ⅩⅤ
Yeso ase obosio bwa Pilato, gabana o Rumi
(Mat 27:1-2,11-26; Luk 23:1-5,13-25; Yoh 18:26—19:16)
Ⅰ Erio kobwachia gokia mambia, abakuani abanene bagakora ekiina amo nabagaaka na aborokia b’amariiko, na ekegambero ekegima. Bagasiba Yeso, bakamoira, bakamomoa Pilato.
Ⅱ Pilato akamobooria, “Aye naye Omorwoti bw’Abayahudi?” Akamoiraneria, “Naboigo, aye gwateebire.”
Ⅲ Abakuani abanene bakamosoera ase amang’ana amange.
Ⅳ Pilato akamobooria naende, akabora, “Tokoiraneria ing’ana? Rora amang’ana aya amange bagosoereire.”
Ⅴ Korende Yeso tairaneria ing’ana rinde naende, goika Pilato agakumia.
Ⅵ Nabo ase rituko rinene nigo anarete kobasiborera omosibwa oyomo, oyobarigetie.
Ⅶ Narengeo omonto ore korokwa Baraba, osibetwe amo nabaanto abakorete eburuburu, na gokora oboiti ase eburuburu.
Ⅷ Omoganda ogotiira gochiao, na barabwo bagachaaka gosaba Pilato abakorere buna anarete kobakorera.
Ⅸ Pilato akababoria, “Morigetie mbasiborere Omorwoti bw’Abayahudi?”
Ⅹ Ekiagera amanyete ng’a abakuani abanene nigo bamorure ase obogechi.
Ⅺ Abakuani abanene bakagenka abanto b’omoganda, erinde anche kobasiborera Baraba.
Ⅻ Pilato akairaneria naende, akabateebia, “Imokore naki oyo mogoteeba ng’a n’Omorwoti bw’Abayahudi?”
ⅩⅢ Bagaaka eriogi naende, “Mobambe!”
ⅩⅣ Pilato akababoria, “Nase ki? Mbobe ki akorete?” Bakamenta mono goaka eriogi, “Mobambe!”
ⅩⅤ Pilato agancha gokora ayaragwenere omoganda, akabasiborera Baraba, na ekero aakire Yeso chinkini, akamorua abambwe.
Abarwani bagochecheria Yeso
(Mat 27:27-31; Yoh 19:2-3)
ⅩⅥ Abarwani bakaira Yeso ime ase enyomba y’ekegambero (nero Praitorio), bagasangererekana amo ekeombe ekegima.
ⅩⅦ Bakamoboyia eanga emonyinga, bagatwang’a egutwa y’amagwa, bakamobekera motwe,
ⅩⅧ bagachaaka komokwania, “Masoge, Omorwoti bw’Abayahudi!”
ⅩⅨ Bakamoaka omotwe negetonto, bakamotwera amate, bakabeka amaru inse, bakamosasiima.
ⅩⅩ Kobamochecheirie, bakamorusia eanga eria emonyinga, bakamoboyia chianga chiaye omonyene. Bakamoira isiko komobamba.
Okobambwa kwa Yeso
(Mat 27:32-44; Luk 23:26-43; Yoh 19:17-27)
ⅩⅪ Bakabetereria omonto orenge goeta, Simioni Omokurene, ore korwa borabu, ise Alekisanda na Rufo, abogorie omosalaba o Yeso.
ⅩⅫ Bakamoira aase akorokwa Gologotha (engencho yaye: Aase Ekeore).
ⅩⅩⅢ Bakamoa edivai yochoganirie na manemane anywe, ko tancha konywa.
ⅩⅩⅣ Bakamobamba, bagaatanana chianga chiaye, bagachiakera obomera eye kera omonto araire.
ⅩⅩⅤ Nigo chiare chinsa isato ekero bamobambete.
ⅩⅩⅥ Na amariiko y’ogosoerwa kwaye nigo ariikire igoro, “OMORWOTI BW’ABAYAHUDI.”
