ⅩⅥ
Okobokigwa kwa Yeso
(Mat 28:1-10; Luk 24:1-12; Yoh 20:1-10)
Ⅰ Goika Esabato koyaerire, Mariamu Magidalena, na Mariamu ng’ina Yakobo, na Salome, bakagora amaguta yamanukato, banyare kogenda komoaka.
Ⅱ Goika mambia chuni, rituko rie ritang’ani ri’echuma, bakagenda ase oboina, erioba korikooroka.
Ⅲ Bagateebania barabwo ase barabwo, “Ning’o oranyare gototigereria rigena riria korwa ase egesieri ki’oboina?”
Ⅳ Goika bagachia korigereria bakarora ng’a rigena riria riatigerigwe, na rirorio nigo riarenge rinene mono.
Ⅴ Bagasoa oboina ime, bakarora omomura oikaransete ensemo y’okorio, bweboyetie eanga endabu, bakegosa.
Ⅵ Ere akabateebia, “Timoichana; Yeso Omonazareti mokorigia, oria obambetwe. Ere obookire, tari aiga. Rigereria aase bamobegete!
Ⅶ Korende genda, moteebie aborokigwa baye, na Petero, ng’a obatang’aneire kogenda Galili. Agwo nao moramorore, buna abateebeetie.”
Ⅷ Bakarua agwo, bagatama korwa ase oboina, ekiagera basoetwe nekeondoko na ogokumia. Tibateebetie monto ing’ana, ekiagera bairogete.
Yeso okororekana kabookire
(Yoh 20:11-18; Luk 24:13-35; Mat 28:16-20; Luk 24:36-49; Yoh 20:19-23)
Ⅸ Yeso ekero abookire, mambia rituko rie ritang’ani ri’echuma akaorokera ritang’ani Mariamu Magidalena, ere oria arusetie ebirecha bitano na bibere.
Ⅹ Oyo akagenda agateebia baria barenge amo nere korwa kare, baare kweumia na korera.
Ⅺ Na barabwo, bagachia koigwa ng’a moyo are, na ororirwe nere, tibegena.
Ⅻ Magega ase aya akaorokera abanto babere ase barabwo, ore nekieni kende ekeao, ekero barenge gotaara kogenda borabu.
ⅩⅢ Nabarabwo bakagenda bagateebia abande amang’ana aria, korende abwo tibabegena.
ⅩⅣ Naende akaorokera baria ikomi nomo, ekero barenge koragera; akabatogonyera ase ogotegena kwabo na obokong’u bw’emioyo yabo, ekiagera bategenete abamorooche kabokire.
ⅩⅤ Akabateebia, “Genda ase ense yonsi, morandie enchiri ase kera egetongwa.
ⅩⅥ Oyoregene na kobatiswa, natooreke, ko oyotegeneti, nagambigwe.
ⅩⅦ Na ebimanyererio ebi bie chinguru nabibatunyane abwo begenire: Ase erieta riane nabaserie ebirecha, nabakwane ase emenwa emeyia,
ⅩⅧ nababwata ching’iti, gose nabanywa egento kegoita, ko tigekobaita nonya ng’ake; nababeeke amaboko abo igoro ase abarwaire, na barabwo nabagwene.”
Yeso okogenda igoro
(Luk 24:50-53)
ⅩⅨ Nabo Omonene Yeso, gakwanire nabarabwo, akabogorigwa gochia igoro, agaikaransa ensemo y’okoboko gw’okorio kwa Nyasae.
ⅩⅩ Na barabwo bakaimoka, bakarandia chinsemo chionsi. Omonene akaba ogokora emeremo amo nabarabwo, na goikerania ring’ana ase ebimanyererio bie chinguru ebiabatuny’anete. Amina.