Ⅳ
Yerusalemu magega kogure
Ⅰ Naki etaabu yasiririe obomeka‐meku bwaye!
Naki etaabu echenire yaonchokire!
Amagena aya Aase Aachenu asiareirwe
ase amatabekania e chinchera chionsi.
Ⅱ Abamura ba Sayoni abare nengencho enene,
abwo bareng’anirie ne chitaabu chingiya,
naki yabeire ng’a bareng’anigwe ne chinyongo chi’amaroba,
echire emeremo y’amaboko ’abakori chinyongo?
Ⅲ Nonya ne chisese chi’orosana nkogonkia chire chimanwa chiabo,
korende abakungu b’omochie bw’abaanto bane babeire abatindi,
buna chisagero chire ase erooro.
Ⅳ Chimeme chi’abana bakogonka chiabwatanire namang’ang’ura ase engencho y’erang’o;
abana abake nigo bagosaba endagera,
korende monto onde tari okobaa.
Ⅴ Abanto abwo baarenge koria endagera engiya mono
bakwereire ase chinchera;
na abwo barenge kweboyia chianga chimonyinga,
nigo baraire ase ebinge bi’eribu.
Ⅵ Aya nigo abanyorete,
ekiagera ebibe biakorire ase omochie bw’abaanto bane nigo biarenge ebinene
kobua ebi’abaanto ba Sodomu,
omochie oyio nigo oonchoranetwe ase etagika eyemo,
na okoboko kw’onde tikwayokunete.
Ⅶ Abagaambi baye nigo baarenge komeka-meka kobua amagena ’embura,
nigo baarenge abarabu se kobua amabeere,
emebere yabo nigo yarenge emebariri kobua amagena amabariri,
na okororekana kwabo nigo kwarenge buna safiro, rigena rie rigori rinene.
Ⅷ Bono amaiso abo abeire amamwamuti kobua embiro,
tibari komanywa agwo ase chinchera;
amasankwa ’emebere yabo abwatanire namauga abo,
omire pa buna amasabo amomo.
Ⅸ Mbare negesio abwo bagokwa ase ogoitwa nemioro
kobua abwo enchara egoita,
ekiagera barabwo nigo bakogenderera korea na korea,
ase okoborwa gw’okwama kw’emegondo.
Ⅹ Amaboko ’abakuungu abare namayianda
aiyekire abana babo abanyene;
abwo nigo babete endagera yabo,
ekero omochie bw’abaanto bane orenge gosirigwa.
Ⅺ Omonene oumoire okogechigwa kwaye,
ee, oumoire endamwamu yaye entindi;
na ase Sayoni otongirie omorero,
osambire amaroso aye.
Ⅻ Abarwoti b’ense, na abanto bonsi bamenyeteo,
tibegenete ng’a omochandi, gose omobisa onde bwensi,
nkonyara arenge gosoa ase ebiita bia Yerusalemu.
ⅩⅢ Ayio nigo akoregete ase engencho
y’ebibe bi’ababani baye,
na ebi’abakuani baye,
abwo baiterete amanyinga ’abanyene oboronge,
agwo ase omochie ime.
ⅩⅣ Barabwo bakaba bakoong’anya ase chinchera bare buna emeuko
bakaba bakwegindia amanyinga,
na onde tarenge gokuna chianga chiabo.
ⅩⅤ Abanto bakagobera, bakaboora: “Karue aa! Inwe timochenegeti!
Karue aa! Karue aa! Timokuna abanto!”
Ase ayio barabwo bagatama na koombogana.
Abanto b’ebisaku bakabakwana bakaboora,
“Tibakogenderera komenya ase tore.”
ⅩⅥ Okobea kw’Omonene kwabasiareire,
takobechandera naende;
abakuani tibasigetwe,
na abagaaka tibaroreretwe amaabera.
ⅩⅦ Amaiso aito arosire ase okorigereria,
na okoganya bosa ng’a natokonywe;
korwa ase ebitengero biaito,
nigo twaganyete egesaku getanyare gototooria.
ⅩⅧ Ababisa baito nigo batoboerete,
titwarenge konyara gotaara ase
chinchera chiaito.
Engaki yaito nigo ere ang’e koera; amatuko aito abarirwe;
ee, omoerio oito oikire.
ⅩⅨ Abachandi baito nigo baare abaango kobua ebiongo bikoiruruka,
nigo batoseretie gochia ase ebitunwa igoro,
bagatoboera ase erooro.
ⅩⅩ Omoakwa amaguta Omonene,
oyio orenge omoika bw’obogima bwaito,
akabwatwa ne chiirima chiabo,
oyio nere twateebete ng’a ase ekiriri kiaye
nao toramenye ase egati y’ebisaku.
ⅩⅪ Inwe abanto ba Edomu, inwe abamomenyete ase ense ya Usi,
goka na gochenga!
Nonya nasemore egekombe nkebaikere,
monywe motinde goika motigare getirianda.
ⅩⅫ Inwe abanto ba Sayoni,
egesusuro ki’ebibe biaino giaikeranigwe.
Omonene takogenderera gokoira ase obosomba;
korende inwe abanto ba Edomu,
Omonene nabae egesusuro ase engencho y’ebibe biaino,
ee, naorokie ebibe biaino maiso marore.