ⅩⅩⅦ Amo nere bakabamba abauri babere, oyomo ensemo y’okoboko kwaye gw’okorio, na oyonde okoboko gw’okobee. [
ⅩⅩⅧ Nabo ririiko rigaikerana, erigoteeba, “Obareraniigwe amo nabasaria.”]
ⅩⅩⅨ Na abanto abaare goeta bakamorama, bagosinga‐singisia emetwe yabo, bagoteeba, “A! Aye oyogotagora Hekalu na koyeagacha ase amatuko atato,
ⅩⅩⅩ etoorie, ika korwa ase omosalaba!”
ⅩⅩⅪ Naboigo nabakuani abanene bakamosekereria barabwo ase barabwo, amo naborokia b’amariiko, bagateeba, “Natooretie abande, ere omonyene takonyara gwetooria.
ⅩⅩⅫ Tiga Kristo, Omorwoti bw’Abaisraeli, aike bono korwa ase omosalaba, tonyare korora na kwegena!” Na barabwo abaabambetwe amo nere bakamoraama.
Ogokwa kwa Yeso
(Mat 27:45-56; Luk 23:44-49; Yoh 19:28-30)
ⅩⅩⅩⅢ Ekero chinsa isano nemo chiaika omosunte okaba igoro ase ense yonsi goika chinsa kianda.
ⅩⅩⅩⅣ Ne chinsa kianda Yeso akarera ase eriogi rinene, “Eloi, Eloi, lama sabakitani?” Okoonchorwa kwaye: “Nyasae one, Nyasae one, naki gwantigire?”
ⅩⅩⅩⅤ Na abande b’abwo bateneine ang’e koyaigwa bakaboora, “Rora, nkorangeria are Elija.”
ⅩⅩⅩⅥ Omonto akaminyoka bwango, akaimokia esifunchi, akayeichoria chinkama, akayebeka igoro ase egetonto, akamoa anywe, okobora, “Tiga torore gose Elija ngocha are komoikia.”
ⅩⅩⅩⅦ Yeso agaaka eriogi rinene, agatweka mo.
ⅩⅩⅩⅧ Egetambaa gi’okonacha Hekalu kegatondoka korwa igoro goika inse, gekaba bibere.
ⅩⅩⅩⅨ Na ekero omotang’ani bw’abarwani rigana ateneine amorigereretie, agachia korora ng’a otwekire mo, akabora, “Ekeene, omonto oyo nigo arenge Omwana o Nyasae.”
ⅩⅬ Mbarengeo abakungu barigereretie korwa are. Ase abwo nigo barenge Mariamu Magadalena na Mariamu ng’ina Yakobo omoke na Yose, na Salome.
ⅩⅬⅠ Aba nabwo bamotuny’anete ekero arenge Galili na komokorera, amo nabande abange abakungu abatiirete amo nere goika Yerusalemu.
Ogotindekwa kwa Yeso
(Mat 27:57-61; Luk 23:50-56; Yoh 19:38-42)
ⅩⅬⅡ Riachia koba mogoroba, ekiagera nerituko ri’okwebeka ang’e, nario rituko ri’ogotang’anera Esabato,
ⅩⅬⅢ Yusufu omonto bw’Arimathaya agacha, oyorenge omosike, omonto bw’ekegambero. Ere omonyene nigo aganyete oborwoti bwa Nyasae; agasoa noboremu ase obosio bwa Pilato, agasaba aegwe omobere o Yeso.
ⅩⅬⅣ Pilato agakumia, ekiagera aikire gokwa, akarangeria omotang’ani oria bw’abarwani rigana, akamobooria gose nkare akwete.
ⅩⅬⅤ Goika agachia konyora ekeene ng’a okuure, akaa Yusufu omobere.
ⅩⅬⅥ Yusufu akagora egetambaa ki’egatani, akamoikia, akamoboyia egetambaa keria, akamobeka ase oboina bwabaachetwe ase egetare. Naende agaturunkania rigena gochia ase egesieri ki’oboina.
ⅩⅬⅦ Mariamu Magadalena na Mariamu ng’ina Yose bakarigereria aase abegetwe.