ⅩⅣ
Yeso okoboerwa aitwe
(Mat 26:1-5; Luk 22:1-2)
Ⅰ Konya atigaire amatuko abere ne rituko rinene ri’Epasaka ribe, na eri ’Emegati etabekiri memera. Abakuani abanene na aborokia b’amariiko bakarigia enchera bakobwatera Yeso nobong’ainereria, banyare komoita,
Ⅱ korende barabwo bagateeba, “Titomobwata ekero kie rituko rinene, ekiagera abanto nigo bararente rirorooche.”
Yeso ogoakwa amaguta agwo Bethania
(Mat 26:6-13; Yoh 12:1-8)
Ⅲ Yeso nigo arenge Bethania ase enyomba ya Simioni oyorenge noborwaire bwa ukoma. Ekero Yeso aikaransire ase endagera, omokungu agacha orenge nechuba ye rigena rirabu ere namaguta agotioka buya, aye rigori rinene, agaata echuba eria, akamonyororokeria omotwe oye.
Ⅳ Abanto bake ase abwo barenge oo bakagechigwa ase emioyo yabo, bakaboora, “Nase ki ogosiria amaguta engencho buna eye?
Ⅴ Inaki amaguta aya anga naoonigwa chidinari amagana atato na kobua, abataka baegwe.” Bakamwemurunganeria omokungu oria mono.
Ⅵ Yeso agateeba, “Motige! Nase ki mokomorosia? Ere onkoreire emeremo emiya.
Ⅶ Inaki amatuko onsi nigo more nabataka amo nainwe, na kero kende gionsi mwanchete, namonyare kobakorera amaya, korende timori nainche amatuko onsi.
Ⅷ Okorire eki abuete, goaka omobere one ase ogotindekwa kwane.
Ⅸ Nekeene nabateebirie: Kera aase enchiri erarandigwe ase ense yonsi, neri akora oyo nariatorwe ase okomoinyora.”
Yudasi ogwancherana korwa Yeso
(Mat 26:14-16; Luk 22:3-6)
Ⅹ Yudasi Iskariota, ere noyomo bwa baria ikomi na babere, akagenda ase abakuani abanene, anyare komorua ase bare.
Ⅺ Na barabwo bagachia koyaigwa bakagoka, bakamoriera eira komoa chitaabu. Akarigia enchera akomoruera ekero aranyore ribaga rigiya.
Yeso okoria Epasaka y’omoerio n’aborokigwa baye
(Mat 26:17-30; Luk 22:7-23; Yoh 13:21-30; 1 Abakr 11:23-25)
Ⅻ Goika rituko rie ritang’ani ri’Emegati etabekiri memera, ekero gi’okonyenya emanwa y’eng’ondi y’Epasaka, aborokigwa baye bakamobooria, “Ng’ai origetie togende tokoroiserie oriere Epasaka?”
ⅩⅢ Erio Yeso agatoma babere baborokigwa baye akabateebia, “Genda ase omochie na moumerane nomosaacha obogoretie enyongo ere namaache; momotuny’ane,
ⅩⅣ na aande onsi arasoe moteebie omonyene enyomba: Omworokia oteebire: Ng’ai ere enyomba y’abageni ndiere Epasaka amo naborokigwa baane?
ⅩⅤ Na ere omonyene naborokie akanyomba akanene ka irongo igoro, karoisigwe kabeire ang’e; agwo motoroiserie.”
ⅩⅥ Aborokigwa bagasoka, bakagenda omochie, bakarora buna abateebetie, bakaroisia Epasaka.
ⅩⅦ Ekero riaba mogoroba agacha amo na baria ikomi na babere.
ⅩⅧ Na barabwo kobaikaransire ase endagera bakoria, Yeso akabora, “Nekeene, nabateebirie: Oyomo oino oyokoria amo nainche nandue.”
ⅩⅨ Aborokigwa baye bagachaaka goichana, bakamobooria oyomo ase oyomo “Inee! Ninche?”
ⅩⅩ Akabateebia, “Noyomo bw’aba ikomi na babere, ere oyogotobeka amo nainche omogati ase esani.
ⅩⅪ Inaki Omwana-o-Mwanyabaanto nkogenda are buna ariikeretwe korende obobe nobwaye omonto oria orure Omwana-o-Mwanyabaanto. Nanga mbuya ase are omonto oria, nonya ataiboretwe.”
Emesa y’Omonene
ⅩⅫ Ekero barenge koria, Yeso akabogoria omogati, akayosesenia, akayosamunyora, akaa aborokigwa baye, akabora, “Bogoria! Oyo noro omobere one.”
