Ⅴ
Ogosaba gw’okonyora amaabera
Ⅰ Aye Omonene, inyora aya atonyorire,
origererie orore ogochaywa gwaito.
Ⅱ Omwando oito oeirwe abanto abaao,
chinyomba chiaito chiaeirwe abamenyi.
Ⅲ Twabeire buna chintakana, chitari nabaise,
abaababa nigo banga buna ababoraka.
Ⅳ Amaache tokonywa goika toakane chitaabu,
ne chinko togwota nigo tokogora.
Ⅴ Abachandi baito nigo batobwatete amogoti,
nigo tokorosa mono, titori konyora ogotimoka.
Ⅵ Twaramboreire Abamisiri na Abaasuri amaboko
batoe endagera egotoisana.
Ⅶ Chisokoro chiaito nigo chiakorete ebibe, bono tichiyo;
goika tobogorie egesusuro ki’ebibe biabo.
Ⅷ Abasomba nabwo bagotogaambera,
na onde tari ogototooria korwa ase amaboko abo.
Ⅸ Nigo tokonyora endagera yaito ase okobeeka obogima bwaito ase emechando,
ekiagera emioro nere ase erooro.
Ⅹ Amasankwa ’emebere yaito nigo are ne riberera buna erie riko,
ekiagera enchara nigo egotosamba buna omorero.
Ⅺ Abakungu baito bare Sayoni bakoreirwe amabe,
boigo nabaiseke abekungi abare ase emechi y’Abayuda.
Ⅻ Abagaambi baito babwatirwe na gosungwa,
na abagaaka baito tibasikiri.
ⅩⅢ Abamura baito nabwo bakobogoria chingena chigoserwa,
na abana abake nigo bakoritoerwa ase okobogoria chinko, bagwa.
ⅩⅣ Abagaaka tibari goikaransa geita ki’omochie,
na abamura batigire kobugia amakano abo.
ⅩⅤ Omogoko bwe chinkoro chiaito osirire;
ogotenga gwaito kwaonchokire kwabeire ebirero.
ⅩⅥ Chigutwa chiarenge ase emetwe yaito chiagure inse.
Obobe nobwaito, ekiagera twakorire ebibe!
ⅩⅦ Ase engencho y’ayio chinkoro chiaito chiarwarire,
na ase engencho y’ayio amaiso aito abeire orotutu.
ⅩⅧ Ekiagera egetunwa gia Sayoni giatigaire kere bosa,
chisese chi’orosana nao chigotaara.
ⅩⅨ Korende aye Omonene nigo oragaambe kare na kare,
ekerogo kiao ki’obogaambi nigo kerabeo ebiaare ase ebiaare.
ⅩⅩ Naki gwatwebire kogenderera botambe?
Naki gwatotigire ase engaki entambe iga?
ⅩⅪ Aye Omonene, toiranie gocha asore, erinde toiranigwe,
onchora amatuko aito oyakore abe amayia, abe buna aria a kare!
ⅩⅫ Gose ngwatotangire kegima?
Nigo ogendererete kogechigwa mono naintwe?