bwensi omoganyete,
ee, nomuya ase oyo okomorigia.
ⅩⅩⅥ Nigo ere buya ase omonto okoba n’obotoereru
na koganya ogotooreka gokorwa ase Omonene.
ⅩⅩⅦ Nigo ere buya ase omonto okobogoria rikorogoto ekero are omoke.
ⅩⅩⅧ Tiga aikaranse ao bweka akire‐kiri,
ekiagera Omonene nere omotwekire egurube eyio.
ⅩⅩⅨ Tiga abeete omonwa oye ase riroba akire‐kiri,
aande nabo ogosemeria korabeo.
ⅩⅩⅩ Tiga aonchore orosea rwaye gochia ase oyio okomoaka,
na oyio aisaneke noborami.
ⅩⅩⅪ Omonene tagotuguta omonto goika kare na kare.
ⅩⅩⅫ Nonya omobekire ase omoichano, namororere amaabera naende,
ase engencho y’obwanchani bwaye
obonene bwa botambe.
ⅩⅩⅩⅢ Ere tari gwancha gochanda Mwanyabaanto, gose kobaichania.
ⅩⅩⅩⅣ Omonto ogotiringera inse abasibwa
bonsi bare ase ense,
ⅩⅩⅩⅤ gose koonchorana oboronge bw’omonto ase obosio bw’Oyore Igoro Mono,
ⅩⅩⅩⅥ gose gokorekania ekiina ki’omonto onde bwensi.
Inee! Ayi’Omonene nkoyaanchera are?
ⅩⅩⅩⅦ Ning’o okwanete ring’ana, na rirorio rigakoreka,
onye Omonene tarichiigete rikorwe?
ⅩⅩⅩⅧ Inee! Amabe na amaya,
tari korwa ase omonwa bw’Oyore Igoro Mono?
ⅩⅩⅩⅨ Nase ki rende Mwanyabaanto ore moyo akwemurunganeria?
Nase ki akwemurungania ekero akonyora egesusuro ase engencho y’ebibe biaye.
ⅩⅬ Tiga twetuke intwe abanyene na toteeme chinchera chiaito,
erio tomoiranere Omonene!
ⅩⅬⅠ Tiga toimokererie chinkoro chiaito igoro, na amaboko aito,
gochia ase Nyasae ore igoro, totebe:
ⅩⅬⅡ “Intwe twasaririe asore, twabeire abatari abaigweri,
naye togotwabera.
ⅩⅬⅢ “Aye gwetubire endamwamu na gwatochandire,
gwaitire, gose tobeti namaabera.
ⅩⅬⅣ Aye omonyene gwetubire riire,
ng’a ogosaba gwaito tikogoika ang’e.
ⅩⅬⅤ Aye gwatokorire twabeire eubi na abaangire,
ase egati y’ebisaku bi’ense.
ⅩⅬⅥ “Ababisa baito bonsi baasamirie emenwa yabo gotosekerera.
ⅩⅬⅦ Obwoba ne chiirima biatocheire amo nogosaria na ogosirigwa.
ⅩⅬⅧ Amaiso aane nigo agoitera amariga amange buna amaache a rooche,
ase engencho y’ogosirigwa kw’omochie bw’abaanto bane.
ⅩⅬⅨ “Amaiso aane abeire agoitera amariga atari gokama,
gose korosa,
Ⅼ goika ekero Omonene ararigererie korwa igoro na arore ayio onsi.
ⅬⅠ Amaiso aane agerire nabeire nomoichano ase omoyo one
ase engencho y’abaiseke bonsi b’omochie one.
ⅬⅡ “Nigo narenge korigigwa buna enyoni
nabwo baarenge ababisa bane engencho ende etaiyo.
ⅬⅢ Bakanduta ase engoro ime inde moyo,
na konduta amagena.
ⅬⅣ Amaache agaichora agaeta ase omotwe one igoro,
ngateeba: Omoerio one oikire.
ⅬⅤ “Aye Omonene, nigo narangeretie erieta riao
korwa ase engoro entambe,
ⅬⅥ na aye okaigwa okorera kwane;
toticha amato ao ase ogwechanda kwane ekero nkorera.
ⅬⅦ Aye nigo kwang’igete ang’e ase rituko riria narerete asore,
oganteebia: Toondoka!
ⅬⅧ “Aye Omonene, kwarwanereire omoyo one
na gwatooririe obogima bwane.
ⅬⅨ Kwarorire obobe obo nakoreirwe,
onache ekiina kiane ase oboronge.
ⅬⅩ Aye kwarorire buna ababisa bane baganetie korusia egesiomba,
na buna bakorire emeroberio emebe ase ’nde.
ⅬⅪ “Aye Omonene, noigwete okorama kwabo,
na emeroberio yabo yonsi igoro yane.
ⅬⅫ Aya abwo bakondwania bagokwana
na korengereria,
nigo bare mamincha yane omobaso boira.
ⅬⅩⅢ Rora, ekero abwo baikaransete, na ekero bakoimoka,
ninche engeero yabo bagochaaya.
ⅬⅩⅣ “Aye Omonene,
nobaakane koreng’ana nogokora kw’amaboko abo.
ⅬⅩⅤ Otube chinkoro chiabo nomosunte;
okoragereria kwao kobe igoro yabo.
ⅬⅩⅥ Aye Omonene, babwatie nendamwamu yao, obasirie,
basire korwa inse y’erioba!”