ⅩⅩⅢ Akabogoria egekombe, na ekero airaneirie ng’a mbuya mono, akabaa. Bagakenywera bonsi.
ⅩⅩⅣ Akabateebia, “Aya naro amanyinga aane, ay’okobwatana okoyia, aitekire ase engencho y’abange.
ⅩⅩⅤ Ekeene nabateebirie: Tinkonywa naende nonya ng’ake okwama kw’emesabibu goika rituko riria ndache gokonywa okoyia ase oborwoti bwa Nyasae.”
ⅩⅩⅥ Kobakoorire goteera Ogoteera, bagasoka kogenda egetunwa ki’Emezeituni.
Yeso okobana Ng’a Petero okomokana
(Mat 26:31-35; Luk 22:31-34; Yoh 13:36-38)
ⅩⅩⅦ Na Yeso agateebia aborokigwa baye, “Inwe mwensi inamogochwe na gontiga, naki nariikire: Ning’ake omorisia, ne ching’ondi nachiserebekane.
ⅩⅩⅧ Korende magega y’okobooka kw’ane, nimbatang’anere kogenda Galili.”
ⅩⅩⅨ Petero akamoteebia, “Neba imbagochwe bonsi na kogotiga, korende tari inche.”
ⅩⅩⅩ Yeso akamoteebia, “Ekeene nagotebirie: Reero, ase obotuko obo, ritang’ani etuoni etarabuga ara kabere, nonkane ara gatato.”
ⅩⅩⅪ Korende Petero ere akamenta gokwana mono, “Nimba ngokwa amo naye, tinkogokana nonya ng’ake.” Na bonsi bagateeba boigo.
Yeso ogosaba Gethisemane
(Mat 26:36-46; Luk 22:39-46)
ⅩⅩⅫ Naende bagaika aase akorokwa Gethisemane: Yeso agateebia aborokigwa baye, “Ikaransa aa, ekero ngosaba.”
ⅩⅩⅩⅢ Akaira Petero na Yakobo na Yohana amo nere, agachaaka goichana na gwechanda mono.
ⅩⅩⅩⅣ Akabateebia, “Omoyo one nore nobororo obonge, goika ogokwa; ikaransa aiga, morende.”
ⅩⅩⅩⅤ Akagenderera bosio ake, akagwa maumama, ogosaba ng’a onye ekonyarekana, ensa eye emoetere.
ⅩⅩⅩⅥ Agateeba, Abba! Engencho yaye “Tata”, onsi nigo akonyarekana ase ore, onduserie egekombe eke, korende tari buna nyanchete inche, korende buna bwanchete aye.
ⅩⅩⅩⅦ Erio akairana gocha ase aborokigwa baria baye batato akabanyora bararire. Agateebia Petero, “Simioni, nkwararire? Tokonyara korenda nonya nensa eyemo?
ⅩⅩⅩⅧ Renda, saba, timobaisa gosoa ase ogoteemwa; omoika nore nogwancha, korende omobere tori ne chinguru.”
ⅩⅩⅩⅨ Akagenda naende, agasaba, ogokwana amang’ana aria amatang’ani.
ⅩⅬ Erio naende akairana gocha ase aborokigwa akabanyora bararire, ekiagera amaiso abo abeire amarito, gose tibamanya eri bakomoiraneria.
ⅩⅬⅠ Agacha eria gatato, akabateebia, “Nonya mbono moraire, na gotimoka? Aisanire. Engaki yaikire. Rora, Omwana-o-Mwanyabaanto obekirwe ase amaboko y’abanyene ebibe.
ⅩⅬⅡ Imoka, togende; rora, ere oyokondua oikire ang’e.”
Okobwatwa kwa Yeso
(Mat 26:47-56; Luk 22:47-53; Yoh 18:2-11)
ⅩⅬⅢ Erio kegima Yeso kagokwana, Yudasi, oyomo bwa baria ikomi na babere, agaika, na omoganda ore amo nere nemioro ne chinungu, bakorwa ase abakuani abanene, na aborokia b’amariiko, na abagaaka.
ⅩⅬⅣ Ere oyokomorua konya obaeire ekemanyererio, ogoteeba, “Oyo ndanyunyunte, oyio nere, momobwate, momoire momorendete.”
ⅩⅬⅤ Ekero Yudasi aigete akagenda bwango, goika ase Yeso, akabora, “Rabii!” Akamonyunyunta.
ⅩⅬⅥ Erio bakabwata Yeso, bakamoira.
ⅩⅬⅦ Na oyomo ase baria bateneine ang’e akang’usa omoyio oye o birende, agaaka omosomba bw’Omokuani omonene, akamobutora ogoto.
ⅩⅬⅧ Yeso akabateebia, “Inee! Igo mwachire buna mokoimokera omouri nemioro ne chinungu, gocha kong’ira?
ⅩⅬⅨ Inarenge amo nainwe kera rituko ase Hekalu ime kworokereria, ko timwambwata. Korende aya akorirwe, erinde amariiko anyare goikerana.”
Ⅼ Erio aborokigwa bonsi bakamotiga, bagatama.
Omomura oyotamete
ⅬⅠ Omomura oyomo akamotunyana, bweboyetie egetambaa ki’egatani gioka. Bagatema kamobwata,
ⅬⅡ korende ere agatiga egetambaa keria ki’egatani, agatama ore getirianda.
Yeso bosio bw’abakuani
(Mat 26:57-68; Luk 22:54-55,63-71; Yoh 18:12-14,19-24)
ⅬⅢ Bakaira Yeso ase Omokuani omonene; bakamosangererekanera bonsi, abakuani abanene na abagaaka, na aborokia b’amariiko.
ⅬⅣ Na Petero akamotunyana korwa magega ore egeka, goika ime ase egoora y’Omokuani omonene, agaikaransa amo nabasomba gwota omorero.
ⅬⅤ Abakuani abanene na ab’ekegambero bonsi bakarigia oborori igoro ase Yeso banyare komoita, korende tibabonyora,
ⅬⅥ ekiagera abange bakomoteebera oborimo, na oborori bwabo tibwabwatana.
ⅬⅦ Na abande bagatenena bakamoteebera oborimo, bakaboora,
ⅬⅧ “Ntwamoigwete ogoteeba: Inche nintagore Hekalu eye yakoregete n’amaboko, na ase amatuko atato ning’agache eyende etakoregeti n’amaboko.”
ⅬⅨ Nonya nabo oborori bwabo tibwabwatana.
ⅬⅩ Omokuani omonene agatenena gati‐gati, akaboria Yeso okobora, “Tokoiraneria ing’ana? Inki aba bakogosoera?”
ⅬⅪ Korende agakira, tairaneria ing’ana. Omokuani omonene akamobooria naende, akamoteebia, “Aye naye Kristo, Omwana bw’Omosesenigwa?”
ⅬⅫ Yeso agateeba, “Ee, ninche ere; na inwe namorore Omwana‐o‐Mwanyabaanto ogoikaransa ensemo y’okoboko gw’okorio kw’Oyore nokobua, ogocha namare a igoro.”
ⅬⅩⅢ Omokuani omonene agatandora chianga chiaye, akabora, “Ninki tokorigeria abarori bande?
ⅬⅩⅣ Mwaigure okorama kwaye. Inaki morooche?” Bonsi bakamonachera ekiina ng’a nagwenerete akwe.
ⅬⅩⅤ Abande bagachaaka komotwera amate, na komotuba obosio, na komoaka chinkundi, na komoteebia, “Bana!” Abarendi nabarabwo bakamoaka chindoe.
Petero ogokana Yeso
(Mat 26:69-75; Luk 22:56-62; Yoh 18:15-18,25-27)
ⅬⅩⅥ Na Petero nigo arenge egoora inse, na oyomo bw’abaiseke abasomba b’Omokuani omonene agacha,
ⅬⅩⅦ akarora Petero ogwota omorero, akamorigereria, agateeba, “Aye naye kwarenge amo noria Omonazareti, Yeso.”
ⅬⅩⅧ Agakana, akabora, “Timanyeti, gose tinyigweti eki ogokwana.” Agasoka gesieri; etuoni ekabuga.
ⅬⅩⅨ Omoiseke oria omosomba akamorora naende, agachaaka goteebia abateneine ang’e, “Oyo n’oyomo obo.”
ⅬⅩⅩ Agakaana naende. Magega y’egeka egeke naende, baria bateneine ang’e bagateebia Petero, “Ekeene bori, naye n’oyomo obo ore, ekiagera nigo ore Omogalili.”
ⅬⅩⅪ Agachaaka kweragereria na gotiana, “Timanyeti omonto oyio mogoteeba.”
ⅬⅩⅫ Erio etuoni ekabuga eria kabere. Petero akainyora ring’ana riria atebetigwe na Yeso, “Ritang’ani etuoni etarabuga ara kabere, nonkaane ara gatato.” Agachia agetugutana, akarera.